Թեսաղոնիկէի մէջ

1Եւ Ամփիպոլիսէ ու Ապողոնիայէ պտըտելով` Թեսաղոնիկէ եկան, ուր էր Հրեաներուն ժողովարանը: 2Պօղոս ալ իր սովորութեանը պէս անոնց մէջ մտաւ, և երեք շաբաթ օր խօսեցաւ անոնց հետ գիրքերէն, 3Մեկնելով և անոնց առջև դնելով թէ պէտք էր Քրիստոսի չարչարուիլ, ու մեռելներէն յարութիւն առնել, և թէ Այն Յիսուսը զոր ես ձեզի կը քարոզեմ, ըսաւ, Քրիստոսն է: 4Եւ անոնցմէ ոմանք հաւատացին ու Պօղոսի և Շիղայի հետ միացան. աստուածավախ Յոյներէն ալ մեծ բազմութիւն, ու երևելի կիներէն ալ հաւատացողները քիչուոր չէին: 5Բայց չհաւատացող Հրեաները նախանձեցան, և քանի մը դատարկապորտ անօրէն մարդիկ առնելով` աղմուկ հանեցին ու քաղաքը տակնուվրայ ըրին, և Յասոնի տանը վրայ յարձակելով` կ’ուզէին զանոնք ժողովքին առջև տանիլ: 6Ու երբ զանոնք չգտան, Յասոնը ու մէկ քանի եղբայրներ քաշելով տարին քաղաքապետներուն առջև, կանչուըռտելով թէ Անոնք որ աշխարհը տակնուվրայ ըրին` հոս ալ հասեր են. 7Զորոնք Յասոն ընդուներ է. և ասոնք ամէնը Կայսրին հրամաններուն դէմ կը գործեն, ըսելով թէ ուրիշ թագաւոր մը կայ Յիսուս: 8Եւ խռովեցուցին ժողովուրդը ու քաղաքապետները, որոնք այս բաները կը լսէին: 9Բայց երբ Յասոնէ և ուրիշներէն երաշխաւորութիւն առին, արձակեցին զանոնք:

Բերիայի և Աթէնքի մէջ

10Իսկ եղբայրները շուտ մը գիշերով Պօղոսը և Շիղան Բերիա ղրկեցին. որոնք հոն հասնելով` Հրէից ժողովարանը գացին: 11Ասոնք Թեսաղոնիկէի մէջ եղողներէն աւելի ազնիւ մարդիկ էին, որոնք Աստուծոյ խօսքը կատարեալ յօժարութեամբ ընդունեցին, և ամէն օր գիրքերը կը քննէին թէ այս բաները այսպէ՞ս են: 12Ուստի անոնցմէ շատերը հաւատացին. և պատուաւր Յոյն կիներէն ու այրերէն հաւատացողներն ալ քիչուոր չէին: 13Բայց երբ իմացան Թեսաղոնիկեցի Հրեաները թէ Բերիայի մէջ ալ Աստուծոյ խօսքը քարոզուեցաւ Պօղոսէ, հոն ալ եկան ու ժողովուրդը գրգռեցին: 14Այն ատեն եղբայրները շուտ մը Պօղոսը ղրկեցին` որ մինչև ծովեզերքը երթայ. բայց Շիղա ու Տիմոթէոս հոն մնացին: 15Եւ անոնք որ Պօղոսը կը տանէին, մինչև Աթէնք բերին զանիկա. և իրմէ հրաման առնելով Շիղայի ու Տիմոթէոսի համար որ շուտով իրեն գան, գացին: 16Եւ Պօղոս Աթէնքի մէջ անոնց սպասելով` իր հոգին անհանգիստ էր ներսիդին, վասն զի քաղաքը բոլորովին կռապաշտութեան մէջ ընկղմած կը տեսնէր: 17Ուստի ժողովարանին մէջ կը խօսէր Հրեաներուն ու բարեպաշտ մարդոց, և ամէն օր հրապարակներուն մէջ` որոնց պատահէր: 18Ու Եպիկուրեան և Ստոյիկեան փիլիսոփաներէն մէկ քանիները իրեն հետ հակաճառութիւն կ’ընէին. և ոմանք կ’ըսէին, Այս սերմանաքաղը ի՞նչ ըսել կ’ուզէ. ուրիշներն ալ կ’ըսէին, Կ’երևի թէ օտար աստուածներու քարոզիչ է. վասն զի Յիսուսը ու յարութիւնը կ’աւետարանէր անոնց: 19Եւ առին զանիկա Արիսպագոս տարին ու կ’ըսէին, Կրնա՞նք իմանալ թէ ի՛նչ է այդ նոր վարդապետութիւնը զոր դուն կը զրուցես. 20Քանզի մեր ականջներուն օտար բաներ կը բերես. ուրեմն կ’ուզենք իմանալ թէ ի՛նչ պիտի ըլլան անոնք. 21(Վասն զի Աթենացիները ամէնն ալ, ու հոն կեցող օտարականները ուրիշ բանի չէին պարապեր, բայց միայն նոր բան զրուցելու կամ լսելու:) 22Այն ատեն Պօղոս Արիսպագոսի մէջ կայնեցաւ ու ըսաւ, Ով Աթենացի մարդիկ, ամէն կողմանէ խիստ կրօնասէր կը տեսնեմ ձեզ: 23Քանզի ես պտըտելով ու ձեր պաշտամունքը զննելով` սեղան մը գտայ, որուն վրայ գրուած էր, ԱՆԾԱՆՕԹ ԱՍՏՈՒԾՈՅՆ. ուստի զանիկա զոր դուք չճանչնալով կը պաշտէք, ես նոյնը ձեզի կը քարոզեմ: 24Աստուած որ աշխարհը ստեղծեց, և անոր մէջի բոլոր բաները. անիկա երկինքի ու երկրի Տէրն ըլլալով` ոչ ձեռագործ տաճարներու մէջ կը բնակի, 25Ոչ ալ մարդոց ձեռքով կը պաշտուի` բանի մը կարօտի պէս. քանզի ինք կու տայ ամէնուն կեանք ու շունչ և ամէն բան. 26Ու բոլոր մարդոց ազգերը մէկ արիւնէ ըրաւ, որպէս զի բոլոր երկրի երեսին վրայ բնակին. և որոշուած ժամանակներ հաստատեց, ու անոնց բնակութեան սահմանները` զԱստուած փնտռելու. 27Որ ըլլայ թէ խարխափելով զինք գտնեն. թէպէտև մեր ամէն մէկէն ալ հեռու չէ. 28Վասն զի անով կ’ապրինք և կը շարժինք ու կանք, ինչպէս ձեր բանաստեղծներէն մէկ քանիներն ալ ըսին, Քանզի մենք անոր ցեղէն ալ ենք: 29Ուստի, որովհետև Աստուծոյ ցեղէն ենք, պէտք չէ որ այնպէս սեպենք թէ Աստուածութիւնը նման ըլլայ ոսկիի կամ արծաթի կամ քարի, որ մարդու վարդապետութիւնով ու խելքով քանդակուած է: 30Արդ Աստուած տգիտութեան ատենները անտես ընելով` հիմա ամէն տեղ կը պատուիրէ բոլոր մարդոց որ ապաշխարեն: 31Վասն զի ինք օր մը սահմանեց, որուն մէջ աշխարհս արդարութեամբ պիտի դատէ այն մարդուն ձեռքով` զոր որոշեց, ու ամէնուն հաւատացուց` զանիկա մեռելներէն յարուցանելով: 32Երբ մեռելներուն յարութիւնը լսեցին, ոմանք ծաղր կ’ընէին, ոմանք ալ կ’ըսէին, Այդ բանին համար ուրիշ անգամ մտիկ պիտի ընենք քեզի: 33Եւ այսպէս Պօղոս անոնց մէջէն ելաւ: 34Սակայն քանի մը մարդիկ իրեն յարելով հաւատացին, որոնց մէջ էր Դիոնեսիոս Արիսպագացի և Դամարիս անունով կին մը, ու անոնց հետ ուրիշներ ալ: