Համան մահուան կը դատապարտուի

1Եւ թագաւորը Համանի հետ Եսթեր թագուհիին քով կոչունքի գնաց: 2Ու թագաւորը երկրորդ օրն ալ գինի խմելու ատեն Եսթերի ըսաւ, Ով Եսթեր թագուհի, ի՞նչ է քու խնդիրքդ. զրուցէ, ու քեզի պիտի տրուի. և ի՞նչ է քու աղաչանքդ. մինչև թագաւորութեանը կէսը պիտի կատարուի: 3Ու Եսթեր թագուհին պատասխան տուաւ ու ըսաւ, Եթէ քու առջևդ շնորհք գտայ, ով թագաւոր, ու եթէ թագաւորին հաճոյ կ’երևնայ, խնդիրքովս իմ հոգիս` ու աղաչանքովս իմ ազգս ինծի տրուի. 4Վասն զի թէ՛ ես և թէ՛ իմ ազգս կոտրուելու, մեռնելու ու բնաջինջ ըլլալու ծախուեցանք. ու եթէ ծառայ ու աղախին ըլլալու ծախուէինք, բան մը չէի խօսեր. թէպէտև թշնամին թագաւորին քաշած վնասը չէր կրնար հատուցանել: 5Եւ Ասուերոս թագաւորը խօսեցաւ, ու Եսթեր թագուհիին ըսաւ, Ո՞վ է անիկա, և ո՞ւր է անիկա, որ այս բանը ընելու համարձակեցաւ: 6Եւ Եսթեր ըսաւ, Հակառակորդը ու թշնամին այս չար Համանն է. ու Համան թագաւորին ու թագուհիին երեսէն խիստ վախցաւ: 7Եւ թագաւորը գինի խմելէն բարկութեամբ ելաւ, պալատին պարտէզը գնաց. բայց Համան հոն մնաց, որպէս զի իր անձին համար Եսթեր թագուհիին աղաչէ. վասն զի տեսաւ որ իր վրայ չարիքը հասած է թագաւորէն: 8Ու թագաւորը երբ պալատին պարտէզէն կոչունքին սենեակը դարձաւ, Համան Եսթերի եղած բազմոցին վրայ ինկած էր. ու թագաւորը ըսաւ, Միթէ իմ տանս մէջ իմ քովս թագուհի՞ն ալ պիտի բռնադատէ. այս խօսքը թագաւորին բերնէն ելածին պէս Համանի երեսը ծածկեցին: 9Այն ատեն Արբոնա, ներքինիներէն մէկը, թագաւորին առջև ըսաւ, Ահա այն յիսուն կանգուն բարձր փայտը, զոր Համան` թագաւորին բարերարութիւն ընող Մուրթքէի համար պատրաստեց, Համանի տանը մէջ կը կենայ, Ու թագաւորը ըսաւ, Զանիկա անոր վրայ կախեցէք: 10Եւ Համանը Մուրթքէի համար պատրաստած փայտին վրայ կախեցին: Այն ատեն թագաւորին բարկութիւնը իջաւ: