Տէրոջը ներկայութեան վրանին պաշտօնեաները

1Եւ Տէրը խօսեցաւ Մովսէսի՝ ըսելով, 2Ահա Յուդայի ցեղէն Ովրի որդւոյն Ուրիի որդին Բեսելիէլը անունովը կանչեցի. 3Եւ Աստուծոյ Հոգիովը, իմաստութիւնով ու հանճարով և գիտութիւնով ու ամէն կերպ ճարտարութիւնով լեցուցի զանիկա, 4Որպէս զի վարպետի գործեր հնարելով՝ ոսկիով ու արծաթով և պղնձով գործէ. 5Եւ գամելու համար քարեր բանելով ու փայտեր քանդակելով ամէն կերպ արհեստ բանի: 6Եւ ահա Դանի ցեղէն Աքիսամայի որդին Ողիաբը տուի անոր հետ. ու ամէն իմաստունին սրտին մէջ իմաստութիւն դրի, որպէս զի բոլոր քեզի պատուիրածս ընեն. 7Ժողովքի խորանը, և վկայութեան տապանակը ու անոր վրայ եղած քաւութիւնը, և խորանին բոլոր կարասիները, 8Եւ սեղանը ու անոր անօթները, և մաքուր աշտանակը իր բոլոր գործիքներովը, և խունկին սեղանը, 9Եւ ողջակէզին սեղանը իր բոլոր գործիքներովը, և աւազանը ու անոր խարիսխը, 10Եւ պաշտօնին զգեստները, ու Ահարոն քահանային սուրբ զգեստները, և անոր որդիներուն զգեստները, քահանայութիւն ընելու համար, 11Եւ օծման իւղը, ու սրբարանին համար անուշահոտ խունկը, բոլոր քեզի պատուիրածիս պէս պիտի ընեն:

Շաբաթ՝ հագստութեան օրը

12Եւ Տէրը խօսեցաւ Մովսէսի ու ըսաւ, 13Զրուցէ նաև Իսրայէլի որդիներուն՝ ըսելով, Անշուշտ իմ շաբաթներս պահէք. վասն զի այս նշան մըն է իմ ու ձեր մէջտեղ ձեր ազգերուն մէջ, որպէս զի գիտնաք թէ ձեզ սուրբ ընող Տէրը ես եմ: 14Ուստի շաբաթը պահէք. վասն զի այն ձեզի սուրբ է. ով որ զանիկա պղծէ, անշուշտ պիտի մեռնի. քանզի ամէն ով որ այն օրը գործ մը գործէ, այն անձը իր ժողովուրդին մէջէն պիտի կորսուի: 15Վեց օր գործ պիտի գործուի, բայց եօթներորդ օրը, հանգստութեան շաբաթը, սուրբ պիտի ըլլայ Տէրոջը. ով որ շաբաթ օրը գործ մը գործէ, անշուշտ պիտի մեռցուի: 16Անոր համար Իսրայէլի որդիները պիտի պահեն շաբաթը, որպէս զի շաբաթը իրենց ազգերուն մէջ յաւիտենական ուխտ մը ընեն: 17Անիկա յաւիտենական նշան մըն է իմ ու Իսրայէլի որդիներուն մէջտեղ. քանզի Տէրը վեց օրուան մէջ ստեղծեց երկինքը ու երկիրը, և եօթներորդ օրը դադարեցաւ ու հանգստացաւ: 18Եւ երբ Սինա լեռանը վրայ Մովսէսի հետ խօսիլը լմնցուց, վկայութեան երկու տախտակները տուաւ անոր, Աստուծոյ մատովը գրուած քարէ տախտակներ: