Իսրայէլ Սինա լեռան քով

1Երրորդ ամսուն մէջ՝ Իսրայէլի որդիներուն Եգիպտոսի երկրէն ելլելէն ետքը, նոյն օրը Սինայի անապատը եկան։ 2Քանզի Ռափիդիմէ չուեցին, ու Սինայի անապատը եկան, ու անապատին մէջ բանակ դրին. և Իսրայէլ հոն լեռանը դիմաց բանակ դրաւ։ 3Եւ Մովսէս Աստուծոյ ելաւ. ու Տէրը լեռնէն կանչեց զանիկա՝ ըսելով, Յակոբի տանը այսպէս ըսես, և Իսրայէլի որդիներուն իմացնես. 4Դուք տեսաք ինչ որ ըրի Եգիպտացւոց, և ինչպես ձեզ արծիւի թեւերուն վրայ վերցուցի ու քովս բերի։ 5Եւ հիմա եթէ իրաւցընէ իմ ձայնիս հնազանդիք ու իմ ուխտս պահէք, դուք ինծի սեպհական ժողովուրդ պիտի ըլլաք ամէն ազգերէն. վասն զի բոլոր երկիր իմս է։ 6Եւ դուք ինծի քահանաներու թագաւորութիւն ու սուրբ ազգ մը պիտի ըլլաք. Իսրայէլի որդիներուն զրուցելու խօսքերդ ասոնք են։ 7Եւ Մովսէս եկաւ ու ժողովուրդին ծերերը կանչեց, և Տէրոջը իրեն պատուիրած այս բոլոր խօսքերը անոնց առջև դրաւ։ 8Եւ բոլոր ժողովուրդը միաբերան պատասխանեցին ու ըսին, Տէրոջը բոլոր ըսածները պիտի ընենք։ Եւ Մովսէս ժողովուրդին խօսքերը Տէրոջը դարձուց։ 9Եւ Տէրը ըսաւ Մովսէսի, Ահա ես քեզի կու գամ թանձր ամպի մը մէջ, որպէս զի ժողովուրդը լսէ՝ երբ ես քեզի հետ խօսիմ, ու նաև յաւիտեան քեզի հաւատայ։ Եւ Մովսէս ժողովուրդին խօսքերը Տէրոջը պատմեց։ 10Եւ Տէրը ըսաւ Մովսէսի, Գնա ժողովուրդին, և զանոնք սրբէ այսօր ու վաղը, և թող իրենց լաթերը լուան, 11Ու երրորդ օրուան համար պատրաստ ըլլան. քանզի երրորդ օրը Տէրը բոլոր ժողովուրդին աչքին առջև Սինա լեռան վրայ պիտի իջնէ. 12Եւ դուն ժողովուրդին բոլորտիքը սահման դնես՝ ըսելով, Ինքզինքնիդ լեռը ելլելէն կամ անոր ծայրին դպչելէն զգուշացուցէք. ով որ լեռանը դպչի, անշուշտ պիտի մեռցուի: 13Անոր ձեռք չդպչի. քանզի դպչողը անպատճառ պիտի քարկոծուի կամ նետով զանուի. թէ՛ անասուն ըլլայ և թէ՛ մարդ, պիտի չապրի. երբ փողին ձայնը երկար հնչուի, անոնք լեռը պիտի ելլեն: 14Եւ Մովսէս լեռնէն դէպ ի ժողովուրդը իջաւ, ու սրբեց ժողովուրդը. և անոնք իրենց լաթերը լուացին: 15Եւ անիկա ըսաւ ժողովուրդին, Երրորդ օրուան համար պատրաստ եղէք. ձեր կիներուն մի մերձենաք: 16Եւ եղաւ որ երրորդ օրը առտուանց որոտումներ ու կայծակներ կ’ըլլային և թանձր ամպ մը կար լեռանը վրայ, ու խիստ սաստիկ փողի ձայն մը, և բանակին մէջ եղած բոլոր ժողովուրդը զարհուրեցաւ: 17Եւ Մովսէս բանակէն Աստուծոյ առջև հանեց ժողովուրդը, և անոնք լեռանը տակ կայնեցան: 18Եւ Սինա լեռը բոլորովին կը մխար, վասն զի Տէրը անոր վրայ կրակով իջաւ, ու անոր մուխը հնոցի մուխի պէս կ’ելլէր, և բոլոր լեռը սաստիկ կը դողար: 19Եւ քանի որ փողին ձայնը շատ կը սաստկանար, Մովսէս խօսեցաւ, ու Աստուած ձայնով մը անոր պատասխան տուաւ: 20Եւ Տէրը Սինա լեռանը վրայ՝ լեռանը գլուխը իջաւ. ու Տէրը կանչեց Մովսէսը լեռանը գլուխը, և Մովսէս ելաւ: 21Եւ Տէրը ըսաւ Մովսէսի, Իջիր, ժողովուրդին պատուիրէ, որ չըլլայ թէ Տէրը տեսնելու համար սահմանէն անցնին, ու անոնցմէ շատերը կորսուին: 22Եւ Տէրոջը մօտեցող քահանաներն ալ սրբուին, որ չըլլայ թէ Տէրը անոնց վրայ յարձակի: 23Եւ Մովսէս ըսաւ Տէրոջը, Ժողովուրդը չկրնար ելլել Սինա լեռը, վասն զի դուն մեզի պատուիրեցիր՝ ըսելով, Սահման դիր լեռանը ու զանիկա սրբէ: 24Եւ Տէրը ըսաւ անոր, Գնա, վար իջիր, ու Ահարոնի հետ մէկտեղ ելիր. բայց քահանաները ու ժողովուրդը Տէրոջը ելլելու համար սահմանէն չանցնին, որ չըլլայ թէ անոնց վրայ յարձակի: 25Ու Մովսէս ժողովուրդին իջաւ, և այնպէս խօսեցաւ անոնց: