Արդարութիւն

1Սուտ լուր չտանիս. անօրէնի հետ ձեռքդ չդնես անիրաւ վկայ ըլլալով, 2Չարութիւն ընելու համար բազմութեան չհետեւիս. ու դատաստանի մէջ իրաւունքը ծռելու համար շատերուն կողմը խոտորելով՝ խօսք չխօսիս: 3Եւ աղքատին աչառութիւն չընես իր դատին մէջ: 4Եթէ քու թշնամիիդ մոլորած եզին կամ իշուն հանդիպելու ըլլաս, անշուշտ իրեն դարձնես զանիկա: 5Եթէ քեզ ատողին էշը բեռի տակ ինկած տեսնես, ու զանիկա ազատելէն հրաժարելու ալ ըլլաս, անշուշտ անոր հետ էշը ազատես: 6Քու աղքատիդ դատին մէջ անոր իրաւունքը չծռես: 7Սուտ խօսքէն հեռու կեցիր, և անմեղը ու արդարը մի մեռցներ. վասն զի ես չարը պիտի չարդարացնեմ: 8Եւ կաշառք չառնես. վասն զի կաշառքը աչքը բաց մարդիկը կը կուրացնէ, և արդարներուն խօսքերը կը խանգարէ: 9Եւ օտարականը մի նեղեր. վասն զի դուք օտարականին սիրտը գիտէք. որովհետև դուք ալ Եգիպտոսի երկրին մէջ օտարական էիք:

Յօթներորդ տարին և օրը

10Եւ քու երկիրդ վեց տարի սերմանես, ու անոր արդիւնքը ժողվես. 11Բայց եօթներորդ տարին անգործ ձգես ու թողուս զայն, որպէս զի քու ժողովուրդիդ աղքատները ուտեն, և անոնցմէ մնացածը դաշտին անասունները ուտեն. քու այգիիդ ու ձիթաստանիդ ալ այսպէս ընես: 12Վեց օր քու գործդ գործէ, ու եօթներորդ օրը հանգստացիր, որպէս զի քու եզդ ու էշդ հանգստանայ, և քու աղախինիդ որդին ու օտարականը շունչ առնէ: 13Եւ բոլոր ձեզի զրուցածներուս մէջ զգուշաւոր ըլլաք, և ուրիշ աստուածներուն անունը չյիշէք. ձեր բերնէն անգամ չլսուի:

Երեք մեծ տօներ

14Տարին երեք անգամ ինծի տօն պահէ: 15Բաղարջակերաց տօնը պահէ. քեզի պատուիրածիս պէս եօթը օր անխմոր հաց պիտի ուտես Ապիպ ամսուն մէջ սահմանուած ժամանակին. վասն զի այն ամսուն մէջ Եգիպտոսէ ելար. և բնաւ մէկը ձեռքը դատարկ չերեւնայ իմ առջեւս: 16Եւ արտին մէջ ցանելու աշխատութեանդ երախայրի պտուղը հնձելու տօնը ու տարւոյն վերջը ժողվելու տօնը պահէս , երբ արտէն քու աշխատութիւնդ կը ժողվես: 17Տարին երեք անգամ քու ամէն արուներդ Տէր Եհովայի առջև պիտի երեւնան: 18Իմ զոհիս արիւնը խմորեալ հացով չմատուցանես, ու իմ տօնիս ճարպը մինչև առտու պիտի չմնայ: 19Քու երկրիդ առաջին երախայրիները քու Տէր Աստուծոյդ տունը տանիս: Ուլը իր մօրը կաթին մէջ չեփես:

Խոստումներ և ուսուցումներ

20Ահա քու առջեւէդ հրեշտակ մը կը ղրկեմ, որ քեզ ճամբուն մէջ պահպանէ, ու իմ պատրաստած տեղս տանի քեզ: 21Անկէ զգուշացիր, ու անոր խօսքը մտիկ ըրէ, անոր անհնազանդ մի ըլլար. վասն զի անիկա ձեր յանցանքը պիտի չներէ, քանզի իմ անունս անոր վրայ է: 22Բայց եթէ ուշադրութեամբ անոր խօսքը մտիկ ընես, ու իմ բոլոր ըսածս ընես, այն ատեն քու թշնամիներուդ թշնամի պիտի ըլլամ, և քու հակառակորդներուդ հակառակորդ: 23Քանզի իմ հրեշտակս քու առջեւէդ պիտի երթայ, և քեզ Ամօրհացւոց ու Քետացւոց և Փերեզացւոց ու Քանանացւոց, Խեւացւոց ու Յեբուսացւոց պիտի տանի. և ես պիտի ջարդեմ զանոնք: 24Անոնց աստուածներուն երկրպագութիւն կամ ծառայութիւն չընես, ու անոնց ըրածին պէս չընես. հապա բոլորովին կործանես զանոնք, ու անոնց կուռքերը բոլորովին կոտրտես: 25Եւ ձեր Տէր Աստուածը պաշտէք, ու ինք ձեր հացը ու ջուրը պիտի օրհնէ, և ձեր մէջէն հիւանդութիւնը պիտի վերցնեմ: 26Քու երկրիդ մէջ վիժող ու ամուլ պիտի չըլլայ. քու օրերուդ թիւը պիտի լեցնեմ: 27Իմ երկիւղս քու առջեւէդ պիտի ղրկեմ, և պիտի կորսնցնեմ այն բոլոր ժողովուրդը որու դուն կ’երթաս, ու քու բոլոր թշնամիներուդ կռնակը քեզի պիտի դարձնեմ: 28Եւ քու առջեւէդ իշամեղուն պիտի ղրկեմ, որպէս զի Խեւացիները, Քանանացիները ու Քետացիները քու առջեւէդ վռնտէ: 29Անոնք քու առջեւէդ մէկ տարուան մէջ պիտի չվռնտեմ, որ չըլլայ թէ երկիրը ամայի ըլլայ, ու քու վրադ դաշտին գազանները շատնան: 30Զանոնք քու առջեւէդ կամաց կամաց պիտի վռնտեմ, մինչև որ դուն բազմանաս ու երկիրը ժառանգես: 31Եւ քու սահմաններդ Կարմիր ծովէն մինչև Փղշտացւոց ծովը, ու անապատէն մինչև Եփրատ գետը պիտի դնեմ. վասն զի այն երկրին բնակիչները քու ձեռքդ պիտի տամ. ու զանոնք քու առջեւէդ վռնտես: 32Անոնց հետ ու անոնց աստուածներուն հետ ուխտ չընես: 33Քու երկրիդ մէջ չբնակին, որպէս զի քեզի մեղք գործել չտան ինծի դէմ. վասն զի եթէ անոնց աստուածները պաշտես, անշուշտ այն քեզի որոգայթ պիտի ըլլայ: