1Առաջին պատմութիւնը ըրի, ով Թէոփիլոս, այն ամէն բաներուն վրայ զորոնք Յիսուս սկսաւ ընել և սորվեցնել: 2Մինչև այն օրը որ Հոգւոյն Սրբոյ միջոցով պատուէր տուաւ իր ընտրած առաքեալներուն, ու համբարձաւ. 3Որոնց ինքզինք ցուցուց կենդանի իր չարչարանքներէն ետև շատ ապացոյցներով, քառասուն օրուան մէջ անոնց երևնալով ու Աստուծոյ թագաւորութեանը վրայ խօսելով: 4Եւ անոնց հետ մէկտեղ գտնուած ատենը կ’ապսպրէր անոնց որ Երուսաղէմէ չհեռանան, հապա սպասեն Հօրը խոստմունքին, զոր ինծմէ լսեցիք, կ’ըսէր: 5Վասն զի իրաւ Յովհաննէս ջրով մկրտեց, բայց դուք ասկէ շատ օրեր չանցած` Սուրբ Հոգիով պիտի մկրտուիք:

Յիսուս համբարձաւ

6Անոնք ալ մէկտեղ գալով՝ կը հարցնէին իրեն ու կ’ըսէին, Տէր, Իսրայէլի թագաւորութիւնը այս ժամանակի՞ն մէջ նորէն պիտի հաստատես: 7Եւ ըսաւ անոնց, Ձեզի չվերաբերիր ժամերը և ժամանակները գիտնալը, զոր Հայրը իր իշխանութեանը մէջ դրաւ. 8Բայց Հոգւոյն Սրբոյ ձեր վրայ եկած ատենը զօրութիւն պիտի առնէք, ու ինծի համար վկաներ պիտի ըլլաք Երուսաղէմի մէջ և բոլոր Հրէաստանի ու Սամարիայի մէջ ու մինչև երկրի ծայրերը: 9Եւ երբ այս բաները ըսաւ, մինչ անոնք կը նայէին, համբարձաւ, և ամպ մը զանիկա անոնց աչքէն առաւ: 10Ու քանի որ աչքերնին տնկած դէպ ի երկինք կը նայէին անոր երթալուն վրայ, ահա երկու մարդ իրենց քով կայնեցան ճերմակ հանդերձներով. 11Որոնք նաև ըսին, Ով Գալիլեացի մարդիկ, ինչո՞ւ կայներ դէպ ի երկինք կը նայիք. այս Յիսուսը որ ձեզմէ երկինք համբարձաւ, այսպէս պիտի գայ` ինչպէս տեսաք անոր երկինք երթալը:

Յուդային հաջորդը

12Այն ատեն Երուսաղէմ դարձան Ձիթենեաց ըսուած լեռնէն, որ շաբաթ օրուան ճամբու չափ մօտ է Երուսաղէմի: 13Ու երբ քաղաքը մտան, ելան վերնատունը, ուր կը բնակէին Պետրոս և Յակոբոս, Յովհաննէս և Անդրէաս, Փիլիպպոս և Թովմաս, Բարթողոմէոս և Մատթէոս, Յակոբոս Ալփէոսեան ու Սիմոն Նախանձայոյզ և Յուդա Յակոբեան: 14Ասոնք ամէնը միաբանութեամբ միշտ աղօթք ու աղաչանք կ’ընէին կիներուն հետ, և Յիսուսի մօրը Մարիամի ու անոր եղբայրներուն հետ մէկտեղ: 15Եւ այն օրերը ելաւ Պետրոս աշակերտներուն մէջ, (ուր հարիւր քսան հոգիի չափ ժողվուած բազմութիւն կար,) ու ըսաւ, 16Մարդիկ եղբայրներ, պէտք էր որ կատարուէր այս գրուածը, զոր առաջուընէ Հոգին Սուրբ Դաւիթի բերնով ըսաւ Յուդայի համար, որ Յիսուսը բռնողներուն առաջնորդ եղաւ. 17Վասն զի անիկա մեզի հետ էր մեր համրանքին մէջ, և այս պաշտօնէն ալ բաժին ունէր: 18Ասիկա անիրաւութեան վարձքով ագարակ մը ստացաւ, ու գլխիվար իյնալով մէջտեղէն ճեղքուեցաւ, և իր ամէն փորոտիքը դուրս թափեցաւ: 19Ու այս բանը Երուսաղէմ բնակողներուն ամէնուն յայտնի եղաւ, մինչև իրենց լեզուովը այն ագարակին անունը Ակեղդամա դրուեցաւ, այսինքն Արեան ագարակ: 20Վասն զի Սաղմոսներու գիրքին մէջ գրուած է թէ Անոր բնակարանը աւերակ ըլլայ, ու անոր մէջ բնակող մը չըլլայ, և անոր պաշտօնը ուրիշը առնէ: 21Ուրեմն պետք է որ այս մարդոցմէն` որոնք մեզի հետ եղան այն բոլոր ատենը, երբ Տէր Յիսուս մեր մէջ մտաւ ու ելաւ, 22Յովհաննէսի մկրտութենէն սկսած` մինչև այն օրը որ մեզմէ համբարձաւ, ասոնցմէ մէկը մեզի հետ վկայ ըլլայ անոր յարութեանը: 23Եւ երկու հոգի կայնեցուցին, Յովսէփը որ Բարսաբա կը կոչուէր, որ Յուստոս ալ մականուանեցաւ, ու Մատաթիան: 24Եւ աղօթք ընելով` ըսին, Դուն, ով Տէր, որ ամէնուն սիրտը գիտես, այս երկուքէն մէկը, զոր ընտրեցիր, մեզի յայտնէ. 25Որպէս զի այս պաշտօնին և առաքելութեանը վիճակը առնէ, որմէ Յուդա ինկաւ իր տեղը երթալու: 26Եւ անոնց համար վիճակ ձգեցին, ու վիճակը Մատաթիայի ելաւ, և անիկա տասնըմէկ առաքեալներուն հետ սեպուեցաւ: