Դանիէլի չորս կենդանիներու տեսիլքը

1Բաբելոնի Բաղտասար թագաւորին առաջին տարին Դանիէլ երազ տեսաւ, ու իր անկողինին մէջ՝ իր գլխուն տեսիլքները. և անիկա երազը գրեց ու բաներուն համառօտութիւնը ըսաւ։ 2Դանիէլ խօսեցաւ ու ըսաւ, Գիշերը տեսիլքիս մէջ տեսայ որ ահա երկինքի չորս հովերը մեծ ծովուն վրայ կը յարձակէին։ 3Ու ծովէն չորս մեծ գազաններ ելան, որոնք իրարմէ տարբեր էին։ 4Առաջինը առիւծի պէս էր, ու արծիւի թևեր ուներ. ու կը տեսնէի մինչև անոր թևերը փրցուեցան, ու երկրէն վերացաւ և մարդու պէս ոտքերուն վրայ կայնեցաւ. ու անոր մարդու սիրտ տրուեցաւ։ 5Եւ ահա ուրիշ երկրորդ գազան մը արջու նման՝ որ մէկ քովին վրայ կայնեցաւ, ու բերանը, ակռաներուն մէջ, երեք կողի ոսկոր կար. և անոր այսպէս ըսին. Ելիր, շատ միս կեր։ 6Ասկէ ետքը կը տեսնէի, և ահա ընձու նման ուրիշ մը՝ որուն կռնակին վրայ չորս թռչունի թևեր կային. և այս գազանը չորս գլուխ ունէր, ու անոր իշխանութիւն տրուեցաւ։ 7Ասկէ ետքը գիշերուան տեսիլքներու մէջ կը տեսնէի, և ահա չորրորդ գազան մը. անիկա ահեղ, սոսկալի ու խիստ զօրաւոր էր, և անիկա մեծ երկաթէ ակռաներ ուներ, անիկա կ’ուտէր ու կը փշրէր ու մնացածը ոտքերովը կը կոխէր, ու իրմէ առաջ եղող ամէն գազաններէն տարբեր էր, և տասը եղջիւր ունէր։ 8Երբ ես այն եղջիւրները կը դիտէի, ահա անոնց մէջ ուրիշ պզտիկ եղջիւր մը ելաւ, որուն առջևէն առաջուան եղջիւրներէն երեքը խլուեցան. և ահա այս եղջիւրին վրայ մարդու աչքերու պէս աչքեր, ու մեծ բաներ խօսող բերան կար։

Տեսիլքը անոր, որ յաւիտեան կենդանի է

9Ես կը տեսնէի մինչև աթոռներ դրուեցան, ու Հինաւուրցը նստաւ. անոր զգեստը ձիւնի պէս ճերմակ, ու գլխուն մազը մաքուր բուրդի պէս էր, անոր աթոռը կրակի բոցի պէս, ու անիւները վառած կրակի պէս էին: 10Անոր առջևէն կրակի գետ կ’ելլէր ու կը վազէր. հազարք հազարաց ծառայութիւն կ’ընէին անոր, և բիւրք բիւրուց անոր առջև կը կայնէին. ատեանը բազմեցաւ, ու գիրքերը բացուեցան։ 11Այն ատեն կը նայէի այն եղջիւրին խօսած մեծ խօսքերուն ձայնին համար, ու նայեցայ մինչև այն գազանը սպաննուեցաւ, և անոր մարմինը կորսուեցաւ ու կրակի բոցերու տրուեցաւ։ 12Եւ միւս գազաններուն իշխանութիւնը վերցուեցաւ, բայց մինչև ժամանակ մը ու ատեն մը կեանքի երկարութիւն տրուեցաւ անոնց։ 13Գիշերուան տեսիլքներու մէջ կը տեսնէի, և ահա երկինքի ամպերով Որդւոյն մարդոյ նման մէկը կու գար, ու մինչև Հինաւուրցը եկաւ, և զանիկա անոր առջև մօտեցուցին։ 14Ու անոր իշխանութիւն, պատիւ ու թագաւորութիւն տրուեցաւ, որպէս զի ամէն ժողովուրդները, ազգերը ու լեզուները անոր ծառայութիւն ընեն. անոր իշխանութիւնը յաւիտենական իշխանութիւն է որ չանցնիր, ու թագաւորութիւնը չաւրուիր։

Տեսիլքները կը բացատրուին

15Ես Դանիէլ հոգւով վշտացայ իմ ներսիդիս, և իմ գլխուս տեսիլքները զիս խռովեցուցին։ 16Հոն կայնողներէն մէկուն մօտեցայ, ու այս ամէն բաներուն ճշմարտութիւնը անոր հարցուցի. և անիկա ինծի խօսեցաւ, ու այս բաներուն մեկնութիւնը ինծի գիտցուց։ 17Այս չորս մեծ գազանները չորս թագաւորներ են,որոնք երկրէ պիտի ելլեն։ 18Եւ թագաւորութիւնը Բարձրեալին սուրբերը պիտի առնեն, ու անոնք պիտի ժառանգեն թագաւորութիւնը յաւիտեան, և յաւիտեանս յաւիտենից։ 19Ետքը չորրորդ գազանին վրայով ճշմարիտը գիտնալ ուզեցի, որ բոլոր միւսներէն տարբեր էր, ու խիստ ահեղ էր. անոր ակռաները երկաթէ, և ըղունգները պղնձէ էին, անիկա կ’ուտէր, կը փշրէր ու մնացածը ոտքերովը կը կոխէր։ 20Եւ անոր գլուխը եղող տասը եղջիւրներուն վրայով, ու միւս ելածին վրայով՝ որ անոր առջևէն երեքը ինկան, այսինքն այն եղջիւրին վրայով՝ որ աչքեր ու մեծ բաներ խօսող բերան ունէր, և անոր դէմքը միւսներէն մեծ էր։ 21Ես կը տեսնէի որ այն եղջիւրը սուրբերուն հետ պատերազմ կ’ընէր, ու անոնց յաղթեց, 22Մինչև որ Հինաւուրցը եկաւ, և Բարձրեալին սուրբերուն իրաւունք տրուեցաւ, ու ժամանակը հասաւ որ սուրբերը թագաւորութիւնը առին։ 23Անիկա այսպէս ըսաւ. Չորրորդ գազանը երկրի վրայ չորրորդ թագաւորութիւն պիտի ըլլայ, որ ամէն թագաւորութիւններէն տարբեր պիտի ըլլայ, ու բոլոր երկիրը պիտի ուտէ, ու զանիկա պիտի կոխէ ու փշրէ։ 24Եւ այն տասը եղջիւրները այն թագաւորութենէն ելլելու տասը թագաւորներ են, ու անոնցմէ ետքը մէկ ուրիշը պիտի ելլէ, ու անիկա առաջուաններէն տարբեր պիտի ըլլայ, և անիկա երեք թագաւոր պիտի կործանէ: 25Ու Բարձրեալին դէմ խօսքեր պիտի ըսէ, ու Բարձրեալին սուրբերը պիտի մաշէ, և պիտի մտածէ ժամանակներ ու օրէնքներ փոխելու. ու անոնք մինչև ժամանակ մը, ժամանակներ ու կէս ժամանակ անոր ձեռքը պիտի տրուին։ 26Բայց ատեանը պիտի բազմի, ու անոր իշխանութիւնը պիտի վերցնեն, զանիկա մինչև վերջը բնաջինջ պիտի ընեն ու կորսնցնեն։ 27Եւ թագաւորութիւնը ու իշխանութիւնը, ու բոլոր երկինքին տակ եղող թագաւորութիւններուն մեծութիւնը Բարձրեալին սուրբերուն ժողովուրդին պիտի տրուի. անոր թագաւորութիւնը յաւիտենական թագաւորութիւն է, ու բոլոր իշխանները անոր պիտի ծառայեն ու պիտի հնազանդին։ 28Խօսքին վերջը մինչև հոս է: Զիս Դանիէլս իմ խորհուրդներս խիստ խռովեցուցին, ու երեսիս գոյնը փոխուեցաւ. և այս խօսքը սրտիս մէջ պահեցի։