Զոհին սեղանին շինութիւնը

1Եւ ողջակէզի սեղանը Սատիմի փայտէ շինեց. անոր երկայնութիւնը հինգ կանգուն, ու անոր լայնութիւնը հինգ կանգուն, քառակուսի էր, և անոր բարձրութիւնը երեք կանգուն: 2Եւ անոր եղջիւրները չորս անկիւններուն վրայ շինեց. անոր եղջիւրները իրմէ էին. ու պղնձով պատեց զայն: 3Եւ սեղանին բոլոր գործիքները, այսինքն թաղարները և թիակները ու կոնքերը և մսահանները ու կրակի ամանները, շինեց. անոր բոլոր գործիքները պղնձէ շինեց: 4Եւ սեղանին համար անոր շրջանակին տակէն գրեթէ մէջտեղը պղնձէ ցանցակերպ կասկարայ մը շինեց: 5Եւ պղնձէ կասկարային չորս անկինները չորս օղակներ ձուլեց ձողերուն տեղեր ըլլալու համար: 6Եւ ձողերը Սատիմի փայտէ շինեց, ու զանոնք պղնձով պատեց: 7Եւ ձողերը սեղանին քով եղած օղակներուն անցուց, որպէս զի անիկա անոնցմով վերցուի. զանիկա տախտակներով շինեց, ու մէջը դատարկ:

Պղնձէ սեղանին շինութիւնը (Ելից 30:18)

8Եւ պղնձէ աւազանը ու անոր պղնձէ խարիսխը ժողովքի խորանին դուռը խումբերով ժողվուող կիներուն հայելիներէն շինեց:

Տէրոջը ներկայութեան վրանին վարագոյրը (Ելից 27:9-19)

9Եւ սրահը շինեց. հարաւային կողմին համար, սրահին վարագոյրները, մանուած բարակ քթանէ ըլլալով, հարիւր կանգուն էին: 10Անոնց սիւները քսան ու անոնց պղնձէ խարիսխները քսան էին. սիւներուն ճանկերը ու անոնց կապերը արծաթ էին: 11Եւ հիւսիսային կողմին համար վարագոյրները հարիւր կանգուն. անոնց քսան սիւները ու անոնց քսան խարիսխները պղնձէ էին. սիւներուն ճանկերը ու անոնց կապերը արծաթ էին: 12Եւ արեւմտեան կողմին համար՝ վարագոյրները յիսուն կանգուն էին. անոնց սիւները տասը ու անոնց խարիսխները տասն էին. սիւներուն ճանկերը ու անոնց կապերը արծաթ էին: 13Եւ արեւելեան կողմին համար վարագոյրները յիսուն կանգուն էին: 14Դրանը մէկ կողմին վարագոյրները տասնհինգ կանգուն, անոնց սիւները երեք ու անոնց խարիսխները երեք էին: 15Եւ միւս կողմին համար ալ, այսինքն սրահին դրանը մէկ կողմէն ու միւս կողմէն, վարագոյրները տասնհինգ կանգուն, անոնց սիւները երեք ու անոնց խարիսխները երեք էին: 16Սրահին բոլոր վարագոյրները շուրջանակի մանուած բարակ քթանէ էին: 17Եւ սիւներուն խարիսխները պղնձէ, սիւներուն ճանկերը ու անոնց կապերը արծաթէ, և անոնց խոյակները արծաթապատ, ու սրահին բոլոր սիւներն ալ արծաթ կապերով էին: 18Եւ սրահին դրանը վարագոյրը նկարագործ էր, կապուտակէ ու ծիրանեգոյնէ և կրկնակի կարմիրէ ու մանուած բարակ քթանէ. երկայնութիւնը քսան կանգուն, և լայնութիւնը մէջի բարձրութիւնը, սրահին վարագոյրներուն համեմատ, հինգ կանգուն էր: 19Եւ անոնց սիւները չորս, ու անոնց պղնձէ խարիսխները չորս էին, անոնց ճանկերը արծաթէ, և անոնց խոյակները արծաթապատ, ու կապերը արծաթ էին: 20Եւ խորանին ու շուրջանակի սրահին բոլոր ցիցերը պղնձէ էին:

Տէրոջը ներկայութեան վրանին մէջ գործածուած մետաղներ

21Ասիկա է խորանին, այսինքն վկայութեան խորանին, հաշիւը, որ Մովսէսի պատուիրածին պէս՝ Ղեւտացւոց պաշտօնին համար Ահարոն քահանային որդւոյն Իթամարի ձեռքով հաշուեցաւ: 22Եւ Յուդայի ցեղէն Ովրի որդւոյն Ուրիի որդին Բեսելիէլ ըրաւ այն ամէնը զոր Տէրը Մովսէսի պատուիրեց: 23Եւ վարպետ քանդակագործը, և կապուտակով ու ծիրանեգոյնով և կրկնակի կարմիրով ու բարակ քթանով նկարագործողը, Դանի ցեղէն Աքիսամայի որդին Ոողիաբ, անոր հետ էր: 24Այս շինուածքին համար գործածուած բոլոր ոսկին, այսինքն սրբարանին բոլոր շինուածքին նուիրուած ոսկին, սրբարանին սիկղին համեմատ, քսանըինը տաղանդ ու եօթը հարիւր երեսուն սիկղ էր: 25Եւ ժողովքէն համրուողներուն արծաթը, սրբարանին սիկղին համեմատ, հարիւր տաղանդ ու հազար եօթը հարիւր եօթանասունըհինգ սիկղ էր: 26Քսան տարեկանէն վեր համրուելու անցնողներէն ամէն մէկը պէգա մը, այսինքն սրբարանին սիկղին համեմատ, կէս սիկղ տուաւ , վեց հարիւր երեք հազար հինգ հարիւր յիսուն մարդիկ ըլլալով: 27Եւ սրբարանին խարիսխները ու վարագուրին խարիսխները ձուլելու համար հարիւր տաղանդ արծաթ գնաց. մէկ խարիսխը մէկ տաղանդ ըլլալով, հարիւր տաղանդէն հարիւր խարիսխ եղաւ: 28Եւ հազար եօթը հարիւր եօթանասունըհինգ սիկղ արծաթով սիւներուն ճանկերը շինեց, ու անոնց խոյակները պատեց, և զանոնք կապեց: 29Եւ նուիրուած պղինձը եօթանասուն տաղանդ ու երկու հազար չորս հարիւր սիկղ էր: 30Եւ անով ժողովքի խորանին դրանը խարիսխները ու պղնձէ սեղանը և անոր պղնձէ կասկարան ու սեղանին բոլոր գործիքները: 31Եւ շուրջանակի սրահին խարիսխները ու սրահին դրանը խարիսխները և խորանին բոլոր ցիցերը շինեց: