Պօղոս Եփեսոսի մէջ

1Եւ քանի որ Ապողոս Կորնթոսի մէջ էր, Պօղոս վերի կողմերը պտըտելով Եփեսոս եկաւ, և քանի մը աշակերտներ գտնելով` 2Ըսաւ անոնց, Երբ հաւատացիք, Սուրբ Հոգին առի՞ք արդեօք. անոնք ալ ըսին իրեն, Բայց մենք լսած ալ չենք թէ Սուրբ Հոգի կայ: 3Եւ ըսաւ անոնց, Հապա ինչո՞վ մկրտուեցաք. անոնք ալ ըսին, Յովհաննէսի մկրտութիւնովը: 4Պօղոս ալ ըսաւ, Յովհաննէս ապաշխարութեան մըկըրտութիւնով մկրտեց, ժողովուրդին ըսելով թէ ան որ իրմէ ետքը պիտի գայ` անոր հաւատան, այսինքն Քրիստոս Յիսուսի: 5Ու երբ զայս լսեցին, Տէր Յիսուսի անունովը մկրտուեցան: 6Եւ Պօղոս երբ անոնց վրայ ձեռք դրաւ, Սուրբ Հոգին անոնց վրայ եկաւ, և լեզուներ կը խօսէին ու կը մարգարէանային: 7Եւ այն բոլոր մարդիկը տասուերկուքի չափ էին: 8Ու ժողովարանը մտնելով` երեք ամիս համարձակութեամբ Աստուծոյ թագաւորութեանը վրայով կը խօսէր ու կը համոզէր: 9Իսկ երբ մէկ քանիները կը յամառէին ու դէմ կը դնէին` բազմութեան առջև այն ճամբան բամբասելով, ինք անոնցմէ հեռացաւ և աշակերտները զատեց, ու ամէն օր Տիւրան անուն մէկուն դպրատանը մէջ կը խօսէր: 10Եւ ասիկա երկու տարի տևեց, մինչև բոլոր Ասիայի մէջ բնակող Հրեաները ու Յոյները Տէրոջը խօսքը լսեցին:

Սկևիային որդիները

11Եւ Աստուած նշանաւոր հրաշքներ կ’ընէր Պօղոսի ձեռքով. 12Այնպէս որ անոր մարմինէն թաշկինակներ ու գոգնոցներ կը տանէին հիւանդներուն, և իրենց ցաւերէն կը բժշկուէին, ու չար ոգիները կ’ելլէին: 13Բայց աստանդական Հրեաներէն մէկ քանիները, որոնք երդմնեցուցիչ էին, յանդգնեցան Տէր Յիսուսի անունը կանչել անոնց վրայ որոնք չար ոգիներ ունէին, և կ’ըսէին, Ձեզ կ’երդմնցնենք Յիսուսով, զոր Պօղոս կը քարոզէ: 14Եւ այս բանը ընողները Սկևա ըսուած Հրեայ քահանայապետի մը եօթը որդիներն էին: 15Իսկ չար ոգին պատասխան տուաւ ու ըսաւ, Յիսուսը կը ճանչնամ ու Պօղոսը գիտեմ, բայց դուք ո՞վ էք: 16Եւ այն մարդը որուն ներսիդին էր չար ոգին, անոնց վրայ ցաթկելով` բռնեց զանոնք ու յաղթեց, մինչև որ այն տունէն մերկ ու վիրաւորուած դուրս փախան: 17Եւ այս բանը Եփեսոսի մէջ բնակող բոլոր Հրեաներուն ու Յոյներուն յայտնի եղաւ. և անոնց ամէնուն վրայ վախ մը ինկաւ, ու Տէր Յիսուսի անունը կը մեծարուէր: 18Եւ հաւատացեալներէն շատերը կու գային, ու կը խոստովանէին ու կը պատմէին իրենց ըրածները: 19Եւ կախարդութեան հետևողներուն շատերը գիրքերնին մէկտեղ բերելով` ամէնուն առջև կ’այրէին. և անոնց գինը հաշուեցին ու յիսուն հազար արծաթ դահեկան գտան: 20Այսպէս Տէրոջը խօսքը մեծապէս կ’աճէր և կը զօրանար:

Եփեսոսի մէջ խռովութիւն

21Ու երբ այս բաները լմնցան, Պօղոս միտքը դրաւ որ Մակեդոնիայէ ու Աքայիայէ պտըտելով` Երուսաղէմ երթայ. ու կ’ըսէր թէ Հոն երթալէս ետքը պէտք է ինծի որ Հռովմ ալ տեսնեմ: 22Եւ իրեն սպասաւորութիւն ընողներէն երկուքը, Տիմոթէոսը ու Երաստոսը, ղրկեց Մակեդոնիա, ու ինք ատեն մըն ալ Ասիայի մէջ կեցաւ: 23Եւ այն ատենները շատ խռովութիւն եղաւ Տէրոջը ճամբուն համար: 24Քանզի Դեմետրիոս անունով արծաթագործ մը Արտեմիսի փոքրիկ տաճարներ կը շինէր արծաթէ, ու քիչ շահ չէր բերեր վարպետներուն. 25Զորոնք ասիկա մէկտեղ ժողվեց նոյն արհեստին բանուորներուն հետ, ու ըսաւ, Մարդիկ, դուք գիտէք որ այս գործէն է մեր շահը. 26Եւ կը տեսնէք ու կը լսէք որ այս Պօղոսը ոչ միայն Եփեսացւոց, հապա գրեթէ բոլոր Ասիացւոց շատ ժողովուրդները համոզելով` միտքերնին դարձուց, ըսելով թէ Ձեռքով շինուածները աստուածներ չեն: 27Ուստի վտանգ կայ որ ոչ միայն այս մեր կողմը պիտի նախատուի, հապա մեծ աստուածուհւոյն, Արտեմիսի, տաճարն ալ ոչինչ պիտի սեպուի, և անոր մեծափառութիւնը պիտի խափանուի, զոր բոլոր Ասիա ու աշխարհ կը պաշտեն: 28Ու երբ զայս լսեցին, բարկութեամբ լեցուած կը կանչուըռտէին ու կ’ըսէին, Մեծ է Եփեսացւոց Արտեմիսը: 29Եւ բոլոր քաղաքը խռովութեամբ լեցուեցաւ. և յափշտակելով Գայիոս ու Արիստարքոս Մակեդոնացիները, Պօղոսի ճանապարհորդակիցները, ամէնը մէկէն թէատրոնը վազեցին: 30Իսկ Պօղոս երբ ուզեց ժողովուրդին մէջ մտնել, աշակերտները թող չտուին զինք: 31Ասիապետներէն ալ ոմանք որոնք իր բարեկամներն էին, մարդ ղրկելով իրեն` կ’աղաչէին որ չհամարձակի թէատրոնը երթալ: 32Ուստի մէկը մէկ կերպ ու միւսը ուրիշ կերպ բան կը կանչուըռտէին, վասն զի ժողովքը շփոթութեան մէջ էր, և շատերը չէին գիտեր թէ ի՛նչ բանի համար ժողվուած են: 33Եւ բազմութեանը մէջէն յառաջ բերին Աղեքսանդրոսը, զոր Հրեաները յառաջ քշեցին. Աղեքսանդրոս ալ ձեռքը շարժելով` կուզէր որ ժողովուրդին պատասխան տայ: 34Իսկ երբ գիտցան թէ անիկա Հրեայ է, ամէնը մէկ բերան եղած` երկու ժամու չափ կը կանչուըռտէին թէ Մեծ է Եփեսացւոց Արտեմիսը: 35Սակայն ատենադպիրը բազմութիւնը հանդարտեցնելով` ըսաւ, Ով Եփեսացի մարդիկ, ո՞ր մարդն է որ չգիտնայ թէ Եփեսացւոց քաղաքը մեծ Արտեմիսի և Դիոսէ ինկած կուռքին տաճարին պաշտօնեան է: 36Ուրեմն այս որ անվիճելի բան մըն է, պէտք է ձեզի հանդարտ կենալ, և յանդգնութեամբ բան մը չընել: 37Քանզի դուք այդ մարդիկը հոս բերիք, որոնք ոչ տաճար կողոպտողներ են, ոչ ալ ձեր աստուածուհւոյն հայհոյանք ըրեր են: 38Ուստի եթէ Դեմետրիոս և իրեն հետ եղած վարպետները մէկուն հետ բան մը ունին, դատի օրեր կան ու փոխանորդ բդեշխ կայ. թող իրարու դէմ ամբաստանութիւն ընեն. 39Իսկ եթէ ուրիշ բաներու համար է ձեր պահանջմունքը, օրինաւոր ժողովքի մէջ թող որոշուի: 40Վասն զի մենք ալ այսօրուան եղածին համար իբրև խռովայոյզ մարդիկ ամբաստանուելու վտանգի մէջ ենք, քանզի պատճառ մը չկայ որով կարող ըլլանք այս խառնամբոխ բազմութեանը համար պատասխան տալ: Եւ այսպէս ըսելով ժողովքը արձակեց: