Մովսէսին ծնունդը

1Եւ Ղեւիի տունէն մէկը գնաց, ու Ղեւիի մէկ աղջիկը կին առաւ։ 2Եւ կինը յղացաւ, ու որդի մը ծնաւ. և անոր գեղեցիկ ըլլալը տեսնելով՝ երեք ամիս պահեց զանիկա։ 3Եւ երբ ա՛լ չէր կրնար պահել զանիկա, պրտուեղէն տապանակ մը առաւ անոր համար, և կպրով ու ձիւթով ծեփեց, և տղան մէջը դրաւ, ու գետին եզերքը եղած շամբին մէջ ձգեց։ 4Եւ անոր քոյրը հեռու կայնեցաւ, որպէս զի տեսնէ թէ ի՛նչ պիտի պատահի անոր։ 5Եւ Փարաւոնի աղջիկը գետը իջաւ լուացուելու, և անոր աղախինները գետին եզերքը կը պտըտէին. և երբ անիկա շամբին մէջտեղը տապանակը տեսաւ, իր աղախինը ղրկեց, որ բերաւ զանիկա։ 6Եւ երբ բացաւ, տղան տեսաւ, և ահա տղան կու լար. և խղճաց անոր վրայ, ու ըսաւ, Ասիկա Եբրայեցւոց տղաքներէն է։ 7Ետքը անոր քոյրը ըսաւ Փարաւոնի աղջկան, Երթամ ու քեզի Եբրայեցիներէն ծիծ տուող կին մը կանչե՞մ, որ տղան սնուցանէ քեզի համար։ 8Եւ Փարաւոնի աղջիկը ըսաւ անոր, Գնա. և աղջիկը գնաց, ու տղուն մայրը կանչեց։ 9Եւ Փարաւոնի աղջիկը ըսաւ անոր, Առ այս տղան՝ որ սնուցանես ինծի համար, ու ես քու վարձքդ կու տամ. և կինը առաւ տղան ու սնուց զանիկա։ 10Երբ տղան մեծցաւ, Փարաւոնի աղջկան բերաւ զանիկա, ու անոր որդին եղաւ. և անոր անունը Մովսէս դրաւ, ու ըսաւ, Քանզի ջուրէն հանեցի զանիկա։ 11Եւ այն օրերը երբ Մովսէս մեծցաւ, իր եղբայրներուն ելաւ, ու անոնց ծանր գործերուն նայեցաւ. և տեսաւ Եգիպտացի մը՝ որ իր Եբրայեցի եղբայրներէն մէկը կը ծեծէր։ 12Եւ երբ անդին ասդին նայելով տեսաւ որ մէ՛կը չկայ, մեռցուց Եգիպտացին, ու աւազին մէջ թաղեց զանիկա։ 13Եւ հետեւեալ օրը ելաւ, և ահա երկու Եբրայեցի մարդիկ կը կռուէին իրարու հետ, և ըսաւ անոր որ իրաւունք չունէր, Ինչո՞ւ քու ընկերիդ կը զարնես։ 14Եւ անիկա ըսաւ, Ո՞վ քեզ մեր վրայ իշխան ու դատաւոր դրաւ. զի՞ս ալ մեռցնելու միտք ունիս, ինչպէս Եգիպտացին մեռցուցիր։ Եւ Մովսէս վախցաւ ու ըսաւ, Անշուշտ այս բանը իմացուած է։ 15Եւ երբ Փարաւոն լսեց այս բանը, Մովսէսը մեռցնել կ’ուզէր, բայց Մովսէս Փարաւոնի երեսէն փախաւ, ու Մադիամու երկիրը բնակեցաւ. և հորի մը քով նստաւ։ 16Եւ Մադիամու քուրմը եօթը աղջիկ ունէր. ու անոնք եկան և ջուր քաշեցին, ու իրենց հօրը հօտը խմցնելու համար աւազանները լեցուցին։ 17Եւ հոíիվները եկան ու վռնտեցին զանոնք. և Մովսէս ելաւ ու օգնեց անոնց, և անոնց հօտին ջուր խմցուց։ 18Եւ երբ անոնք իրենց հօրը Ռագուէլի եկան, անիկա ըսաւ, Այսօր ի՞նչ պատճառաւ շուտ եկաք։ 19Եւ ըսին, Եգիպտացի մը մեզ հովիíներուն ձեռքէն ազատեց, ու մեզի ալ շատ ջուր քաշեց, ու հօտին խմցուց։ 20Ան ալ ըսաւ իր աղջիկներուն, Եւ ո՞ւր է անիկա. ինչո՞ւ այն մարդը այդպէս թող տուիք. կանչեցէք զանիկա՝ որպէս զի հաց ուտէ։ 21Եւ Մովսէս հաճեցաւ այն մարդուն հետ բնակիլ, ու անիկա իր Սեպփօրա աղջիկը Մովսէսի տուաւ։ 22Եւ կինը որդի մը ծնաւ, և անիկա անոր անունը Գերսամ դրաւ. քանզի ըսաւ, Պանդուխտ եղայ օտար երկրի մէջ։ 23Եւ եղաւ որ շատ օրերէն ետքը Եգիպտոսի թագաւորը մեռաւ, և Իսրայէլի որդիները ծառայութեան պատճառաւ հառաչեցին ու աղաղակեցին. և ծառայութեան համար անոնց աղաղակը Աստուծոյ ելաւ։ 24Եւ Աստուած անոնց հեծութիւնը լսեց. ու Աստուած յիշեց իր ուխտը՝ զոր Աբրահամի, Իսահակի ու Յակոբի հետ ըրեր էր ։ 25Եւ Աստուած նայեցաւ Իսրայէլի որդիներուն վրայ, ու Աստուած գիտցաւ անոնց վիճակը։