Պետրոս և Կոռնելիոս

1Կեսարիայի մէջ մարդ մը կար Կոռնելիոս անունով, հարիւրապետ` Իտալացի ըսուած գունդէն. 2Բարեպաշտ ու աստուածավախ իր բոլոր տունովը, որ ժողովուրդին շատ ողորմութիւններ կու տար, և ամէն ատեն Աստուծոյ աղօթք կ’ընէր: 3Անիկա օրուան ժամը իննին ատենները տեսիլքի մէջ Աստուծոյ հրեշտակը յայտնի տեսաւ, որ իր քով մտաւ և իրեն ըսաւ, Կոռնելիոս. 4Ան ալ անոր նայելով ու խիստ վախնալով` ըսաւ, Ի՞նչ է, Տէր. ան ալ ըսաւ անոր, Քու աղօթքներդ ու ողորմութիւններդ Աստուծոյ առջև ելան յիշատակի համար: 5Եւ հիմա Յոպպէ մարդիկ ղրկէ, ու կանչէ Սիմոն անունով մէկը որ Պետրոս մականուանեալ է. 6Անիկա իբրև հիւր կը կենայ Սիմոն անունով կաշի բանողի մը քով, որուն տունը ծովուն մօտ է: 7Ու երբ գնաց այն հրեշտակը որ իրեն հետ կը խօսէր, իր ծառաներէն երկուքը կանչեց, ու իր քով սպասողներէն ալ բարեպաշտ զինուոր մը: 8Եւ բոլորը անոնց պատմելով` Յոպպէ ղրկեց զանոնք: 9Ու հետևյալ օրը երբ անոնք ճամբայ երթալով` քաղաքին մօտեցան, Պետրոս ժամը վեցին ատենները տանիքը ելաւ աղօթք ընելու. 10Եւ խիստ անօթեցած ըլլալով` կ’ուզէր ճաշ ընել. ու քանի որ կերակուրի պատրաստութիւն կը տեսնէին, իր վրայ մտքի յափշտակութիւն մը եկաւ. 11Եւ տեսաւ երկինքը բացուած, ու չորս ծայրէն կապուած աման մը մեծ կտաւի մը պէս, որ իջաւ երկրի վրայ. 12Որուն մէջ կային երկրի բոլոր չորքոտանիները ու գազանները և սողունները ու երկինքի թռչունները: 13Եւ ձայն մը եկաւ իրեն, Ելիր, Պետրոս, մորթէ ու կեր: 14Բայց Պետրոս ըսաւ, Քա՛ւ լիցի, Տէր, վասն զի ես ամենևին պիղծ կամ անմաքուր բան կերած չեմ: 15Նորէն մէյմըն ալ ձայն եկաւ իրեն, Զայն որ Աստուած մաքրեց, դուն պիղծ մի սեպեր: 16Ասիկա երեք անգամ եղաւ, և ամանը երկինք վերցաւ: 17Ու Պետրոս երբ իր մտքին մէջ կը զարմանար թէ ի՛նչ պիտի ըլլայ այն իր տեսած տեսիլքը, ահա Կոռնելիոսէ ղրկուած մարդիկը Սիմոնի տունը հարցուցին, ու դրանը առջև կայնեցան: 18Եւ կանչելով` կը հարցնէին թէ Սիմոն որ Պետրոս կ’ըսուի, հո՞ս կը կենայ: 19Ու երբ Պետրոս այն տեսիլքին վրայով կը մտածէր, Հոգին Սուրբ ըսաւ անոր, Ահա երեք մարդիկ քեզ կը փնտռեն. 20Ուստի ելիր իջիր, և անոնց հետ գնա առանց խղճահարութեան, վասն զի ես ղրկեցի զանոնք: 21Պետրոս ալ այն մարդոց քով իջնելով` ըսաւ, Ահա ես եմ անիկա զոր դուք կը փնտռէք. ի՞նչ բանի համար եկած էք: 22Անոնք ալ ըսին, Կոռնելիոս հարիւրապետը, արդար և աստուածավախ մարդ, բոլոր Հրէից ազգէն վկայուած, սուրբ հրեշտակէ մը հրաման առաւ, որ քեզ իր տունը կանչէ և քեզմէ խօսքեր լսէ: 23Այն ատեն ներս կանչեց զանոնք և իր քով վար դրաւ: Ու հետևեալ օրը Պետրոս ելաւ, անոնց հետ գնաց, և քանի մըն ալ Յոպպէէ եղող եղբայրներէն իրեն հետ գացին: 24Ու հետևեալ օրը Կեսարիա մտան. Կոռնելիոս ալ իր ազգականները և մտերիմ բարեկամները կանչած` անոնց կը սպասէր: 25Ու երբ Պետրոս ներս կը մտնէր, Կոռնելիոս անոր դիմաց ելաւ, ու անոր ոտքը իյնալով երկրպագութիւն կ’ընէր: 26Բայց Պետրոս զանիկա կանգնեցուց ու ըսաւ, Ելիր կայնէ. Ես ինքնս ալ մարդ եմ: 27Եւ անոր հետ խօսակցելով ներս մտաւ, ու հոն շատ մարդիկ ժողվուած գտաւ. 28Եւ ըսաւ անոնց, Դուք գիտէք թէ ի՛նչպէս ապօրինաւոր բան է Հրեայ մարդու մը օտարազգիի հետ հաղորդակցութիւն ընելը կամ անոր մօտենալը. բայց Աստուած ինծի ցուցուց որ մարդոցմէ մէկո՛ւն պիղծ կամ անմաքուր չըսեմ: 29Անոր համար ես ալ որ կանչուեցայ, առանց դէմ խօսելու եկայ. բայց հիմա կը հարցնեմ, ի՞նչ բանի համար զիս կանչեցիք: 30Կոռնելիոս ալ ըսաւ, Չորս օր առաջ մինչև այս ժամը ծոմ կը պահէի, ու ժամը իննին տանս մէջ աղօթք կ’ընէի. և ահա փայլուն հանդերձներով մարդ մը կայնեցաւ առջևս ու ըսաւ, 31Կոռնելիոս, քու աղօթքդ լսուեցաւ, և քու ողորմութիւններդ Աստուծոյ առջև յիշուեցան. 32Ուստի մարդ ղրկէ Յոպպէ, ու կանչէ Սիմոնը որ Պետրոս ալ կ’ըսուի. անիկա ծովուն մօտ Սիմոն անունով կաշի բանողի մը տանը մէջ իբրև հիւր կը կենայ. որ երբ գայ, քեզի պիտի խօսի: 33Ուստի անմիջապէս մարդիկ ղրկեցի քեզի, դուն ալ աղէկ ըրիր որ եկար. և հիմա մենք ամէնս Աստուծոյ առջև կեցեր ենք` լսելու այն ամէն բաները որոնք Աստուծմէ հրամայուած են քեզի:

Պետրոսին խօսքը

34Պետրոս իր բերանը բացաւ ու ըսաւ, Ճշմարտութեամբ կը հասկնամ որ Աստուծոյ քով աչառութիւն չկայ. 35Հապա ամէն ազգի մէջ ան որ անկէ կը վախնայ ու արդարութիւն կը գործէ, անոր ընդունելի է: 36Այն խօսքը զոր Իսրայէլի որդիներուն ղրկեց Աստուած խաղաղութիւն քարոզելու Յիսուս Քրիստոսի ձեռքով. (ասիկա է ամէնուն Տէրը.) 37Դուք աղէկ գիտէք այն բանը, որ բոլոր Հրէաստանի մէջ եղաւ Գալիլեայէ սկսած, այն մկրտութենէն ետև զոր Յովհաննէս քարոզեց. 38Յիսուսը որ Նազարէթէ էր, զոր Աստուած օծեց Սուրբ Հոգիով և զօրութիւնով որ պտըտեցաւ բարիք ընելով ու սատանայէ բոլոր տանջուածները բժշկելով, քանզի Աստուած իրեն հետ էր: 39Եւ մենք վկայ ենք այն ամէն բաներուն զորոնք ըրաւ Հրէաստանի երկրին մէջ ու Երուսաղէմի մէջ, զոր փայտէն կախած սպաննեցին ալ: 40Աստուած զանիկա երրորդ օրը յարուց, և յայտնի ըրաւ զանիկա, 41Ոչ թէ բոլոր ժողովուրդին, հապա մեզի, առաջուընէ Աստուծմէ վկայ ըլլալու ընտրուածներուս, որ իրեն հետ կերանք ու խմեցինք ալ անոր մեռելներէն յարութիւն առնելէն ետքը: 42Եւ ինք պատուիրեց մեզի` որ ժողովուրդին քարոզենք ու վկայութիւն տանք, թէ անիկա է Աստուծմէ սահմանուած` կենդանիներուն ու մեռելներուն Դատաւորը: 43Անոր կը վկայեն բոլոր մարգարէները, թէ ամէն իրեն հաւատացողները իր անունով մեղքերու թողութիւն կ’առնեն:

Հեթանոսները Սուրբ Հոգին կ’ընդունին

44Ու երբ Պետրոս այս խօսքերը կը խօսէր, Հոգին Սուրբ իջաւ ամէնուն վրայ` որոնք խօսքը կը լսէին: 45Եւ թլփատուածներէն եղող հաւատացեալները, որոնք Պետրոսի հետ եկած էին, զարմացան որ հեթանոսներուն վրայ ալ Հոգւոյն Սրբոյ պարգևը կը լեցուէր: 46Քանզի կը լսէին անոնցմէ որ ուրիշ լեզուներով կը խօսէին, և զԱստուած կը փառաւորէին: 47Այն ատեն Պետրոս պատասխան տուաւ, Կրնա՞յ մէկը ջուրը արգիլել որ ասոնք չմկրտուին, որոնք Սուրբ Հոգին ալ ընդունեցին մեզի պէս: 48Ու հրաման ըրաւ որ Տէրոջը անունովը մկրտուին. այն ատեն իրեն աղաչեցին որ քանի մը օր հոն մնայ: