Պօղոսին ինքնապաշտպանութիւնը Ագրիպպասի առջև

1Եւ Ագրիպպաս ըսաւ Պօղոսի, Հրաման է քեզի որ դուն քեզի համար խօսիս: Այն ատեն Պօղոս ձեռքը երկնցնելով` իրեն համար պատասխան տուաւ. 2Հրեաներուն իմ վրաս ըրած բոլոր ամբաստանութիւններուն համար, ով Ագրիպպաս արքայ, ես զիս երանելի կը սեպեմ, որ այսօր քու առջևդ պատասխան պիտի տամ. 3Մանաւանդ որ դուն Հրեաներուն բոլոր սովորութիւնները և խնդիրները աղէկ գիտես, անոր համար կ’աղաչեմ որ երկայնմտութեամբ ինծի մտիկ ընես: 4Արդ իմ մանկութենէս ի վեր իմ ինչպէս ապրելուս, սկիզբէն Երուսաղէմ իմ ազգիս մէջ ըլլալովս, բոլոր Հրեաները տեղեակ են: 5Քանզի առաջուընէ ի վեր զիս գիտեն, (եթէ ուզեն վկայել,) որ մեր կրօնքին ամէնէն զգուշաւոր ճամբուն պէս` փարիսեցի ապրեր եմ. 6Եւ հիմա ատեանը կեցեր կը դատուիմ Աստուծմէ մեր հայրերուն եղած խոստմունքին յոյսին համար. 7Որու, մեր տասուերկու ցեղը անդադար գիշեր ու ցորեկ պաշտելով, կը յուսան հասնիլ. ես այս յոյսին համար Հրեաներէն կ’ամբաստանուիմ, ով Ագրիպպաս արքայ: 8Ի՞նչ. չհաւատալո՞ւ բան կ’երևնայ ձեզի թէ Աստուած մեռելները կը յարուցանէ: 9Ես ինքս ալ ինծի պարտք կը սեպէի Յիսուս Նազովրեցիի անուան դէմ շատ բաներ ընել. 10Զոր ըրի ալ Երուսաղէմի մէջ, և քահանայապետներէն իշխանութիւն առած սուրբերէն շատերը բանտարկեցի, ու անոնց սպաննուած ատենը հաւանութիւն տուի: 11Եւ բոլոր ժողովարաններուն մէջ շատ անգամ զանոնք պատժելով` կը բռնադատէի որ հայհոյեն, և անոնց դէմ սաստիկ կատղած` մինչև օտար քաղաքները կը հալածէի:

Պօղոս իր դարձը կը պատմէ

12Այսպէս երբ Դամասկոս ալ կ’երթայի, քահանայապետներէն իշխանութիւն ու հրաման առած: 13Կէսօրուան ատենը ճամբուն վրայ, ով արքայ, երկինքէն լոյս մը տեսայ արևին լուսաւորութենէն աւելի` բոլորտիքս ծագած, նաև անոնց բոլորտիքը որոնք ինծի հետ կ’երթային: 14Ու երբ մենք ամէնս գետինը ինկանք, ձայն մը լսեցի որ Եբրայական լեզուով ինծի կ’ըսէր, Սաւուղ, Սաւուղ, ինչո՞ւ զիս կը հալածես. դժուար բան է քեզի խթանի դէմ կից զարնել: 15Ես ալ ըսի, Դուն ո՞վ ես, Տէր. և անիկա ըսաւ, Ես եմ Յիսուս զոր դուն կը հալածես. 16Բայց ելիր ու ոտքիդ վրայ կայնէ. վասն զի ասոր համար քեզի երևցայ, որ քեզ ձեռք առնեմ պաշտօնեայ և վկայ ընելու այն բաներուն զորոնք տեսար, ու այն բաներուն որոնցմով պիտի երևնամ քեզի, 17Քեզ ազատելով այդ ժողովուրդէն ու հեթանոսներէն, որոնց հիմա քեզ կը ղրկեմ, 18Անոնց աչքերը բանալու, խաւարէն լոյսի, ու սատանայի իշխանութենէն Աստուծոյ դարձնելու, որպէս զի անոնք մեղքերու թողութիւն առնեն, և սուրբերուն հետ մասնակից ըլլան ինծի հաւատալով:

Պօղոս կատարած գործը կը պատմէ

19Ուստի, Ագրիպպաս արքայ, այն երկնային տեսիլքին անհնազանդ չեղայ ես. 20Հապա առաջ Դամասկոս ու Երուսաղէմ եղողներուն, և բոլոր Հրէաստանի երկիրը ու հեթանոսներուն քարոզեցի որ ապաշխարեն ու Աստուծոյ դառնան. և ապաշխարութեան արժանաւոր գործեր գործեն: 21Այս պատճառաւ Հրեաները զիս տաճարին մէջ բռնեցին, և կը ջանային որ սպաննեն: 22Սակայն Աստուծմէ օգնութիւն հասնելով մինչև այսօր ողջ մնացի` պզտիկի ու մեծի վկայութիւն տալով, բան մը չզրուցելով այն բաներէն դուրս` զորոնք մարգարէները և Մովսէս խօսեցան թէ պիտի ըլլային. 23Թէ Քրիստոս պիտի չարչարուէր, և թէ անիկա ամէնէն առաջ մեռելներէն յարութիւն առած` լոյս պիտի քարոզէր ժողովուրդին ու հեթանոսներուն: 24Եւ քանի որ անիկա այսպէս պատասխան կու տար իրեն համար, Փեստոս բարձր ձայնով մը ըսաւ, Կը խելագարիս, Պօղոս. շատ կարդացողութիւնդ քեզ կը յիմարեցնէ: 25Պօղոս ալ ըսաւ, Ես չեմ խելագարիր, Ով պատուական Փեստոս, հապա ճշմարտութեան և զգաստութեան խօսքեր կը զրուցեմ: 26Քանզի այս բաները թագաւորը գիտէ, որուն առջև ես ալ համարձակ կը խօսիմ. քանզի չեմ կարծեր թէ ասոնցմէ բան մը անկէ ծածկուած ըլլայ, վասն զի այս բանը անկիւնի մը մէջ եղած չէ: 27Մարգարէներուն կը հաւատա՞ս, Ագրիպպաս արքայ. գիտեմ որ կը հաւատաս: 28Եւ Ագրիպպաս ըսաւ Պօղոսի, Քիչ մնաց որ զիս համոզես Քրիստոնեայ ըլլալու: 29Պօղոս ալ ըսաւ, Աստուծմէ կը խնդրէի որ թէ՛ քիչով և թէ՛ շատով, ոչ թէ միայն դուն, հապա ամէնն ալ որոնք այսօր ինծի կը լսեն, այնպէս ըլլան ինչպէս ես եմ, այս կապերէն զատ: 30Ոտքի վրայ ելաւ թագաւորը և կուսակալը ու Բերինիկէ, և անոնք որ իրենց հետ նստեր էին: 31Ու դուրս ելլելէ ետև, իրարու հետ խօսեցան ու ըսին թէ Այս մարդը մեռնելու կամ կապուելու արժանի բան մը չըներ: 32Ագրիպպաս ալ Փեստոսի ըսաւ, Կարելի էր այս մարդը արձակել, եթէ Կայսրին բողոքած չըլլար: