1Այս վկայութիւնը կը դնեմ Աստուծոյ առջև և Յիսուս Քրիստոսի, որ պիտի դատէ կենդանիները ու մեռեալները իր յայտնուելուն ու թագաւորութեանը ատենը: 2Խօսքը քարոզէ, մտադրութեամբ գործիդ պարապէ ատենին ու ատենէ դուրս, յանդիմանէ, սաստէ, յորդորէ ամենայն երկայնմտութեամբ ու վարդապետութեամբ: 3Վասն զի ժամանակ պիտի գայ որ ողջամիտ վարդապետութեանը պիտի չհամբերեն, հապա իրենց լսելիքին եռքովը իրենց ցանկութիւններուն համեմատ վարդապետներ պիտի դիզեն իրենց. 4Եւ ճշմարտութենէն ականջներնին պիտի դարձնեն, ու առասպելներու ետևէ պիտի մոլորին: 5Բայց դուն ամէն բանի մէջ արթուն կեցիր, նեղութիւններու համբերէ, աւետարանիչի գործ գործէ, քու պաշտօնդ կատարէ: 6Վասն զի ես արդէն զոհ ըլլալու նուիրուած եմ, ու իմ մեկնելուս ատենը հասեր է: 7Բարի պատերազմը պատերազմեցայ, ընթացքը կատարեցի, հաւատքը պահեցի: 8Ասկէ ետև կայ կը մնայ ինծի, արդարութեան պսակը, զոր Տէրը, արդար Դատաւորը, պիտի հատուցանէ ինծի այն օրը. ու ոչ թէ միայն ինծի, հապա այն ամէնուն ալ` որ անոր յայտնուիլը սիրեցին:

Անձնական խօսքեր

9Ջանք ըրէ շուտով ինծի գալ. 10Վասն զի Դեմաս զիս թողուց ու այս աշխարհը սիրեց, և գնաց Թեսաղոնիկէ. Կրէսկէս գնաց Գաղատիա, Տիտոս` Դաղմատիա. 11Միայն Ղուկաս ինծի հետ է. Մարկոսը առնես` քեզի հետ բերես, վասն զի ինծի օգտակար է սպասաւորութեան համար: 12Եւ ես Տիւքիկոսը Եփեսոս ղրկեցի: 13Այն վերարկուն` զոր Տրովադա թողուցի Կարպոսի քով, երբ գաս` բեր, գիրքերն ալ` մանաւանդ մագաղաթները: 14Դարբին Աղեքսանդրոս շատ չարութիւն ըրաւ ինծի. Տէրը անոր հատուցանէ իր գործերուն համեմատ: 15Դուն ալ անկէ զգուշանաս, վասն զի մեր խօսքերուն շատ դէմ կեցաւ: 16Առաջին անգամ ատեանին առջև պատասխան տալուս` իմ կողմանէս մէ°կը չկայնեցաւ ինծի հետ, հապա ամէնն ալ զիս թողուցին. այս իրենց չսեպուի: 17Բայց Տէրը իմ քովս կայնեցաւ ու զիս զօրացուց, որպէս զի քարոզութիւնը իմ միջոցովս լման ըլլայ, ու բոլոր հեթանոսները լսեն. և ես առիւծին բերնէն ազատեցայ: 18Եւ Տէրը ամէն չար գործէ պիտի ազատէ զիս, և ապահովութեամբ իր երկնային թագաւորութեանը պիտի հասցնէ. իրեն փառք յաւիտեանս յաւիտենից: Ամէն: 19Բարև տուր Պրիսկէի և Ակիւղասի, ու Ոնեսիփորոսի տանը: 20Երաստոս Կորնթոսի մէջ մնաց. և Տրոփիմոսը Մելիտոսի մէջ թողուցի հիւանդացած: 21Ջանք ըրէ ձմեռէն առաջ գալ: Բարև կ’ընեն քեզի Եւբուղոս ու Պուդէս և Լինոս ու Կղօդիա և բոլոր եղբայրները: 22Տէր Յիսուս Քրիստոս քու հոգիիդ հետ ըլլայ. շնորհքը ձեզի հետ: Ամէն: