Մովսէսին մահը

1Եւ Մովսէս Մովաբի դաշտերէն Նաբաւ լեռանը վրայ Երիքովի դիմացի Փասգայի գագաթը ելաւ. և Տէրը անոր ցուցուց բոլոր Գաղաադու երկիրը մինչև Դան, 2Նաև բոլոր Նեփթաղիմը, ու Եփրեմի և Մանասէի երկիրը, ու Յուդայի բոլոր երկիրը մինչև արեւմտեան ծովը, 3Եւ հարաւային կողմը ու Երիքովի հովիտին դաշտը, ու Արմաւենեաց քաղաքը մինչև Սեգովր։ 4Եւ Տէրը անոր ըսաւ, Այս է այն երկիրը՝ որու համար Աբրահամի, Իսահակի ու Յակոբի երդում ըրի՝ ըսելով, Քու սերունդիդ պիտի տամ զանիկա. ահա քու աչքերուդ ցուցուցի, բայց դուն հոն պիտի չանցնիս։ 5Ուստի Տէրոջը ծառան Մովսէս հոն Մովաբի երկրին մէջ Տէրոջը ըսածին պէս մեռաւ. 6Եւ զանիկա Բեթփեգովրի դիմաց, Մովաբի երկիրը ձորի մը մէջ թաղեց. ու մինչև այսօր անոր գերեզմանը մարդ մը չգիտցաւ։ 7Եւ Մովսէս իր մեռած ատենը հարիւր քսան տարեկան էր. անոր աչքերը չտկարացան, ու անոր ոյժը չգնաց, 8Եւ Իսրայէլի որդիները Մովաբի դաշտերուն մէջ Մովսէսի համար երեսուն օր լացին. ու Մովսէսի համար սուգի լացին օրերը լմնցան։ 9Եւ Նաւէի որդին Յեսու իմաստութեան հոգւով լեցուեցաւ, որովհետև Մովսէս իր ձեռքերը անոր վրայ դրեր էր. ու Իսրայէլի որդիները անոր հնազանդութիւն ըրին, և Տէրը ինչ որ Մովսէսի պատուիրեր էր, այնպէս ըրին։ 10Եւ անկէ ետև Տէրոջը երես առ երես ճանչցած Մովսէսին պէս՝ Իսրայէլի մէջ մարգարէ մը չելաւ, 11Այն բոլոր նշաններով ու հրաշքներով, զորոնք Տէրը ղրկեց զանիկա Եգիպտոսի երկրին մէջ ընելու Փարաւոնի ու անոր ամէն ծառաներուն և անոր բոլոր երկրին, 12Ու այն բոլոր զօրաւոր ձեռքով եւ բոլոր մեծ սոսկումով՝ զոր Մովսէս ըրաւ բոլոր Իսրայէլի աչքին առջև։