Աւելի հալածանք

1Այն ատենները Հերովդէս թագաւորը ձեռք զարկաւ եկեղեցիէն մէկ քանիները չարչարել: 2Եւ Յովհաննէսի եղբայրը Յակոբոսը սրով սպաննեց: 3Ու տեսնելով որ Հրեաներուն հաճելի է, անոր վրայ Պետրոսն ալ բռնեց. ու բաղարջակերքի օրերն էին: 4Զանիկա երբ բռնեց, բանտը դրաւ. և չորս կարգ չորսական զինուորներու յանձնեց, որպէս զի պահեն, և կ’ուզէր զատկէն ետև ժողովուրդին հանել զանիկա: 5Ուստի Պետրոս բանտին մէջ պահուած էր, բայց եկեղեցին անդադար աղօթք կ’ընէր Աստուծոյ անոր համար:

Պետրոս կ’ազատի բանտէն

6Ու երբ Հերովդէս ուզեց զանիկա դուրս բերել, այն գիշերը Պետրոս երկու զինուորներու մէջտեղ կը քնանար կրկին շղթաներով կապուած. ու պահապանները դրանը առջև բանտը կը պահպանէին: 7Եւ ահա Տէրոջը հրեշտակը եկաւ վրան կայնեցաւ, ու տանը մէջ լոյս մը ծագեց, և Պետրոսի կողը խթելով` արթնցուց զանիկա, ու ըսաւ, Շուտով ելիր. ու շղթաները անոր ձեռքերէն վար ինկան: 8Եւ հրեշտակը ըսաւ անոր, Գօտիդ կապէ ու հողաթափներդ ոտքդ հագիր. անիկա ալ այնպէս ըրաւ. և ըսաւ անոր, Հանդերձդ վրադ առ ու եկուր իմ ետևէս: 9Ան ալ ելլելով անոր ետևէն կ’երթար, և չէր գիտեր թէ այն հրեշտակէն եղած բանը իրաւ է, հապա կը կարծէր թէ տեսիլք կը տեսնէ: 10Ու երբ անոնք առաջին ու երկրորդ պահապաններէն անցան, եկան մինչև երկաթի դուռը` որ քաղաքին մէջ կը հանէր, որ ինքիրմէ բացուեցաւ անոնց. և անկէ ելլելով` փողոց մը անցան, հրեշտակն ալ իսկոյն անկէ զատուեցաւ: 11Ու Պետրոս ինքնզինքին գալով` ըսաւ, Հիմա ճշմարտապէս գիտեմ որ Տէրը իր հրեշտակը ղրկեց, և ազատեց զիս Հերովդէսի ձեռքէն ու Հրէից ժողովուրդին բոլոր ակնկալութենէն: 12Եւ մտածելով` եկաւ Մարկոս ըսուած Յովհաննէսի մօրը Մարիամի տունը, ուր շատեր ժողվուած աղօթք կ’ընէին: 13Եւ տանը դուրսի դուռը երբ զարկաւ, Հռովդէ անունով աղախին մը գնաց ականջ դնելու. 14Ու երբ Պետրոսի ձայնը ճանչցաւ, ուրախութենէն դուռը չբացաւ, հապա ներս վազելով պատմեց թէ Պետրոս դրանը առջև կայներ է: 15Իսկ անոնք ըսին անոր, Խենթեցեր ես. բայց ինք կը պնդէր թէ այնպէս է. անոնք ալ կ’ըսէին, Անոր հրեշտակը պիտի ըլլայ: 16Սակայն Պետրոս անդադար կը զարնէր. ու երբ բացին, զինք տեսնելով ապշեցան: 17Բայց անիկա ձեռքով նշան կ’ընէր անոնց` որ լուռ կենան, ու պատմեց անոնց թէ ի՛նչպէս Տէրը զինք բանտէն հանեց. և ըսաւ, Ասիկա Յակոբոսի ու եղբայրներուն պատմեցէք. և ելաւ ուրիշ տեղ գնաց: 18Ու երբ առտու եղաւ, մեծ խռովութիւն կար զինուորներուն մէջ` թէ արդեօք ի՛նչ եղաւ Պետրոս: 19Հերովդէս ալ երբ ուզեց զանիկա ու չգտաւ, պահապաններուն հարցուփորձ ընելով` հրաման ըրաւ որ սպաննուին. և ինք Հրէաստանէ Կեսարիա իջաւ, ու հոն կը կենար:

Հերովդէսին մահը

20Եւ Հերովդէս խիստ թշնամացած էր Տիւրացիներուն ու Սիդոնացիներուն հետ. անոնք ալ միաբանութեամբ իրեն եկան, ու թագաւորին Բղաստոս սենեկապետը համոզելով` հաշտութիւն կը խնդրէին. վասն զի իրենց երկիրը թագաւորին երկրէն ապրուստ կ’առնէր: 21Եւ որոշուած օր մը Հերովդէս թագաւորական հանդերձը հագած ու ատեանը նստած` անոնց ատենաբանութիւն կ’ընէր: 22Ժողովուրդն ալ կ’աղաղակէր թէ Ատիկա Աստուծոյ ձայն է` ու ոչ թէ մարդու: 23Եւ իսկոյն Տէրոջը հրեշտակը զանիկա զարկաւ, Աստուծոյ փառք չտալուն համար. և որդնալից ըլլալով մեռաւ: 24Եւ Աստուծոյ խօսքը կ’աճէր ու կը շատնար: 25Եւ Բառնաբաս ու Սօղոս երբ իրենց յանձնուած պաշտօնը լմնցուցին, Երուսաղէմէ դարձան, Մարկոս ըսուած Յովհաննէսն ալ իրենց հետ առնելով: