Պօղոս հրեաներէն կ’ամբաստանուի

1Եւ հինգ օրէ ետքը Անանիա քահանայապետը ծերերուն հետ ու Տերտիւղոս անուն ճարտասանի մը հետ իջաւ. և ասոնք կուսակալին իմացուցին իրենց ամբաստանութիւնը Պօղոսի դէմ: 2Ու երբ կանչեցին զանիկա, Տերտիւղոս սկսաւ ամբաստանել ու ըսել, Որովհետև քու ձեռքովդ շատ խաղաղութիւն, ու քու խնամքովդ այս ազգին բաներուն աղէկ կարգադրութիւնը կը վայելենք: 3Ամէն կերպով ու ամէն տեղ բոլորովին գոհ ըլլալով, շնորհակալ ենք, ով պատուական Փելիքս: 4Բայց չըլլայ որ ալ աւելի ձանձրութիւն տամ քեզի, կ’աղաչեմ որ քու քաղցրութիւնովդ մեզի ականջ դնես, որ համառօտաբար պիտի խօսինք: 5Վասն զի մենք այս մարդը գտանք ապականիչ և խռովարար բոլոր Հրեաներուն որոնք աշխարհի մէջ են, և Նազովրեցւոց աղանդին առաջնորդ. 6Որ տաճարն ալ ուզեց պղծել. զոր բռնեցինք ու մեր օրէնքին համեմատ ուզեցինք դատաստանը ընել. 7Բայց Լիւսիաս հազարապետը եկաւ մեծ բռնութեամբ մեր ձեռքէն առաւ, 8Եւ հրաման ըրաւ որ անոր դատախազները քեզի գան, զոր դուն քննելով` կարող պիտի ըլլաս տեղեկանալ այն ամէն բաներուն, որոնց համար մենք ամբստանութիւն կ’ընենք ատոր վրայ: 9Հրեաներն ալ ամէնը մէկ եղած` ըսին թէ այդպէս է:

Պօղոսին պաշտպանողականը Փելիքսին առջև

10Պատասխան տուաւ Պօղոս, (երբ կուսակալը անոր աչք ըրաւ որ խօսի,) Գիտնալով որ շատ տարիներէ հետէ դուն այս ազգին դատաւորն ես, աւելի յօժարութեամբ ինծի վերաբերեալ բաներուն համար պատասխան կու տամ. 11Որովհետև կրնաս գիտնալ որ ես տասուերկու օրէ աւելի չէ` քանի որ Երուսաղէմ ելայ երկրպագութիւն ընելու: 12Եւ զիս տաճարին մէջ մէկո՛ւն հետ վիճաբանութիւն ընելու վրայ, կամ բազմութիւնը մէկտեղ ժողված չգտան, ոչ ալ ժողովարաններուն մէջ, 13Եւ ոչ քաղաքին մէջ. ոչ ալ կրնան ապացուցանել այն բաները, որոնց համար հիմա ամբաստանութիւն կ’ընեն ինծի դէմ: 14Բայց զայս կը խոստովանիմ քեզի` թէ այն ճամբուն համեմատ զոր ասոնք հերձուած կ’ըսեն, ես այնպէս կը պաշտեմ իմ հայրենի Աստուածս, հաւատալով այն ամէն բաներուն որոնք օրէնքին և մարգարէներուն մէջ գրուած են. 15Եւ յոյս ունիմ առ Աստուած, ինչպէս ասոնք ալ ակնկալութիւն ունին, որ մեռելներու յարութիւն պիտի ըլլայ, թէ՛ արդարներուն և թէ՛ մեղաւորներուն: 16Եւ ես այս բանին համար կը ջանամ, որ ամէն ատեն մաքուր խղճմտանք ունենամ Աստուծոյ առջև ու մարդոց առջև: 17Արդ ես շատ տարիներէ ետև եկայ իմ ազգիս ողորմութիւններ բերելու ու ընծաներ տալու. 18Այսպէս քանի մը Ասիացի Հրեաներ զիս տաճարին մէջ մաքրուած գտան, ոչ բազմութիւնով և ոչ ամբոխով, 19Որոնց պէտք էր առջևդ գալ ու ամբաստանութիւն ընել, եթէ իմ վրայովս ըսելու բան մը ունէին: 20Կամ թէ ասոնք իրենք թող ըսեն, ի՛նչ անիրաւութիւն գտան իմ վրաս, երբ ատեանը կայներ էի. 21Միայն թէ այս մէկ խօսքիս համար, որ երբ իրենց մէջ կայներ էի, կանչեցի թէ Մեռելներու յարութեանը համար ես այսօր ձեզմէ կը դատուիմ: 22Եւ Փելիքս ուրիշ անգամի թողուց զանոնք, վասն զի աղէկ տեղեկութիւն ունէր այն ճամբուն վրայով. ու ըսաւ, Երբ Լիւսիաս հազարապետը հոս իջնէ, պիտի քննեմ ձեր գործը: 23Եւ հարիւրապետին հրաման ըրաւ որ զանիկա պահէ, և ընդարձակութիւն տայ, ու իրեններէն մէ՛կը չարգիլէ անոր սպասաւորութիւն ընելէ կամ անոր քով երթալէ:

Պօղոս Փելիքսին առջև

24Եւ քանի մը օրէն ետև Փելիքս եկաւ իր Դրուսիղա կնոջ հետ որ Հրեայ էր. ու Պօղոսը կանչել տուաւ, և լսեց անկէ այն հաւատքին համար որ Քրիստոս Յիսուսի վրայ է: 25Ու երբ անիկա արդարութեան ու ժուժկալութեան և գալու դատաստանին վրայով կը խօսէր, Փելիքս զարհուրելով պատասխան տուաւ, Դուն հիմա գնա, ու երբ ժամանակ ունենամ, ես քեզ նորէն կը կանչեմ: 26Նաև յոյս ունէր որ Պօղոսի կողմէն իրեն ստակ տրուի, անոր համար շատ անգամ կանչել կու տար զանիկա ու անոր հետ կը խօսակցէր: 27Բայց երբ երկու տարի եղաւ, Փելիքսի տեղ Պորկիոս Փեստոս եկաւ. Փելիքս ալ Հրեաներուն շնորհք ընել ուզելով` Պօղոսը կապուած թողուց: