Ապառաժէն՝ ջուր

1Եւ Իսրայէլի որդիներուն բոլոր ժողովքը Տէրոջը խօսքին պէս իրենց գնացքին համեմատ Սին անապատէն չուեցին, և Ռափիդիմի մէջ բանակ դրին. ու ժողովուրդին համար խմելու ջուր չկար: 2Եւ ժողովուրդը Մովսէսի հետ վիճեցաւ ու ըսաւ, Մեզի ջուր տուր, որ խմենք. և Մովսէս ըսաւ անոնց, Ինչո՞ւ ինծի հետ կը վիճիք, ինչո՞ւ Տէրը կը փորձէք: 3Եւ ժողովուրդը հոն ջուրի համար ծարաւեցաւ. ու ժողովուրդը Մովսէսի դէմ տրտունջ ըրաւ ու ըսաւ, Ինչո՞ւ համար մեզ Եգիպտոսէ հանեցիր, որ մեզ ու մեր որդիները և մեր հօտերը ծարաւութեամբ մեռցնես: 4Եւ Մովսէս Տէրոջը աղաղակեց՝ ըսելով, Ի՞նչ ընեմ այս ժողովուրդին գրեթէ պատրաստ են զիս քարկոծելու: 5Եւ Տէրը ըսաւ Մովսէսի, Ժողովուրդին առջև անցիր, ու Իսրայէլի ծերերէն քեզի հետ առ, և քու գաւազանդ, որով գետը զարկիր, ձեռքդ առ ու գնա: 6Ահա Քորեբի մէջ ժայռին վրայ՝ հոն քու առջեւդ կը կայնիմ, և ժայռին զարկ, ու անկէ ջուր պիտի ելլէ, և ժողովուրդը պիտի խմէ: Եւ Մովսէս այնպէս ըրաւ Իսրայէլի ծերերուն առջև: 7Եւ այն տեղին անունը Մասսա ու Մերիպա* դրաւ. վասն զի Իսրայէլի որդիները հոն վիճեցան, և Տէրը փորձեցին՝ ըսելով, Արդեօք Տէրը մեր մէ՞ջ է՝ թէ ոչ:

Պատերազմ Ամաղէկի հետ

8Այն ատեն Ամաղէկ եկաւ, ու Ռափիդիմի մէջ Իսրայէլի հետ պատերազմեցաւ: 9Եւ Մովսէս ըսաւ Յեսուի, Մեզի մարդիկ ընտրէ, ու Ամաղէկի հետ պատերազմելու ելիր. վաղը ես բլուրին գլուխը պիտի կայնիմ՝ Աստուծոյ գաւազանը ձեռքս ունենալով : 10Եւ Յեսու Մովսէսի ըսածին պէս ըրաւ, ու Ամաղէկի հետ պատերազմեցաւ. և Մովսէս, Ահարոն ու Ովր բլուրին գլուխը ելան: 11Եւ կ’ըլլար որ երբ Մովսէս իր ձեռքերը վեր կը վերցնէր, Իսրայէլ կը յաղթեր, ու երբ իր ձեռքերը վար կ’իջեցներ, Ամաղէկ կը յաղթէր: 12Եւ Մովսէսի ձեռքերը ծանրանալուն՝ քար մը առին ու անոր տակ դրին, և ինք անոր վրայ նստաւ. ու Ահարոն և Ովր, մէկը մէկ կողմէն ու միւսը միսւ կողմէն, անոր ձեռքերը վեր բռնեցին, ու մինչև արեգակին մարը մտնելը անոր ձեռքերը հաստատուն մնացին: 13Եւ Յեսու սուրի բերնէ անցուց Ամաղէկը ու անոր ժողովուրդը: 14Եւ Տէրը ըսաւ Մովսէսի, Ասիկա յիշատակի համար գրքի մէջ գրէ, ու Յեսուի իմացուր՝ որ Ամաղէկի յիշատակը երկինքի տակէն բոլորովին պիտի ջնջեմ: 15Եւ Մովսէս սեղան մը շինեց, ու անոր անունը Եհովանիսի դրաւ, 16Ու ըսաւ, Քանզի Տէրը երդում ըրաւ՝ ըսելով թէ* Տէրը ազգէ ազգ պիտի պատերազմի Ամաղէկի դէմ: