Ահարոնին և որդիներուն ձեռնադրութեան հրահանգներ (Ղեւտ.8:1-36)

1Եւ այս է զոր անոնց պիտի ընես զանոնք սրբելու համար, որպէս զի ինծի քահանայ ըլլան. արջառներէն զուարակ մը ու երկու անարատ խոյ առնես, 2Եւ անխմոր հաց ու իւղով շաղուած անխմոր շօթեր և իւղով օծուած անխմոր լաւաշներ առնէս . ասոնք ցորենի բարակ ալիւրէն շինես. 3Եւ սակառի մը մէջ դնես. ու զանոնք սակառին մէջ, և զուարակը ու երկու խոյերը մօտեցնես։ 4Եւ Ահարոն ու անոր որդիները ժողովքի խորանին դրանը մօտեցնես, ու զանոնք ջրով լուաս։ 5Եւ զգեստները պիտի առնես, ու շապիկը և եփուտին պատմուճանը ու եփուտը և լանջապանակը Ահարոնի պիտի հագցնես. ու եփուտին ժապաւէնովը գօտեւորես զանիկա: 6Եւ խոյրը անոր գլուխը դնես, ու խոյրին վրայ սուրբ պսակը դնես: 7Եւ օծման իւղը առնես, ու անոր գլխուն վրայ թափելով՝ օծես զանիկա: 8Եւ անոր որդիները մօտեցնես, ու անոնց շապիկներ հագցնես: 9Եւ գօտիներով գօտեւորես զանոնք, այսինքն Ահարոնը ու անոր որդիները, ու անոնց գլուխը ապարօշներ փաթթես. ու քահանայութիւնը անոնցը ըլլայ յաւիտենական կանոնով: Այսպէս պիտի օրհնես Ահարոնը ու անոր որդիները: 10Եւ զուարակը ժողովքի խորանին առջև մօտեցնես, ու Ահարոն և անոր որդիները իրենց ձեռքը զուարակին գլխուն վրայ դնեն: 11Եւ ժողովքի խորանին դրանը քով ՝ Տէրոջ առջև մորթես զուարակը: 12Եւ զուարակին արիւնէն առնես, ու մատովդ սեղանին եղջիւրներուն վրայ դնես, և մնացած բոլոր արիւնը սեղանին տակովը թափես: 13Եւ փորոտիքը ծածկող ամէն ճարպը ու լեարդին վրայ եղած թաղանթը և երկու երիկամունքը ու անոնց վրայ եղած ճարպը առնես, և սեղանին վրայ այրես: 14Բայց զուարակին միսը ու անոր մորթը և անոր աղբը բանակին դուրսիդին կրակով այրես. այս մեղքի պատարագ է: 15Եւ խոյերուն մէկը առնես, և Ահարոնը ու անոր որդիները իրենց ձեռքերը խոյին գլխուն վրայ դնեն: 16Եւ այն խոյը մորթես, ու անոր արիւնը առնես, և սեղանին վրայ շուրջանակի սրսկես: 17Եւ խոյը կտոր կտոր ընես, ու անոր փորոտիքը և անոր ոտքերը լուաս, ու զանոնք անոր կտորներուն և գլխուն վրայ դնես: 18Եւ բոլոր խոյը այրես սեղանին վրայ. այս ողջակէզ է Տէրոջը. անուշահոտ պատարագ մըն է Տէրոջը: 19Եւ միւս խոյը առնես. ու Ահարոն և անոր որդիները իրենց ձեռքերը խոյին գլխուն վրայ դնեն: 20Եւ խոյը մորթես, ու անոր արիւնէն առնես, և Ահարոնի աջ ականջին բլթակին վրայ ու անոր որդիներուն աջ ականջներուն բլթակին վրայ և անոնց աջ ձեռքին մեծ մատին վրայ ու անոնց աջ ոտքին մեծ մատին վրայ դնես. և մնացած արիւնը սեղանին վրայ շուրջանակի սրսկես: 21Եւ սեղանին վրայ եղած արիւնէն ու օծման իւղէն առնես, և Ահարոնի վրայ ու անոր զգեստներուն վրայ և անոր հետ իր որդիներուն վրայ ու իր որդիներուն զգեստներուն վրայ սրսկես. և անիկա ու անոր զգեստները և անոր հետ իր որդիները ու իր որդիներուն զգեստները սուրբ պիտի ըլլան: 22Եւ խոյէն առնես ճարպը ու դմակը և փորոտիքը ծածկող ճարպը և լեարդին վրայի թաղանթը ու երկու երիկամունքը և անոնց վրայ եղած ճարպը ու աջ զիստը. վասն զի այս քահանայի օրհնութեան խոյն է: 23Եւ Տէրոջը առջև եղած անխմոր հացի սակառէն մէկ պան հացի ու մէկ իւղով հացի շօթ և մէկ լաւաշ առնէս . 24Եւ ամէնը Ահարոնի ձեռքը ու անոր որդիներուն ձեռքը դնես, և զանոնք Տէրոջը առջև երերցնելու ընծայ մատուցանես: 25Եւ անոնց ձեռքէն առնես զանոնք, ու սեղանին վրայի ողջակէզին վրայ այրես Տէրոջը առջև անոյշ հոտի համար. ասիկա պատարագ մըն է Տէրոջը: 26Եւ Ահարոնի քահանայ օրհնուելու համար պատրաստուած խոյէն երբուծը առնես, ու զանիկա Տէրոջը առջև երերցնելու ընծայ մատուցանես. և այն քու բաժինդ ըլլայ: 27Եւ Ահարոնի համար ու անոր որդիներուն համար եղած քահանայի օրհնութեան խոյէն երերցնելու երբուծը ու բարձրացնելու զիստը սրբես: 28Եւ ասիկա յաւիտենական կանոնով Ահարոնի ու անոր որդիներուն պիտի ըլլայ Իսրայէլի որդիներուն կողմանէ. վասն զի այս բարձրացնելու ընծայ է, և պիտի ըլլայ բարձրացնելու ընծայ, Իսրայէլի որդիներէն իրենց խաղաղութեան զոհերէն բուն իրենց բարձրացնելու ընծան Տէրոջը: 29Եւ Ահարոնի սուրբ զգեստները իրմէ ետքը իր որդիներուն պիտի ըլլան, որպէս զի անոնցմով օծուին, ու անոնցմով օրհնուին: 30Եւ անիկա որ իր որդիներէն իր տեղ քահանայ ըլլալով՝ սրբարանին մէջ պաշտօն կատարելու համար ժողովքի խորանը պիտի մտնէ, զանոնք եօթը օր հագնի: 31Եւ քահանայի օրհնութեան խոյը առնես, ու անոր միսը սուրբ տեղ մը եփես: 32Եւ Ահարոն ու անոր որդիները ժողովքի խորանին դրանը քով պիտի ուտեն խոյին միսը ու սակառին մէջի հացը: 33Եւ անոնք պիտի ուտեն այն բաները՝ որ իրենց օրհնուելուն ու սրբուելուն համար անոնցմով քաւութիւն եղաւ. և օտարական մը անոնցմէ պիտի չուտէ, վասն զի անոնք սուրբ են: 34Եւ եթէ օրհնութեան միսէն ու հացէն մինչև առտու մնայ, այս աւելցածը կրակով այրես. անիկա պիտի չուտուի, վասն զի սուրբ է: 35Եւ Ահարոնի ու անոր որդիներուն այսպէս ընես, բոլոր քեզի ապսպրածիս պէս. եօթը օրուան մէջ կատարես անոնց օրհնութիւնը: 36Եւ օրը մէկ զուարակ մեղքի պատարագ ընես քաւութեան համար. ու սեղանին համար քաւութիւն ընելու ատենդ մաքրես զանիկա, և սուրբ ընելու համար օծես զանիկա: 37Սեղանին համար եօթը օր քաւութիւն ընես, ու սուրբ ընես զայն. և սեղանը ամենասուրբ պիտի ըլլայ. ինչ որ սեղանին դպչի սուրբ պիտի ըլլայ: Ամենօրեայ ընծաներ (Թուոց 28:1-8) 38Եւ սեղանին վրայ ընելու զոհդ այս է. միշտ ամէն օր մէկ տարեկան երկու գառներ. 39Մէկ գառը առտուանց մատուցանես, ու միւսը գառը իրիկուան դէմ մատուցանես: 40Եւ մէկ գառին հետ մէկ հիմենի քառորդ ծեծուած ձէթով շաղուած մէկ տասանորդ բարակ ալիւր, և թափելու նուէրին համար մէկ հիմենի քառորդ մը գինի մատուցանես: 41Եւ միւս գառը իրիկուան դէմ զոհես. ու առտուան հացի ընծային պէս և անոր թափելու նուէրին պէս ընես անոր. այս անուշահոտ պատարագ մըն է Տէրոջը: 42Ասիկա ձեր ազգերուն մէջ մշտնջենաւոր ողջակէզ պիտի ըլլայ Տէրոջը առջև ժողովքի խորանին դրանը քով , ուր ձեզի պիտի հանդիպիմ՝ քեզի հետ խօսելու: 43Եւ հոն Իսրայէլի որդիներուն պիտի հանդիպիմ, ու խորանը իմ փառքովս սուրբ պիտի ըլլայ: 44Եւ ժողովքի խորանը ու սեղանը պիտի սրբեմ. Ահարոնը ու անոր որդիներն ալ պիտի սրբեմ, որպէս զի ինծի քահանայութիւն ընեն: 45Եւ Իսրայէլի որդիներուն մէջ պիտի բնակիմ, ու անոնց Աստուած պիտի ըլլամ: 46Եւ պիտի գիտնան թէ անոնց Տէր Աստուածը ես եմ, որ անոնց մէջ բնակելու համար Եգիպտոսի երկրէն հանեցի զանոնք. ես եմ անոնց Տէր Աստուածը: