1Պօղոս, Յիսուս Քրիստոսի առաքեալը Աստուծոյ կամքովը, Եփեսոսի մէջ եղած սուրբերուն և Քրիստոս Յիսուսի հաւատացողներուն. 2Շնորհք և խաղաղութիւն ձեզի` Աստուծմէ մեր Հօրմէն ու Տէր Յիսուս Քրիստոսէ:

Քրիստոսով հոգևոր օրհնութիւն

3Օրհնեալ է Աստուած և մեր Տէր Յիսուս Քրիստոսի Հայրը, որ մեզ օրհնեց ամէն հոգևոր օրհնութիւններով երկնաւորներուն մէջ Քրիստոսով. 4Ինչպէս մեզ անով աշխարհի սկիզբէն առաջ ընտրեց, որպէս զի մենք սուրբ ու անարատ ըլլանք իր առջև սիրով. 5Եւ առաջուընէ մեզ սահմանեց իրեն որդեգիր ըլլալ Յիսուս Քրիստոսի ձեռքով իր կամքին հաճութեանը պէս, 6Իր փառաւոր շնորհքին գովութեանը համար, որով մեզ զարդարեց Սիրելիին ձեռքով. 7Որով փրկութիւն ունինք մենք իր արեանը միջոցով, մեղքի թողութիւնը` իր շնորհքին ճոխութեան չափովը. 8Զոր մեր վրայ աւելցուց բոլոր իմաստութեամբ ու գիտութեամբ, 9Մեզի յայտնելով իր կամքին խորհուրդը իր հաճութեանը պէս, զոր իր մէջ* նախասահմաներ էր. 10Որպէս զի ժամանակներուն լրանալուն տնտեսութեանը մէջ ամէն բան բովանդակէ Քրիստոսով, ինչ որ երկինքը ու ինչ որ երկրի վրայ կայ, անով` 11Որով մենք ալ ժառանգութիւն առինք, առաջուընէ որոշուած ըլլալով անոր նախասահմանութիւնովը, որ ամէն բան իր կամքին խորհրդովը ի գործ կը դնէ. 12Որպէս զի մենք անոր փառքին գովութիւն ըլլանք` առաջուընէ Քրիստոսի վրայ յուսացողներս. 13Որուն վրայ դուք ալ յուսացաք` երբ լսեցիք ճշմարտութեան խօսքը, ձեր փրկութեան աւետարանը, որու նաև հաւատալով` խոստացեալ Սուրբ Հոգւոյն շնորհքովը կնքուեցաք. 14Որ մեր ժառանգ ըլլալուն գրաւն է մինչև ստացուածքին փրկութիւնը` իր փառքին գովութեանը համար:

Պօղոսին աղօթքը

15Ուստի ես ալ երբ լսեցի Տէր Յիսուսի վրայ ունեցած հաւատքնիդ, ու բոլոր սուրբերուն վրայ ձեր ունեցած սէրը, 16Չեմ դադարիր ձեզի համար գոհութիւն ընելէ` ձեզ իմ աղօթքներուս մէջ յիշելով. 17Որպէս զի մեր Տէր Յիսուս Քրիստոսի Աստուածը, փառաց Հայրը, տայ ձեզի իմաստութեան ու յայտնութեան հոգին իր գիտութիւնովը. 18Որպէս զի սիրտերնուդ աչքերը լուսաւորուելով` գիտնաք թէ ի՛նչ է անոր ձեզ կանչելուն յոյսը, ու ի՛նչ է անոր ժառանգութեանը փառքին ճոխութիւնը սուրբերուն մէջ. 19Եւ ի՛նչ է իր զօրութեան գերազանց մեծութիւնը հաւատացեալներուս մէջ` իր կարող զօրութեանը գործադրութիւնովը. 20Զոր Քրիստոսի վրայ ի գործ դրաւ, երբ զանիկա մեռելներէն յարուց, ու նստեցուց իր աջ կողմը երկինքի մէջ 21Ամէն իշխանութեան ու պետութեան և զօրութեան ու տէրութեան վրայ. և ամէն անունի վրայ որ կ’անուանի, ոչ թէ միայն այս աշխարհին մէջ, հապա գալիքին մէջ ալ. 22Եւ ամէն բան անոր ոտքերուն տակ հնազանդեցուց, և զանիկա ամէն բաներու վրայ եկեղեցիին գլուխ դրաւ, 23Որ անոր մարմինն է, անոր լրումը` որ կը լեցնէ ամէնը ամէն բանի մէջ: