Աստուած Մովսէս կը կանչէ

1Եւ Մովսէս Մադիամու քուրմին իր Յոթոր աներոջ հօտը կ’արածէր. ու հօտը անապատին ետին քշելով Աստուծոյ լեռը, Քորեբ, եկաւ։ 2Եւ Տէրոջը հրեշտակը կրակի բոցով մորենիին մէջէն երեւցաւ անոր. և անիկա տեսաւ որ ահա մորենին կրակով կը վառէր, բայց մորենին չէր սպառեր։ 3Եւ Մովսէս ըսաւ, Հիմա դառնամ ու այս մեծ տեսարանը տեսնեմ՝ թէ ինչու համար մորենին չայրիր։ 4Եւ Տէրը տեսաւ որ անիկա տեսնելու դարձաւ, Աստուած մորենիին մէջէն կանչեց անոր ու ըսաւ, Մովսէս, Մովսէս. և անիկա ըսաւ, Ահա հոս եմ։ 5Եւ Աստուած ըսաւ, Հոս մի մօտենար. կօշիկներդ հանէ քու ոտքերէդ, վասն զի այն տեղը՝ որուն վրայ կայներ ես, սուրբ երկիր է։ 6Նաև ըսաւ անոր, Ես եմ քու հօրդ Աստուածը, Աբրահամի Աստուածը, Իսահակի Աստուածը ու Յակոբի Աստուածը. և Մովսէս իր երեսը պահեց, վասն զի Աստուծոյ նայելու վախցաւ: 7Եւ Տէրը ըսաւ, Եգիպտոսի մէջ եղող ժողովուրդիս չարչարանքը արդարև տեսայ, և գործավարներուն պատճառաւ անոնց վերցուցած աղաղակը լսեցի. վասն զի անոնց նեղութիւնները գիտեմ. 8Եւ զանոնք Եգիպտացւոց ձեռքէն ազատելու, ու զանոնք այն երկրէն աղէկ ու լայնարձակ երկիր մը, կաթ ու մեղր բղխող երկիր մը, Քանանացւոց ու Քետացւոց և Ամօրհացւոց ու Փերեզացւոց և Խեւացւոց ու Յեբուսացւոց տեղը, հանելու իջայ: 9Եւ ահա հիմա Իսրայէլի որդիներուն աղաղակը ինծի հասած է. ու Եգիպտացիներուն անոնց ըրած հարստահարութիւնն ալ տեսայ: 10Ուստի եկուր հիմա՝ քեզ Փարաւոնի ղրկեմ, և իմ ժողովուրդս Իսրայէլի որդիները Եգիպտոսէ հանես: 11Եւ Մովսէս ըսաւ Աստուծոյ, Ես ո՞վ եմ՝ որ Փարաւոնի երթամ, ու Իսրայէլի որդիները Եգիպտոսէ հանեմ: 12Եւ ըսաւ, Անշուշտ ես քեզի հետ պիտի ըլլամ. և այս ըլլայ քեզի նշան՝ որ ես քեզ ղրկեր եմ. երբ ժողովուրդը Եգիպտոսէ հանես, այս լեռանը վրայ պիտի պաշտէք զԱստուած: 13Եւ Մովսէս ըսաւ Աստուծոյ, Ահա ես կ’երթամ Իսրայէլի որդիներուն ու կ’ըսէմ անոնց, Ձեր հայրերուն Աստուածը զիս ձեզի ղրկեց. և երբ ըսեն ինծի թէ Ի՞նչ է անոր անունը, ի՞նչ ըսեմ անոնց: 14Եւ Աստուած ըսաւ Մովսէսի, Ես եմ ՈՐ ԷՆ: Եւ ըսաւ, Այսպէս պիտի ըսես Իսրայէլի որդիներուն. Զիս ՈՐ ԷՆ ղրկեց ձեզի: 15Եւ դարձեալ Աստուած ըսաւ Մովսէսի, Ասյպէս պիտի ըսէս Իսրայէլի որդիներուն. Ձեր հայրերուն Եհովա Աստուածը, Աբրահամի Աստուածը, Իսահակի Աստուածը ու Յակոբի Աստուածը զիս ձեզի ղրկեց. իմ անունս յաւիտեան այս է, և ազգէ ազգ իմ յիշատակս այս է: 16Գնա Իսրայէլի ծերերը մէկտեղ ժողվէ, ու ըսէ անոնց, Ձեր հայրերուն Եհովա Աստուածը, Աբրահամի, Իսահակի ու Յակոբի Աստուածը, երեւցաւ ինծի ըսելով, Արդարև այցելութիւն ըրի ձեզի, ու Եգիպտոսի մէջ ձեր քաշածը տեսայ. 17Ու ըսի որ ձեզ Եգիպտոսի չարչարանքէն դէպ ի Քանանացւոց ու Քետացւոց և Ամօրհացւոց ու Փերեզացւոց և Խեւացւոց ու Յեբուսացւոց երկիրը, կաթ ու մեղր բղխող երկիրը, հանեմ: 18Եւ անոնք քու ձայնիդ մտիկ պիտի ընէն. և դուն ու Իսրայէլի ծերերը Եգիպտոսի թագաւորին պիտի մտնէք, ու ըսէք անոր, Եբրայեցւոց Աստուածը Եհովա մեզի հանդիպեցաւ. և հիմա կ’աղաչենք, երեք օրուան ճամբայ երթանք դէպ ի անապատը, որպէս զի մեր Եհովա Աստուծոյն զոհ մատուցանենք: 19Եւ ես գիտեմ որ Եգիպտոսի թագաւորը պիտի չթողու ձեզ որ երթաք, ոչ ալ* զօրաւոր ձեռքով: 20Եւ ես ձեռքս պիտի երկնցնեմ, ու պիտի զարնեմ Եգիպտոսը իմ ամէն հրաշքներովս զորոնք անոր մէջ պիտի ընեմ. և անկէ ետքը ձեզ պիտի թողու որ երթաք: 21Եւ այս ժողովուրդին շնորհք պիտի տամ Եգիպտացւոց առջև. ու երբ ելլէք, դատարկ պիտի չելլեք. 22Հապա ամէն կին իր դրացիին ու իր տանը մէջ բնակող կնոջմէն արծաթեղէն զարդեր ու ոսկեղէն զարդեր ու հանդերձներ պիտի խնդրէ, և անոնք ձեր որդիներուն ու աղջիկներուն վրայ պիտի դնէք. ու Եգիպտոսը պիտի կողոպտէք: