1Արդ եթէ Քրիստոսի հետ յարութիւն առիք, ուրեմն վերի բաները փնտռեցէք, ուր Քրիստոս կը նստի Աստուծոյ աջ կողմը: 2Վերի բաները մտածեցէք, ոչ թէ այս երկրին վրայինները: 3Վասն զի դուք մեռաք, ու ձեր կեանքը պահուած է Աստուծոյ քով Քրիստոսի հետ: 4Երբ Քրիստոս, մեր կեանքը, յայտնուի, այն ատեն դուք ալ անոր հետ փառքով պիտի յայտնուիք:

Հին և նոր կեանք

5Ուստի ձեր երկրաւոր անդամները սպաննեցէք. պոռնկութիւնը, պղծութիւնը, անսանձ կիրքը, չար ցանկութիւնը և ագահութիւնը, որ կռապաշտութիւն է. 6Որոնց համար Աստուծոյ բարկութիւնը անհնազանդութեան որդիներուն վրայ կու գայ. 7Որոնց մէջ ատեն մը դուք ալ կը քալէիք, երբ անոնց մէջ կ’ապրէիք: 8Բայց հիմա մէկդի ձգեցէք դուք ալ այն ամէնը. բարկութիւնը, սրտմտութիւնը, չարութիւնը, հայհոյութիւնը, անհամեստ խօսքերը ձեր բերաններէն: 9Իրարու սուտ մի զրուցէք. հին մարդը իր գործերովը ձեր վրայէն հանեցէք. 10Եւ հագէք այն նորը գիտութիւնով նորոգուած` իր Ստեղծողին պատկերին պէս. 11Ուր Յոյն ու Հրեայ, թլփատութիւն ու անթլփատութիւն, Բարբարոս, Սկիւթացի, ծառայ կամ ազատ չկայ. հապա Քրիստոս է ամէնը` և ամէն բանի մէջ: 12Ուստի Աստուծոյ ընտրեալ սուրբերու և սիրելիներու պէս ձեր վրայ հագէք գութը, ողորմութիւնը, քաղցրութիւնը, խոնարհութիւնը, հեզութիւնը, երկայնմտութիւնը, 13Իրարու համբերելով և իրարու ներելով` եթէ մէկը մէկուն դէմ տրտունջ մը ունենայ. ինչպէս Քրիստոս ձեզի ներեց, նոյնպէս ալ դուք: 14Եւ այս ամէն բաներուն վրայ սէրը հագէք, որ կատարելութեան կապն է: 15Ու Աստուծոյ խաղաղութիւնը ձեր սիրտերուն մէջ թագաւորէ, որու դուք կանչուեցաք մէկ մարմինով. ու գոհացող եղէք: 16Քրիստոսի խօսքը ձեր մէջ բնակի առատապէս ամէն իմաստութիւնով` իրար սորվեցնելու ու խրատելու` սաղմոսներով և օրհնութիւններով ու հոգևոր երգերով ձեր սիրտերուն մէջ շնորհքով զԱստուած օրհնելու: 17Եւ ամէն ինչ որ կ’ընէք թէ° խօսքով և թէ° գործով` բոլորը Տէր Յիսուսի անունովը ըրէք, Աստուծոյ ու Հօրը գոհութիւն մատուցանելով անոր ձեռքով:

Նոր կեանքով անձնական յարաբերութիւնները

18Կիներ, հնազանդ եղէք ձեր այրերուն, ինչպէս կը վայլէ Տէրոջմով: 19Այրեր, սիրեցէք ձեր կիները, ու դառն մի ըլլաք անոնց: 20Որդիներ, ամէն բանի մէջ հնազանդ եղէք ձեր ծնողներուն, վասն զի այն է Տէրոջը առջև հաճելի: 21Հայրեր, ձեր որդիները մի բարկացնէք, որպէս զի չվհատին: 22Ծառաներ, ամէն բանի մէջ հնազանդ եղէք ձեր մարմնաւոր տէրերուն, ոչ թէ աչքի առջև ծառայելով մարդահաճոներու պէս, հապա սրտի միամտութեամբ` Տէրոջմէ վախնալով. 23Ինչ որ կ’ընէք` սրտանց ըրէք, որպէս թէ Տէրոջը ու ոչ թէ մարդոց, 24Գիտնալով որ ժառանգութեան հատուցումը Տէրոջմէ պիտի առնէք. վասն զի Տէր Քրիստոսի կը ծառայէք. 25Բայց անօրէնը իր անօրէնութեան պատիժը պիտի ընդունի, և աչառութիւն չկայ: