Պետրոսին զեկուցումը Երուսաղէմի եկեղեցիին մէջ

1Եւ առաքեալները ու եղբայրները որ Հրէաստանի կողմերն էին, լսեցին որ հեթանոսներն ալ Աստուծոյ խօսքը ընդուներ են: 2Ու երբ Պետրոս Երուսաղէմ ելաւ, թլփատուածներէն եղողները անոր հետ կը վիճէին, 3Ու կ’ըսէին թէ Դուն անթլփատ մարդոց քով մտար, և անոնց հետ հաց կերար: 4Պետրոս ալ սկսաւ բանը կարգով պատմել անոնց, ու ըսաւ, 5Ես Յոպպէ քաղաքը աղօթք կ’ընէի, ու մտքի յափշտակութեան մէջ տեսիլք մը տեսայ. աման մը մեծ կտաւի պէս` չորս ծայրերէն երկինքէն կախուած իջաւ, ու մինչև ինծի հասաւ. 6Որուն վրայ աչքս տնկեր կը նայէի, և տեսայ երկրի չորքոտանիները ու գազանները և սողունները ու երկինքի թռչունները: 7Եւ ձայն մը լսեցի որ կ’ըսէր ինծի, Ելիր, Պետրոս, մորթէ ու կեր: 8Բայց ես ըսի, Քա՛ւ լիցի, Տէր, վասն զի պիղծ կամ անմաքուր բան մը ամենևին մտած չէ իմ բերանս: 9Պատասխան տուաւ ինծի երկրորդ անգամ այն ձայնը երկինքէն, Զայն որ Աստուած մաքրեց, դուն պիղծ մի սեպեր: 10Այս երեք անգամ եղաւ, ու նորէն բոլորը երկինք քաշուեցաւ: 11Եւ ահա իսկոյն երեք մարդ Կեսարիայէ ինծի ղրկուած` եկան իմ եղած տանս առջև կեցան: 12Հոգին ալ ինծի ըսաւ որ անոնց հետ երթամ առանց խղճահարութեան. այս վեց եղբայրներն ալ ինծի հետ գացին, ու մտանք այն մարդուն տունը: 13Եւ անիկա մեզի պատմեց թէ ի՛նչպէս իր տանը մէջ հրեշտակը տեսաւ, որ կայներ էր և իրեն կ’ըսէր, Մարդ ղրկէ Յոպպէ, ու կանչէ Սիմոնը որ Պետրոս ալ կը կոչուի. 14Ան քեզի խօսքեր պիտի խօսի, որոնցմով փրկուիս դուն և քու բոլոր տունդ: 15Ու երբ սկսայ խօսիլ, Հոգին Սուրբ անոնց վրայ իջաւ, ինչպէս առաջուընէ մեր վրայ ալ: 16Այն ատեն յիշեցի Տէրոջը խօսքը որ կ’ըսէր, Յովհաննէս ջրով մկրտեց, բայց դուք Սուրբ Հոգիով պիտի մկրտուիք: 17Ուստի եթէ Աստուած միևնոյն շնորհքը տուաւ անոնց, ինչպէս մեզի ալ, երբ Տէր Յիսուս Քրիստոսի հաւատացին, ես ո՞վ էի որ կարենայի Աստուծոյ դէմ դնել: 18Այս բաները լսելով` ձայներնին կտրեցին, և զԱստուած կը փառաւորէին ու կ’ըսէին, Ուրեմն Աստուած հեթանոսներուն ալ կեանքի համար ապաշխարութիւն տուաւ:

Եկեղեցին Անտիոքի մէջ

19Եւ Ստեփանոսի մահուանը վրայ եկած նեղութենէն ցիրուցան եղածները մինչև Փիւնիկէ ու Կիպրոս և Անտիոք հասան, ու մէկո՛ւն Աստուծոյ խօսքը չէին խօսեր, միայն թէ Հրեաներուն: 20Բայց անոնցմէ ոմանք Կիպրացի և Կիւրենացի մարդիկ էին, որոնք երբ Անտիոք մտան, Հելլենացելոց հետ կը խօսէին` Տէր Յիսուսը քարոզելով: 21Ու Տէրոջը ձեռքը անոնց հետ էր, և բազմաթիւ մարդիկ հաւատալով Տէրոջը դարձան: 22Եւ անոնց վրայով այս լուրը Երուսաղէմի եկեղեցիին ականջը հասաւ. ու Բառնաբասը ղրկեցին որպէս զի մինչև Անտիոք երթայ. 23Որ երբ եկաւ և Աստուծոյ շնորհքը տեսաւ` ուրախացաւ, ու կը յորդորէր ամէնն ալ` որ յօժար սրտով Տէրոջը հետ կապուած մնան. 24Քանզի ինք բարի մարդ էր, ու Սուրբ Հոգիով և հաւատքով լեցուն. ու Տէրոջը շատ ժողովուրդ աւելցաւ: 25Ետքը Բառնաբաս Տարսոն ելաւ Սօղոսը փնտռելու, և զանիկա գտնելով Անտիոք բերաւ: 26Ու եղաւ որ անոնք լման տարի մը եկեղեցիին հետ մէկտեղ ժողվուելով` շատ ժողովուրդի սորվեցուցին. ու ամէնէն առաջ Անտիոքի մէջ աշակերտները Քրիստոնեայ անուանեցան: 27Այն օրերը Երուսաղէմէ մարգարէներ իջան Անտիոք: 28Եւ անոնցմէ մէկը, Ագաբոս անունով, ելաւ իմացուց Հոգիին զօրութիւնովը, թէ մեծ սով մը պիտի ըլլայ բոլոր աշխարհ, որ և եղաւ Կղօդիոսի օրերը: 29Եւ աշակերտները որոշեցին որ իրենցմէ ամէն մէկը ձեռքէն եկածին չափ Հրէաստանի մէջ բնակող եղբայրներուն օգնութիւն ղրկեն. 30Զոր կատարեցին ալ, երէցներուն ղրկելով Բառնաբասի ու Սօղոսի ձեռքով: