Եսթեր թագաւորը և Համանը կոչունքի կը հրաւիրէ

1Ու եղաւ որ երրորդ օրը Եսթեր իր թագաւորական զգեստները հագաւ, ու թագաւորին տանը ներքին գաւիթին մէջ` թագաւորրին տանը դիմաց կայնեցաւ. և թագաւորը թագաւորական պալատին մէջ` պալատին դրանը դիմաց իր թագաւորական աթոռին վրայ նստեր էր: 2Ու երբ թագաւորը Եսթեր թագուհին տեսաւ որ գաւիթին մէջ կը կայնէր, Եսթեր շնորհք գտաւ անոր առջև, և թագաւորը իր ձեռքը եղած ոսկի գաւազանը Եսթերի երկնցուց. ու Եսթեր մօտեցաւ ու գաւազանին ծայրին դպաւ: 3Եւ թագաւորը անոր ըսաւ, Ով Եսթեր թագուհի, քեզի ի՞նչ եղաւ, և ուզածդ ի՞նչ է, մինչև թագաւորութեանը կէսը քեզի տրուի: 4Ու Եսթեր ըսաւ, Եթէ թագաւորը կը հաճի, այսօր թագաւորը Համանի հետ իրեն ըրած կոչունքիս գայ: 5Եւ թագաւորը ըսաւ, Շուտով Համանը կանչեցէք, որպէս զի Եսթերի ըսածը կատարէ. ու թագաւորը Համանի հետ Եսթերի ըրած կոչունքին գնաց: 6Ու երբ գինի կը խմէին, թագաւորը Եսթերի ըսաւ, Ի՞նչ է քու խնդիրքդ. զրուցէ, ու քեզի պիտի տրուի, և ի՞նչ է քու աղաչանքդ. մինչև թագաւորութեանը կէսը պիտի կատարուի: 7Ու Եսթեր պատասխան տուաւ ու ըսաւ, Իմ աղաչանքս ու խնդիրքս այս է: 8Եթէ թագաւորին առջև շնորհք գտայ, ու եթէ թագաւորը կը հաճի իմ խնդիրքս տալու ու իմ աղաչանքս կատարելու, թող թագաւորը ու Համան նորէն իրենց համար ընելու կոչունքիս գան, ու վաղը թագաւորին խօսքին պէս կ’ընեմ:

Համան Մուրթքէն մեռցնել կը ծրագրէ

9Եւ Համան այն օրը զուարթ և ուրախ սրտով դուրս ելաւ. բայց երբ Համան թագաւորին դրանը մէջ Մուրթքէն տեսաւ, որ իրեն ոտք չէր ելլեր ու իր տեղէն չէր շարժեր, Համանի սիրտը շատ նեղացաւ Մուրթքէի վրայ: 10Բայց Համան ինքզինք զսպելով իր տունը գնաց. ու մարդ ղրկեց իր բարեկամները ու կինը Զերէսը կանչել տուաւ: 11Եւ Համան պատմեց անոնց իր հարստութեանը փառքը ու իր որդիներուն շատութիւնը, և այն ամէն բաները` որոնցմով թագաւորը զինք մեծցուցեր էր, և թէ ի°նչպէս իշխաններէն ու թագաւորին ծառաներէն աւելի բարձրացուցեր էր: 12Ու Համան ըսաւ, Նաև Եսթեր թագուհին թագաւորին հետ ինծմէ զատ մէ՛կը չհրաւիրեց իր ըրած կոչունքին. ու վաղուան համար ալ զիս թագաւորին հետ հրաւիրեց: 13Բայց այս ամէնէն բնաւ գոհ չեմ, քանի որ Հրեայ Մուրթքէն թագաւորին դուռը նստած կը տեսնեմ: 14Եւ անոր կինը Զերէս ու անոր բոլոր բարեկամները անոր ըսին, Յիսուն կանգուն բարձրութեամբ փայտ մը թող շինուի, ու վաղը առտու թագաւորին ըսէ, որ Մուրթքէ անոր վրայ կախուի. և դուն թագաւորին հետ ուրախ սրտով կոչունքը գնա: Ու այս խօսքը Համանի հաճոյ երևցաւ, ու փայտը պատրաստեց: