1Պօղոս. Յիսուս Քրիստոսի առաքեալ Աստուծոյ կամքովը, և Տիմոթէոս եղբայրը, 2Կողոսայի մէջ եղող սուրբ ու հաւատացեալ եղբայրներուն Քրիստոսով. 3Շնորհք և խաղաղութիւն ձեզի Աստուծմէ մեր Հօրմէն և Տէր Յիսուս Քրիստոսէ*: Ամէն ատեն ձեզի համար աղօթք ընելով` կը գոհանանք Աստուծմէ ու մեր Տէր Յիսուս Քրիստոսի Հօրմէն,

Շնորհակալութեան աղօթք

4Լսելով ձեր հաւատքը` զոր Քրիստոս Յիսուսի վրայ, և այն սէրը` զոր բոլոր սուրբերուն վրայ ունիք. 5Այն յոյսին համար որ երկինքը կը պահուի ձեզի, որուն վրայով առաջուընէ լսեցիք աւետարանին ճշմարտութեան խօսքովը. 6Որ ձեզի հասաւ` ինչպէս բոլոր աշխարհ, ու պտղաբեր ըլլալով [կ’աճի], ինչպէս ձեր մէջ ալ, այն օրուընէ որ դուք լսեցիք ու ճանչցաք Աստուծոյ շնորհքը ճշմարտութիւնով. 7Ինչպէս սորվեցաք մեր սիրելի ծառայակցէն Եպափրասէ, որ ձեզի համար հաւատարիմ պաշտօնեայ մըն է Քրիստոսի. 8Որ ինք ալ մեզի պատմեց ձեր սէրը հոգիով: 9Անոր համար մենք ալ, այն օրուընէ որ լսեցինք, չենք դադարիր ձեզի համար աղօթք ընելէ ու խնդրուածք մատուցանելէ, որ կատարեալ ըլլաք անոր կամքին գիտութիւնովը բոլոր իմաստութիւնով ու հոգևոր հանճարով. 10Որպէս զի դուք Տէրոջը արժանի կերպով քալէք ամէն բանի մէջ զինք հաճեցնելով, ամէն բարի գործերու մէջ պտղաբեր ըլլալով, ու աճեցուն` Աստուծոյ գիտութիւնովը. 11Իր փառաւոր զօրութեանը համեմատ ամենայն ուժով ուժովցած` բոլոր համբերութեան ու երկայնմտութեան համար ուրախութեամբ. 12Գոհանալով Հօր Աստուծմէ, որ մեզ լուսոյ մէջ բնակող սուրբերուն վիճակին մասնակից ըլլալու արժանացուց. 13Որ մեզ ազատեց խաւարին իշխանութենէն, ու իր սիրելի Որդւոյն թագաւորութեանը փոխադրեց. 14Որով մենք փրկութիւն ունինք իր արիւնովը, այսինքն մեղքի թողութիւն. 15Որ աներևոյթ Աստուծոյ պատկերն է, բոլոր ստեղծուածներուն անդրանիկը.

Քրիստոսին անձը և գործը

16Վասն զի անով ամէն բան ստեղծուեցաւ, ինչ որ երկինքը ու ինչ որ երկրի վրայ, անոնք որ կ’երևնան և անոնք որ չեն երևնար, թէ° աթոռները, թէ° տէրութիւնները, թէ° պետութիւնները, թէ՛ իշխանութիւնները. բոլոր բաները անով ու անոր համար ստեղծուեցան. 17Ու անիկա ամէն բանէ առաջ է, և ամէն բան անով հաստատ կը կենայ. 18Եւ անիկա է մարմինին, այսինքն եկեղեցւոյն, գլուխը. որ սկիզբն է, մեռելներէն անդրանիկը, որպէս զի ինք ըլլայ ամէն բանի մէջ նախապատիւ. 19Վասն զի Հայրը հաճեցաւ որ Աստուածութեան բոլոր լեցունութիւնը անոր մէջ բնակի. 20Եւ անով ամէնը հաշտեցնէ իրեն հետ, խաղաղութիւն ընելով անոր խաչին վրայ թափած արիւնովը, թէ° երկրի վրայ և թէ° երկինքի մէջ եղողները: 21Եւ ձեզ ալ, որ ատեն մը օտարացած էիք, ու չար գործերով թշնամիներ` ձեր խորհուրդներովը, 22Հիմա հաշտեցուց բուն իր մարմինովը` մահուամբ, որպէս զի ձեզ անոր դիմաց սուրբ ու անբիծ և անարատ կայնեցնէ. 23Եթէ կենաք հաւատքին մէջ հիմնուած ու հաստատ և առանց խախտելու աւետարանին յոյսէն զոր լսեցիք, որ երկինքի տակ եղած բոլոր ստեղծուածներուն քարոզուեցաւ, որու ես Պօղոս սպասաւոր եղայ:

Պօղոսին ծառայութիւնը եկեղեցիին

24Հիմա ուրախ եմ ձեզի համար կրած չարչարանքներուս վրայ, ու Քրիստոսի կրած նեղութիւններուն պակասութիւնը իմ մարմինիս մէջ կը լեցնեմ անոր մարմինին համար, որ եկեղեցին է. 25Որու ես սպասաւոր եղայ Աստուծոյ տնտեսութիւնովը` որ ինծի տրուեցաւ ձեզի համար` Աստուծոյ խօսքը լման քարոզելու, 26Այն խորհուրդը` որ ծածկուած էր առաջուան դարերէն ու ազգերէն հետէ, ու հիմա իր սուրբերուն յայտնուեցաւ. 27Որոնց ուզեց Աստուած գիտցնել, թէ ի°նչ է այս խորհուրդին փառաւոր ճոխութիւնը հեթանոսներուն մէջ. որ է Քրիստոս ձեր մէջ, փառաց յոյսը. 28Զոր մենք կը քարոզենք, ու ամէն մարդ կը խրատենք. և կը սորվեցնենք ամէն մարդ բոլոր իմաստութիւնով, որպէսզի ամէն մարդ կատարեալ կեցնենք Քրիստոս Յիսուսով. 29Որու համար ես ալ կ’աշխատիմ, ջանք ընելով իր ներգործութեանը համեմատ, որ զօրութիւնով իմ մէջս ի գործ կը դրուի: