Եգիպտացիներու անգթութիւնը

1Եւ Եգիպտոս գացող Իսրայէլի որդիներուն անունները ասոնք են. ամէն մէկը իր տունովը Յակոբի հետ գնաց. 2Ռուբէն, Շմաւոն, Ղեւի ու Յուդա, 3Իսաքար, Զաբուղոն և Բենիամին, 4Դան ու Նեփթաղիմ, Գադ ու Ասեր: 5Եւ Յակոբի երանքէն ելած բոլոր հոգիները եօթանասուն հոգի էին. Յովսէփ ալ Եգիպտոս էր: 6Եւ Յովսէփ ու անոր բոլոր եղբայրները և բոլոր այն ազգը մեռան: 7Եւ Իսրայէլի որդիները աճեցան ու բազմացան և շատցան ու խիստ զօրացան. և այն երկիրը անոնցմով լեցուեցաւ: 8Արդ Եգիպտոսի վրայ նոր թագաւոր մը ելաւ, որ Յովսէփը չէր ճանչնար: 9Եւ անիկա ըսաւ իր ժողովուրդին, Ահա Իսրայէլի որդիներուն ժողովուրդը մեզմէ շատ ու զօրաւոր են. 10Եկէք իմաստութիւն բանեցնենք անոնց դէմ, որ չըլլայ թէ շատնան, ու երբ պատերազմ պատահելու ըլլայ, անոնք ալ մեր թշնամիներուն հետ միանան, ու մեզի դէմ պատերազմին, և այս երկրէն ելլէն: 11Անոր համար գործավարներ դրին անոնց վրայ, որպէս զի չարչարեն զանոնք իրենց ծանր գործերովը. և Փարաւոնի շտեմարանի քաղաքներ, Փիթօմը ու Ռամսէսը, շինեցին: 12Եւ որչափ կը չարչարէին զանոնք, այնչափ ալ աւելի կը շատանային ու կ’աճէին. և անոնք Իսրայէլի որդիներէն ձանձրացան: 13Եւ Եգիպտացիք բռնութեամբ կը ծառայեցնէին Իսրայէլի որդիները: 14Եւ անոնց կեանքը ծանր գործով, կաւով ու աղիւսներով և դաշտին ամէն գործովը կը դառնացնէին. ինչ ծառայութիւն որ անոնց ընել տային՝ բռնութեամբ էր: 15Եւ Եգիպտոսի թագաւորը խօսեցաւ Եբրայեցւոց մանկաբարձներուն, որոնց մէկուն անունը Սեփրա ու միւսին անունը Փուա էր, 16Ու ըսաւ, Եբրայեցի կիներուն տղաքը առած ատեննիդ՝ նստարաններուն վրայ նայիք, եթէ տղայ է՝ մեռցնէք զանիկա, և եթէ աղջիկ է՝ թող ողջ մնայ: 17Բայց մանկաբարձները Աստուծմէ վախցան, ու Եգիպտոսի թագաւորին իրենց ըսածին պէս չըրին. հապա արուները ողջ կը թողուին: 18Եւ Եգիպտոսի թագաւորը կանչեց մանկաբարձները, ու ըսաւ անոնց, Ինչո՞ւ այս բանը ըրիք, ու արուները ողջ թողուցիք: 19Եւ մանկաբարձները ըսին Փարաւոնի, Քանզի Եբրայեցի կիները Եգիպտացի կիներուն պէս չեն. վասն զի առոյգ են. մանկաբարձը անոնց չգացած՝ կը ծնանին: 20Անոր համար Աստուած մանկաբարձներուն բարիք ըրաւ. և ժողովուրդը շատցաւ ու խիստ զօրացաւ: 21Եւ եղաւ որ մանկաբարձներուն Աստուծմէ վախնալուն համար, անոնց տուներ շինեց: 22Եւ Փարաւոն իր բոլոր ժողովուրդին հրամայեց՝ ըսելով, Ամէն ծնած տղան գետը նետեցէք, և ամէն աղջիկը ողջ թողուցէք: