Իկոնիոնի մէջ

1Ու եղաւ որ Իկոնիոնի մէջ անոնք մէկտեղ Հրեաներուն ժողովարանը մտան, և այնպէս խօսեցան որ խիստ շատ Հրեաներ և Յոյներ հաւատացին: 2Բայց չհաւատացող Հրեաները դրդեցին ու չարութեան գրգռեցին հեթանոսներուն սիրտը եղբայրներուն դէմ: 3Իսկ անոնք շատ ժամանակ հոն կենալով` համարձակ կը քարոզէին Տէրոջմով, որ իր շնորհաց խօսքին կը վկայէր, և նշաններ ու հրաշքներ ընել կու տար անոնց ձեռքով: 4Եւ քաղաքին բազմութեանը մէջ երկպառակութիւն մը եղաւ. ոմանք Հրեաներուն կողմէն եղան, ոմանք ալ առաքեալներուն: 5Ու երբ հեթանոսները և Հրեաները իրենց իշխաններովը անոնց վրայ յարձակեցան` զանոնք նախատելու ու քարկոծելու: 6Իրենք իմանալով Լիկայոնացւոց քաղաքները փախան, Լիւստրա և Դերբէ և շրջակայ տեղերը, ու հոն աւետարանը կը քարոզէին:

Լիւստրայի և Դերբէի մէջ

7Եւ Լիւստրայի մէջ մարդ մը նստեր էր ոտքերովը տկար` իր մօրը որովայնէն կաղ ծնած, որ բնաւ քալած չէր: 8Ասիկա Պօղոսի խօսքերը մտիկ կ’ընէր, ան ալ աչքը անոր տնկելով և տեսնելով թէ բժշկուելու հաւատք ունի, 9Բարձր ձայնով մը ըսաւ, Ելիր ոտքերուդ վրայ շիտակ կայնէ. ան ալ ցաթկելով կը քալէր: 10Եւ ժողովուրդները երբ Պօղոսի ըրածը տեսան, ձայներնին վերցնելով Լիկայոնարէն ըսին, Աստուածները մարդոց նմանութիւնովը մեզի իջեր են: 11Ու Բառնաբասի Դիոս կը կոչէին, և Պօղոսի` Հերմէս, վասն զի անիկա էր գլխաւոր խօսողը: 12Իսկ քաղաքին առջև եղած Դիոսի քուրմը ցուլեր և պսակներ բերելով դռներուն առջև, բազմութեանը հետ մէկտեղ կ’ուզէր որ զոհ ընէ: 13Բայց Բառնաբաս ու Պօղոս առաքեալները երբ լսեցին, իրենց հանդերձները պատռելով` դուրս ցաթկեցին բազմութեանը մէջ, կ’աղաղակէին, 14Ու կ’ըսէին, Մարդիկ, ինչո՞ւ համար այդ բաները կ’ընէք. մենք ալ ձեզի պէս կիրքեր ունեցող մարդիկ ենք, ու կը քարոզենք ձեզի որ այդ փուճ բաներէն կենդանի Աստուծոյն դառանք, որ ստեղծեց երկինքը ու երկիրը և ծովը ու բոլոր անոնց մէջ եղածները: 15Որ անցած դարերուն մէջ թող տուաւ ամէն ազգերուն իրենց ճամբաները երթալու: 16Այսու ամենայնիւ ինքզինք առանց վկայութեան չթողուց, բարերարութիւնով երկինքէն մեզի անձրևներ ու պտղաբեր եղանակներ տալով, կերակուրներով և ուրախութիւնով մեր սիրտերը լեցնելով: 17Ու այս բաները ըսելով` հազիւ կրցան ժողովուրդները դադարեցնել, որ իրենց զոհ չընեն: 18Սակայն Անտիոքէ ու Իկոնիոնէ Հրեաներ հասան. ու ժողովուրդները համոզեցին, և Պօղոսը քարկոծեցին ու քաղաքէն դուրս քաշեցին` կարծելով թէ մեռած է: 19Բայց աշակերտները երբ անոր բոլորտիքը պատեցին, ելաւ քաղաքը մտաւ, ու հետևեալ օրը Բառնաբասի հետ մէկտեղ Դերբէ ելաւ:

Վերադարձ Սուրիոյ Անտիոք

20Եւ անոնք այն քաղաքին մէջ աւետարանը քարոզելով, ու շատերը աշակերտ ընելով` Լիւստրա և Իկոնիոն և Անտիոք դարձան: 21Աշակերտներուն սիրտերը հաստատելով, և յորդորելով որ հաստատ մնան հաւատքի մէջ. և կ’ըսէին թէ շատ նեղութիւններով պէտք է մեզի Աստուծոյ թագաւորութիւնը մտնել: 22Ու երբ անոնց ամէն մէկ եկեղեցիին երէցներ ձեռնադրեցին, ծոմապահութեամբ աղօթք ընելով զանոնք յանձնեցին Տէրոջը` որու հաւատացեր էին: 23Եւ Պիսիդիայի մէջէն պտըտելով` եկան Պամփիւլիա: 24Պերգէի մէջ ալ Տէրոջը խօսքը խօսելէ ետև Ատալիա իջան: 25Անկէ ալ նաւով Անտիոք գացին, ուրկէ Աստուծոյ շնորհքին յանձնուած էին այն գործին համար զոր կատարեցին: 26Ու երբ եկան, եկեղեցին մէկտեղ ժողվելով` պատմեցին ինչ որ Աստուած ըրեր էր իրենց հետ, և որ հեթանոսներուն հաւատքի դուռ բացեր էր: 27Ու հոն շատ ժամանակ աշակերտներուն հետ կեցան: