Մուրթքէ Եսթերէն օգնութիւն կը խնդրէ

1Ու երբ Մուրթքէ բոլոր եղածները իմացաւ, Մուրթքէ իր հանդերձները պատռեց և քուրձ հագաւ, ու վրան մոխիր ցանեց, ու քաղաքին հրապարակը ելլելով` մեծ ու ողբալի ձայնով աղաղակեց. 2Ու մինչև թագաւորին դրանը առջև եկաւ կայնեցաւ. վասն զի քուրձ հագած մարդ մը չէր կրնար թագաորին դռնէն ներս մտնել: 3Եւ ամէն գաւառներուն մէջ, ուր որ թագաւորին հրամանը ու հրովարտակը կը հասնէր, Հրեաները մեծ սուգ կ’ունենային, ծոմ կը կենային, կու լային ու կ’ողբային. և շատերը քուրձի ու մոխիրի վրայ կը պառկէին: 4Ու Եսթերի աղախինները ու ներքինիները եկան անոր պատմեցին, և թագուհին մեծապէս խռովեցաւ, ու հանդերձներ ղրկեց որ Մուրթքէի հագցնեն, ու անոր վրայէն քուրձը հանեն. բայց անիկա չընդունեց: 5Ու Եսթեր Հաթաքը կանչեց, որ թագաւորին ներքինիներէն մէկն էր, (զոր թագաւորը անոր սպասաւոր տուեր էր,) ու անոր հրամայեց որ Մուրթքէէ հասկնայ թէ այս ի՛նչ պիտի ըլլայ ու ինչո՛ւ համար է: 6Եւ Հաթաք Մուրթքէի գնաց, որ թագաւորին դրանը առջև եղող քաղաքի հրապարակին մէջ էր: 7Ու Մուրթքէ բոլոր իրեն պատահած բաները անոր յայտնեց, նաև Համանի սակարկութիւնը` որով թագաւորին գանձին արծաթ տալ խոստացեր էր Հրեաներուն համար, որպէս զի զանոնք կորսնցնէ: 8Եւ զանոնք կորսընցնելու համար Շուշանի մէջ հրատարակուած հրովարտակին օրինակը անոր տուաւ, որպէս զի Եսթերի ցուցնէ ու հասկցնէ, և անոր պատուիրէ որ թագաւորին քով երթայ, և անոր աղաչէ, ու անոր առջև իր ազգին համար ազատում խնդրէ: 9Եւ Հաթաք գնաց ու Մուրթքէի խօսքերը Եսթերի պատմեց: 10Ու Եսթեր Հաթաքի հետ խօսեցաւ, ու հրամայեց որ Մուրթքէի այսպէս պատասխան տանի. 11Թագաւորին բոլոր ծառաները, ու թագաւորին գաւառներուն ժողովուրդները աղէկ գիտեն, որ այր կամ կին մարդ մը եթէ չկանչուած` թագաւորին ներքին գաւիթը մտնէ, զանիկա մեռցնելու համար օրէնք մը կայ. ու անիկա միայն կ’ապրի, որու որ թագաւորը իր ոսկի գաւազանը կ’երկնցնէ. և հիմա երեսուն օր է որ ես թագաւորին քով մտնելու կանչուած չեմ: 12Ու Եսթերի խօսքերը Մուրթքէի պատմեցին: 13Եւ Մուրթքէ ըսաւ որ Եսթերի այսպէս պատասխան տանին. Դուն մի կարծեր որ թագաւորին տունը ըլլալովդ` բոլոր Հրեաներէն դուն միայն պիտի ազատիս: 14Վասն զի այս ժամանակին մէջ եթէ դուն լռես, Հրեաներուն ուրիշ տեղէ մը օգնութիւն ու ազատում կու գայ, բայց դուն ու քու հօրդ տունը կը կորսուիք. և ո՞վ գիտէ, թերևս դուն այսպիսի ատենի մը համար թագուհի եղար: 15Ու Եսթեր ըսաւ որ Մուրթքէի այսպէս պատասխան տանին. 16Գնա դուն Շուշանի մէջ եղող բոլոր Հրեաները ժողվէ, ու ինծի համար ծոմ պահեցէք, գիշեր ցորեկ երեք օր մի ուտէք ու մի խմէք. նոյնպէս ալ ես իմ աղախիններովս ծոմ կը պահեմ, ու այնպէս թագաւորին առջև կ’ելլեմ, թէպէտև օրէնքի դէմ է. ու եթէ մեռնիմ` թող մեռնիմ: 17Այն ատեն Մուրթքէ գնաց, ու ըրաւ այն ամէնուն համեմատ` զոր Եսթեր իրեն պատուիրեր էր: