Կաղը բժշկուեցաւ

1Արդ Պետրոս ու Յովհաննէս իններորդ ժամու աղօթքին ատենը մէկտեղ տաճարը կ’ելլէին: 2Եւ իր մօրը որովայնէն կաղ ծնած մարդ մը կը բերուէր, զոր ամէն օր տաճարին Գեղեցիկ կոչուած դրանը քով կը դնէին, որպէս զի տաճարը մտնողներէն ողորմութիւն խնդրէ: 3Ասիկա տեսնելով Պետրոսը և Յովհաննէսը որ տաճարը մտնելու վրայ էին, կ’աղաչէր որ ողորմութիւն առնէ: 4Իսկ Պետրոս Յովհաննէսի հետ մէկտեղ անոր նայեցաւ ու ըսաւ, Մեզի նայէ. 5Ան ալ դէպ ի անոնք դարձաւ ու կը յուսար անոնցմէ բան մը առնել: 6Եւ Պետրոս ըսաւ, Արծաթ ու ոսկի չունիմ, հապա ինչ որ ունիմ` զայն քեզի կու տամ. Նազովրեցի Յիսուս Քրիստոսի անունովը ելիր ու քալէ: 7Եւ անոր աջ ձեռքէն բռնեց վերցուց զանիկա, ու իսկոյն անոր ոտքին թաթերը ու կոճերը զօրացան: 8Եւ վեր ցաթկելով կայնեցաւ ու կը քալէր, և անոնց հետ տաճարը մտաւ, քալելով ու ցաթկելով և զԱստուած օրհնելով: 9Ու բոլոր ժողովուրդը տեսաւ զանիկա որ կը քալէր ու կ’օրհնէր զԱստուած. 10Եւ կը ճանչնային թէ անիկա էր, որ ողորմութեան համար տաճարին Գեղեցիկ կոչուած դրանը քով կը նստէր. և զարմանքով ու ապշութեամբ լեցուեցան անոր եղած բանին համար:

Պետրոսին պատգամը տաճարին մէջ

11Եւ քանի որ անիկա Պետրոսի ու Յովհաննէսի յարեր էր, բոլոր ժողովուրդը զարմացած մէկտեղ վազեցին անոնց քով այն սրահը որ Սողոմոնին կ’ըսուէր: 12Զայս տեսնելով Պետրոս` պատասխան տուաւ ժողովուրդին, Ով Իսրայելացի մարդիկ, ինչո՞ւ զարմացեր էք ասոր վրայ, կամ ինչո՞ւ աչքերնիդ տնկած մեզի կը նայիք, որպէս թէ մենք մեր զօրութիւնովը կամ բարեպաշտութիւնովը ատոր քալել տուած ըլլանք: 13Աբրահամի ու Իսահակի և Յակոբի Աստուածը, մեր հայրերուն Աստուածը, փառաւորեց իր Որդին Յիսուսը, զոր դուք մատնեցիք, և ուրացաք Պիղատոսի առջև` երբ ինք վճռեց որ արձակէ: 14Բայց դուք այն Սուրբը և Արդարը ուրացաք, ու խնդրեցիք որ մարդասպան մարդ մը ձեզի շնորհուի. 15Եւ կենաց Առաջնորդը սպաննեցիք, զոր Աստուած մեռելներէն յարուց, որու մենք վկայ ենք. 16Եւ անոր անուանը հաւատքով` անոր անունը հաստատեց ասիկա, զոր դուք կը տեսնէք ու գիտէք. և այն հաւատքը որ անով է` այս առողջութիւնը ատոր տուաւ ձեր ամէնուն առջև: 17Եւ հիմա, եղբայրներ, գիտեմ որ չգիտնալով ըրիք, ինչպէս ձեր իշխաններն ալ: 18Բայց Աստուած ինչ որ առաջուընէ իր բոլոր մարգարէներուն բերնով յայտներ էր Քրիստոսի չարչարուելուն վրայով, այսպէս կատարեց: 19Ուստի ապաշխարեցէք ու դարձի եկէք, որպէս զի մեղքերնիդ ջնջուի. 20Որպէս զի սփոփանաց ժամանակները գան Տէրոջը երեսէն, և առաջուընէ ձեզի քարոզուած* Յիսուս Քրիստոսը ղրկէ. 21Զոր պէտք է որ երկինք ընդունի մինչև այն ատենները` որ ամէն բաները կարգադրուին, որոնց համար Աստուած սկիզբէն ի վեր իր սուրբ մարգարէներուն բերնով խօսած է: 22Մովսէսմեր հայրերուն ըսաւ թէ Ձեր Տէր Աստուածը ձեր եղբայրներէն ինծի պէս մարգարէ մը պիտի հանէ ձեզի. անոր մտիկ ըրէք` ամէն ինչ որ ձեզի խօսի: 23Եւ պիտի ըլլայ թէ ամէն ով որ այն մարգարէին մտիկ չընէ, ժողովուրդին մէջէն պիտի կորսուի: 24Ու բոլոր մարգարէները որոնք Սամուէլէ ի վեր խօսեցան, այս օրերուն համար ալ իմացուցին: 25Դուք էք մարգարէներուն որդիները և այն ուխտին, զոր Աստուած մեր հայրերուն հետ ըրաւ, ու ըսաւ Աբրահամի, Եւ քու սերունդովդ պիտի օրհնուին երկրի բոլոր ազգերը: 26Աստուած իր Որդին յարուցանելով` առաջ ձեզի ղրկեց զանիկա, որպէս զի ձեզ օրհնէ, ամէն մէկդ ձեր չարութիւններէն դարձնելով: