Մահէն կեանքի

1Եւ դուք որ յանցանքներու և մեղքերու մէջ մեռած էիք, ինք ձեզ կենդանացուց. 2Որոնց մէջ ատենօք կը քալէիք այս աշխարհին բռնած ճամբովը, այս օդին իշխանութեանը իշխանին ուզածին պէս, այն ոգիին` որ հիմա ապստամբութեան որդիներուն ներսիդին կը ներգործէ. 3Որոնց մէջ ատենօք մենք ամէնս ալ կը պտըտէինք մեր մարմինին ցանկութիւններովը, և մարմինին ու միտքին ուզածը կը կատարէինք. և բնութեամբ բարկութեան որդիներ էինք` ինչպէս ուրիշները. 4Բայց Աստուած, որ մեծ է ողորմութիւնով, իր առատ սիրոյն համար, որով մեզ սիրեց, 5Երբ յանցանքներու մէջ մեռած էինք, մեզ Քրիստոսի հետ կենդանացուց, (դուք շնորհքով փրկուած էք,) 6Եւ անոր հետ մեզ յարուց, ու անոր հետ նստեցուց երկնաւորներուն մէջ Քրիստոս Յիսուսով, 7Որպէս զի գալու դարերուն մէջ ցուցնէ իր շնորհքին գերազանց մեծութիւնը` Քրիստոս Յիսուսով մեզի ցուցուցած քաղցրութիւնովը: 8Վասն զի շնորհքով փրկուած էք դուք հաւատքի միջոցով. և այս ոչ թէ ձեզմէ է, հապա Աստուծոյ պարգևն է. 9Ոչ թէ գործերէն, որ մէ՛կը չպարծի. 10Վասն զի մենք անոր ձեռագործն ենք, Քրիստոս Յիսուսով ստեղծուած` բարի գործերու համար, որոնց Աստուած առաջուընէ պատրաստեց մեզ, որպէս զի անոնց մէջ քալենք:

Քրիստոսով մէկ

11Ուստի միտքերնիդ բերէք որ դուք ատեն մը մարմինով հեթանոսներ ըլլալով, (որոնք անթլփատութիւն կ’ըսուին անոնցմէ` որ թլփատութիւն կ’ըսուին մարմինի մէջ ձեռքով եղած,) 12Որ այն ատեն դուք առանց Քրիստոսի էիք, ու հեռացած էիք Իսրայէլի քաղաքակցութենէն, և օտարացած` խոստմունքին ուխտերէն, ու յոյս մըն ալ չունէիք, և աշխարհի մէջ անաստուած էիք: 13Բայց հիմա Քրիստոս Յիսուսով դուք որ ատեն մը հեռաւոր էիք, մերձաւոր եղաք Քրիստոսի արիւնովը: 14Վասն զի անիկա է մեր խաղաղութիւնը, որ երկուքը մէկ ըրաւ, ու մէջտեղի բաժանող պատը, այսինքն իրարու հետ եղած թշնամութիւնը, իր մարմինովը քակեց, 15Եւ հրամաններով եղած պատուիրանքներուն օրէնքը խափանեց. որպէս զի իրմով այն երկուքը նոր մարդ մը հաստատէ, ու այսպէս խաղաղութիւն ընէ. 16Եւ երկուքն ալ մէկ մարմին եղած հաշտեցնէ Աստուծոյ հետ իր խաչովը. վասն զի անով սպաննեց թշնամութիւնը. 17Եւ եկաւ խաղաղութիւն քարոզեց ձեզի որ հեռուն էիք, ու անոնց` որ մօտ էին: 18Քանզի անոր ձեռքով մենք երկուքս ալ մէկ Հոգիով` Հօրը մօտենալու արտօնութիւնը ունինք: 19Ուրեմն ա՛լ ասկէ ետև դուք օտար ու պանդուխտ չէք, հապա սուրբերուն քաղաքակիցները և Աստուծոյ ընտանիքը` 20Առաքեալներուն ու մարգարէներուն հիման վրայ շինուած, որուն անկիւնին գլուխը Յիսուս Քրիստոս է. 21Որով բոլոր շէնքը մէկտեղ յարմարութեամբ կազմուած` կ’աճի սուրբ տաճար մը կ’ըլլայ Տէրոջմով. 22Որով դուք ալ մէկտեղ կը շինուիք` Աստուծոյ բնակարան ըլլալու Հոգւով Սրբով: