Սօղոս եկեղեցին կը հալածէ

1Եւ այն օրը մեծ հալածում եղաւ Երուսաղէմի մէջ եղող եկեղեցիին վրայ, և առաքեալներէն զատ ամէնն ալ ցիրուցան եղան Հրէաստանի ու Սամարիայի երկիրներուն մէջ: 2Եւ աստուածավախ մարդիկ Ստեփանոսը վերցուցին, ու անոր վրայ մեծ ողբ ըրին: 3Բայց Սօղոս եկեղեցիին շատ վնաս կու տար, տուները կը մտնէր, այրեր ու կիներ կը քաշէր` բանտ դնել կու տար:

Սամարայի մէջ աւետարանը կը քարոզուի

4Եւ այն ցիրուցան եղածները կը պտըտէին ու խօսքը կը քարոզէին: 5Փիլիպպոս ալ Սամարիայի մէկ քաղաքը իջնելով` Քրիստոսը կը քարոզէր անոնց: 6Եւ ժողովուրդները միաբան Փիլիպպոսի ըսածներուն ուշադրութիւն կու տային` լսելով ու տեսնելով այն նշանները զորոնք կ’ընէր: 7Վասն զի շատ դիւահարներէն պիղծ ոգիները մեծաձայն աղաղակելով կ’ելլէին: 8Եւ շատ անդամալոյծներ ու կաղեր կը բժշկուէին. 9Ու մեծ ուրախութիւն եղաւ այն քաղաքին մէջ: Բայց Սիմոն անունով մարդ մը կար, որ առաջունէ այն քաղաքին մէջ մոգութիւն կ’ընէր, ու Սամարացւոց ազգը կ’ապշեցնէր, իրեն համար ըսելով թէ մեծ մէկն է. 10Որու ուշադրութիւն կու տային ամէնն ալ, պզտիկէն մինչև մեծը, և կ’ըսէին, Ասիկա Աստուծոյ մեծ [ըսուած] զօրութիւնն է: 11Շատ ժամանակէ ի վեր կախարդութիւններով զանոնք ապշեցնելուն համար` իրեն ուշադրութիւն կու տային: 12Բայց երբ Փիլիպպոսի հաւատացին, որ Աստուծոյ թագաւորութեանը ու Յիսուս Քրիստոսի անուանը վրայով կը քարոզէր, կը մկրտուէին թէ՛ այրեր և թէ՛ կիներ: 13Եւ Սիմոն ինք ալ հաւատաց, ու մկրտուելով` միշտ Փիլիպպոսի հետ էր. և տեսնելով այն նշանները ու մեծ զօրութիւնները որոնք կ’ըլլային` կը զարմանար: 14Իսկ Երուսաղէմի մէջ եղող առաքեալները երբ լսեցին թէ Սամարացիք Աստուծոյ խօսքը ընդուներ են, Պետրոսը ու Յովհաննէսը անոնց ղրկեցին. 15Որոնք իջնելով` աղօթք ըրին անոնց համար որպէս զի Սուրբ Հոգին առնեն. 16(Վասն զի դեռ անոնց մէկո՛ւն վրայ իջած չէր, հապա միայն Տէր Յիսուսի անունովը մկրտուած էին.) 17Այն ատեն ձեռքերնին դրին անոնց վրայ, ու Սուրբ Հոգին կ’առնէին: 18Երբ տեսաւ Սիմոն թէ առաքեալներուն անոնց վրայ ձեռք դնելովը Սուրբ Հոգին կը տրուի, անոնց ստակ մատուց ու ըսաւ, 19Ինծի ալ այս իշխանութիւնը տուէք, որպէս զի որո՛ւ վրայ ձեռք դնեմ` անիկա Սուրբ Հոգին առնէ: 20բայց Պետրոս ըսաւ անոր, Քու արծաթդ քեզի հետ թող կորսուի, վասն զի Աստուծոյ պարգևը կարծեցիր թէ ստակով կ’առնուի: 21Դուն այդ բանին մէջ մասն ու բաժին չունիս, վասն զի քու սիրտդ Աստուծոյ առջև շիտակ չէ: 22Ուստի այդ քու չարութենէդ զեղջի երկուր ու Աստուծոյ աղաչէ, թերևս ներուի քեզի քու սրտիդ չար խորհուրդը: 23Վասն զի ես քեզ մաղձի դառնութեան մէջ և անիրաւութեան կապին մէջ կը տեսնեմ: 24Սիմոն պատասխան տուաւ ու ըսաւ, Դուք ինծի համար աղօթք ըրէք Տէրոջը, որպէս զի այդ ձեր ըսածներէն բան մը իմ վրաս չգայ: 25Անոնք ալ վկայութիւն տալով Տէրոջը խօսքը խօսելէն ետև դարձան Երուսաղէմ, և Սամարացւոց շատ գեղերուն մէջ աւետարանը քարոզեցին:

Փիլիպպոս և Եթովպիայի պաշտօնեան

26Եւ Տէրոջը հրեշտակը Փիլիպպոսի խօսեցաւ` ըսելով, Ելիր ու գնա դուն հարաւային կողմը, այն ճամբան, որ Երուսաղէմէ դէպ ի Գազա կ’իջնէ, որ անապատ տեղ մըն է: 27Ան ալ ելաւ գնաց. և ահա Եթէովպացի ներքինի մարդ մը, Եթէովպացւոց Կանդակա թագուհիին մէկ զօրաւորը, որ անոր բոլոր գանձերուն վրայ էր, որ Երուսաղէմ եկեր էր երկրպագութիւն ընելու. 28Եւ անկէ ետ կը դառնար, ու իր կառքը նստած Եսայի մարգարէին գիրքը կը կարդար: 29եւ Հոգին ըսաւ Փիլիպպոսի. Մօտեցիր և այդ կառքին քով գնա: 30Փիլիպպոս ալ վազելով մօտ գնաց, ու մտիկ կ’ընէր որ Եսայի մարգարէին գիրքը կը կարդար, և ըսաւ, Կարդացածդ կը հասկնա՞ս արդեօք: 31Ան ալ ըսաւ, Ի՞նչպէս կրնամ հասկնալ, եթէ մէկը ինծի չառաջնորդէ. ու աղաչեց Փիլիպպոսի, որ ելլէ իր քով նստի: 32Եւ գիրքին մէջ կարդացած տեղը այս էր. Ոչխարի պէս մորթուելու տարուեցաւ, ու իր խուզողին առջև մունճ կեցող գառնուկի պէս` այնպէս իր բերանը չբանար. 33Իր խոնարհութեանը մէջ իր դատաստանը վերցուեցաւ, և անոր ազգատոհմը ո՞վ պիտի պատմէ. վասն զի անոր կեանքը երկրէ կը վերցուի: 34Ներքինին պատասխան տուաւ Փիլիպպոսի ու ըսաւ, Կ’աղաչեմ քեզի, մարգարէն որո՞ւ համար կ’ըսէ զայս. իրե՞ն համար թէ ուրիշի մը համար: 35Իսկ Փիլիպպոս իր բերանը բացաւ, և գիրքին այն խօսքէն սկսելով` Յիսուսը քարոզեց անոր: 36Ու երբ իրենց ճամբան կ’երթային, ջուրի մը քով եկան. ու ըսաւ ներքինին, Ահա ջուր, ալ ի՞նչ բան զիս կ’արգիլէ մկրտուելէ: 37[Եւ Փիլիպպոս ըսաւ անոր, Եթէ քու բոլոր սրտովդ կը հաւատաս` կարելի է. անիկա պատասխան տուաւ ու ըսաւ, Կը հաւատամ թէ Յիսուս Քրիստոս Որդի Աստուծոյ է:] 38Ու հրաման ըրաւ որ կառքը կայնեցնեն. և երկուքն ալ ջուրը իջան, Փիլիպպոս ու ներքինին, և մկրտեց զանիկա: 39Ու երբ ջուրէն դուրս ելան, Տէրոջը Հոգին յափշտակեց Փիլիպպոսը, և ա՛լ ներքինին զանիկա չտեսաւ, ու իր ճամբան կ’երթար ուրախութեամբ: 40Բայց Փիլիպպոս Ազովտոսի մէջ գտնուեցաւ. ու պտտելով բոլոր քաղաքներուն աւետարան կը քարոզէր, մինչև ինք Կեսարիա եկաւ: