Եօթը օգնականներ

1Եւ այն օրերը երբ աշակերտները շատցան, Հելլենացելոց կողմէն տրտունջ մը եղաւ Եբրայեցւոց դէմ, վասն զի իրենց որբևարիները ամէն օրուան ողորմութեան մատակարարուելուն մէջ անտես կ’ըլլային: 2Եւ տասուերկուքը կանչեցին աշակերտներուն բազմութիւնը ու ըսին, Մեզի չվայլեր Աստուծոյ խօսքը ձգել ու սեղաններու ծառայութիւն ընել: 3Ուստի եղբայրներ, ձեզմէ եօթը հոգի ընտրեցէք` բարի վկայուած, Հոգւով Սրբով և իմաստութիւնով լեցուն, որպէս զի զանոնք այս գործին վրայ դնենք. 4Եւ մենք աղօթքի ու Աստուծոյ խօսքին պաշտօնին պարապինք: 5Եւ այս խօսքը բոլոր բազմութեան առջև հաճոյ երևցաւ. ու ընտրեցին Ստեփանոսը, հաւատքով ու Հոգւով Սրբով լեցուն մարդ մը, ու Փիլիպպոսը, և Պրոքորոնը, ու Նիկանովրան, և Տիմովնան, ու Պարմենան և Նիկողայոս նորահաւատ Անտիոքացին: 6Ասոնք առաքեալներուն առջև կայնեցուցին. անոնք ալ աղօթք ընելով` ձեռքերնին անոնց վրայ դրին: 7Եւ Աստուծոյ խօսքը կ’աճէր, ու աշակերտներուն թիւը խիստ կը շատնար Երուսաղէմի մէջ. և քահանաներէն մէծ բազմութիւն հաւատքին կը հնազանդէին:

Ստեփանոսին ձերբակալութիւնը

8Եւ Ստեփանոս, որ հաւատքով ու զօրութիւնով լցուած մարդ մըն էր, մեծ հրաշքներ և նշաններ կ’ընէր ժողովուրդին մէջ: 9Բայց ոմանք այն ժողովարանէն, որ Ազատացելոց և Կիւրենացւոց ու Աղեքսանդրացւոց ժողովարան կ’ըսուէր, և ոմանք որ Կիլիկիայէ ու Ասիայէ էին, ելան ու Ստեփանոսի հետ վյճաբանութիւն կ’ընէին: 10Եւ չէին կրնար դէմ դնել այն իմաստութեանը ու հոգիին, որով կը խօսէր: 11Այն ատեն հրապուրեցին քանի մը մարդիկ, որպէս զի ըսեն թէ Մենք լսեցինք որ ատիկա հայհոյական խօսքեր կը խօսի Մովսէսի ու Աստուծոյ դէմ: 12Եւ գրգռեցին ժողովուրդը ու ծերերը և դպիրները, ու անոր վրայ հասնելով զինք բռնեցին ու ատեանը տարին: 13Եւ սուտ վկաներ կայնեցուցին, որոնք կ’ըսէին, Այս մարդը չդադարիր հայհոյական բաներ խօսելէ սուրբ տեղին և օրէնքին դէմ: 14Քանզի լսեցինք ատկէ որ կ’ըսէր թէ այս Նազովրեցի Յիսուսը պիտի քակէ այս տեղը, ու պիտի փոխէ Մովսէսի մեզի աւանդած սովորութիւնները: 15Եւ ատեանը նստողներուն ամէնը երբ անոր նայեցան, անոր երեսը հրեշտակի երեսի պէս տեսան: