Որդիներ և ծնողներ

1Որդիներ, ձեր ծնողներուն հնազանդ եղէք Տէրոջմով, վասն զի այն է արժանը: 2Պատուէ քու հայրդ ու մայրդ, (որ առաջին պատուիրանքն է խոստմունքով,) 3Որպէս զի քեզի աղէկ ըլլայ, ու երկար կեանք ունենաս երկրի վրայ: 4Եւ դուք, հայրեր, ձեր որդիները մի բարկացնէք, հապա զանոնք մեծցուցէք Տէրոջը վարժութիւնովը ու խրատովը:

Ծառաներ և տէրեր

5Ծառաներ. Հնազանդ եղէք ձեր մարմնաւոր տէրերուն ահով ու դողով` ձեր սրտին միամտութիւնովը, որպէս թէ Քրիստոսի. 6Ոչ թէ մարդահաճոյի պէս աչքի առջև ծառայելով, հապա Քրիստոսի ծառաներու պէս` սրտանց Աստուծոյ կամքը ընելով. 7Յօժարութեամբ ծառայելով որպէս թէ Տէրոջը, ու ոչ թէ մարդոց. 8Գիտնալով որ ամէն մէկը ինչ բարիք որ ընէ, նոյնը Տէրոջմէն պիտի ընդունի, թէ՛ ծառայ ըլլայ և թէ՛ ազատ: 9Դուք ալ, տէրեր, նոյնը ըրէք անոնց, ու սպառնալիքը թող տուէք, գիտնալով որ անոնց ալ ձեր ալ Տէրը երկինքն է. ու անոր քով աչառութիւն չկայ:

Աստուծոյ սպառազինութիւնը

10Ալ ասկէ ետև, եղբայներս, զօրացէք Տէրոջմով ու անոր զօրութեան կարողութիւնովը: 11Ձեր վրայ հագէք Աստուծոյ սպառազինութիւնը, որպէս զի կարող ըլլաք ëատանայի հնարքներուն դէմ դնել: 12Վասն զի մեր պատերազմը արիւնի ու մարմինի հետ չէ, հապա իշխանութիւններու ու պետութիւններու հետ. և այս խաւար աշխարհին* իշխաններուն հետ, երկնաւորներուն մէջ եղող չար ոգիներուն հետ: 13Ասոր համար ձեր վրայ առէք Աստուծոյ սպառազինութիւնը, որպէս զի կարող ըլլաք չարութեան օրը դէմ դնել, 14Ու ամէն բանը լմնցնելէ ետև` հաստատուն կայնիլ: Ուստի ձեր տեղը կայնեցէք, մէջքերնիդ ճշմարտութեամբ ամուրցնելով, ու արդարութեան զրահը հագնելով. 15Ու ոտքերնուդ հագցնելով խաղաղութեան աւետարանին պատրաստութիւնը. 16Եւ ամէն բանին վրայ հաւատքին վահանը առէք, որով կարող պիտի ըլլաք չարին ամէն կրակոտ նետերը մարել. 17Եւ փրկութեան սաղաւարտը առէք, ու Հոգիին սուրը` որ Աստուծոյ խօսքն է. 18Ամէն աղօթքով ու խնդրուածքով ամէն ատեն աղօթք ըրէք Հոգիով, ու այս բանին վրայ հսկեցէք կատարեալ յարատևութեամբ ու աղաչանքով` բոլոր սուրբերուն համար, 19Ինծի համար ալ, որպէս զի ինծի խօսք տրուի որ բերանս բանամ համարձակութեամբ աւետարանին խորհուրդը յայտնելու. 20Որու համար ես դեսպանութիւն կ’ընեմ կապանքովս, որպէս զի անով համարձակութիւն ունենամ խօսելու` ինչպէս պէտք է:

Վերջին բարևներ

21Բայց որպէս զի դուք ալ գիտնաք իմ վրայովս` թէ ի՛նչ կ’ընեմ ես, ամէն բանը պիտի ցուցնէ ձեզի Տիւքիկոս սիրելի եղբայրը ու հաւատարիմ պաշտօնեան Տէրոջմով. 22Զոր յատկապէս այդ բանին համար ձեզի ղրկեցի, որպէս զի գիտնաք դուք մեր վրայով, ու ինք ձեր սիրտերը մխիթարէ: 23Խաղաղութիւն եղբայրներուն և սէր հաւատքով մէկտեղ Հօր Աստուծմէ ու Տէր Յիսուս Քրիստոսէ: 24Շնորհք այն ամէնուն հետ` որոնք մեր Տէր Յիսուս Քրիստոսը անկեղծութեամբ կը սիրեն: Ամէն: