1Եւ Տէրը ըսաւ Մովսէսի, Փարաւոնի ինչ ընելիքս հիմա պիտի տեսնես. որ հզօր ձեռքով պիտի թողու զանոնք, ու հզօր ձեռքով պիտի վռնտէ զանոնք իր երկրէն։

Աստուած Մովսէսը կը կանչէ

2Եւ Աստուած խօսեցաւ Մովսէսի ու ըսաւ անոր, Ես եմ Եհովա. 3Եւ Աբրահամի, Իսահակի ու Յակոբի՝ Ամենակարող Աստուծոյ անունով երեւցայ. բայց իմ Եհովա անունովս անոնց չյայտնուեցայ։ 4Նաև անոնց հետ իմ ուխտս հաստատեցի, որ անոնց տամ Քանանու երկիրը, անոնց օտարութեան երկիրը, ուր պանդխտացան։ 5Եւ լսեցի ալ Իսրայէլի որդիներուն հառաչանքը, զորոնք Եգիպտացիները ծառայեցուցին. ու իմ ուխտս յիշեցի։ 6Անոր համար Իսրայէլի որդիներուն ըսէ, Ես եմ Եհովա. և ես ձեզ Եգիպտացւոց ծանր գործերուն տակէն պիտի հանեմ, ու ձեզ անոնց ծառայութենէն պիտի ազատեմ, և ձեզ երկնցած բազուկով ու մեծ դատաստաններով պիտի փրկեմ. 7Եւ ձեզ ինծի ժողովուրդ պիտի առնեմ, ու ձեզի Աստուած պիտի ըլլամ. և պիտի գիտնաք որ ձեզ Եգիպտացւոց ծանր գործերուն տակէն հանող Տէրը, ձեր Աստուածը, ես եմ։ 8Եւ ձեզ այն երկիրը պիտի տանիմ, զոր Աբրահամի, Իսահակի ու Յակոբի տալու երդում ըրի*, ու զայն ձեզի ժառանգութիւն ըլլալու պիտի տամ. ես եմ Տէրը։ 9Եւ Մովսէս Իսրայէլի որդիներուն այսպէս զրուցեց. բայց անոնք հոգիի նեղութենէն ու գործին ծանրութենէն մտիկ չըրին Մովսէսի։ 10Եւ Տէրը խոսեցաւ Մովսէսի՝ ըսելով, 11Մտիր խօսէ Եգիպտոսի Փարաւոն թագաւորին՝ որ Իսրայէլի որդիները իր երկրէն արձակէ։ 12Եւ Մովսէս խօսեցաւ Տէրոջը առջև՝ ըսելով, Ահա Իսրայէլի որդիները ինծի մտիկ չըրին, հապա Փարաւոն ինծի ի՞նչպէս մտիկ պիտի ընէ. որ ես, ծանրալեզու եմ։ 13Եւ Տէրը խօսեցաւ Մովսէսի ու Ահարոնի, ու հրաման տուաւ անոնց՝ որ Իսրայէլի որդիներուն ու Եգիպտոսի Փարաւոն թագաւորին երթան , Իսրայէլի որդիները Եգիպտոսի երկրէն հանելու համար։

Մովսէսին և Ահարոնին ազգաբանութիւնը

14Անոնց հայրերուն տուներուն գլուխները ասոնք են. Ւսրայէլի անդրանկան Ռուբէնի որդիները՝ Ենովք, Փաղղուս, Եսրոն և Քարմի. ասոնք են Ռուբէնի տոհմերը։ 15Եւ Շմաւոնի որդիները՝ Յամուէլ, Յամին, Ոհապ, Յաքին, Սահառ, և Քանանացի կնոջ որդին Սաւուղ. ասոնք են Շմաւոնի տոհմերը: 16Եւ Ղեւիի որդիներուն անունները իրենց ծնունդներուն համեմատ ասոնք են. Գերսոն, Կահաթ և Մերարի: Եւ Ղեւիի կեանքին տարիները հարիւր երեսունըեօթը տարի եղան: 17Գերսոնի որդիները իրենց տոհմերուն համեմատ Ղոբենի ու Սեմէի էին: 18Եւ Կահաթի որդիները՝ Ամրամ, Իսահառ, Քեբրոն ու Ոզիէլ: Եւ Կահաթի կեանքին տարիները հարիւր երեսունուիրեք տարի եղան: 19Եւ Մերարիի որդիները՝ Մոողի ու Մուսի. Ղեւիի տոհմերը իրենց ծնունդներուն համեմատ ասոնք են: 20Եւ Ամրամ իր հօրաքոյրը Յոքաբէդը իրեն կին առաւ, որ ծնաւ իրեն Ահարոնը ու Մովսէսը: Եւ Ամրամի կեանքին տարիները հարիւր երեսունըեօթը տարի եղան: 21Եւ Իսահառի որդիները՝ Կորխ, Նափեկ և Զեքրի: 22Եւ Ոզիէլի որդիները՝ Միսայէլ, Եղիսափան և Սեթրի: 23Եւ Ահարոն իրեն կին առաւ Ամինադաբի աղջիկը, Նաասոնի քոյրը Եղիսաբեթը, և ծնաւ իրեն Նադաբը ու Աբիուդը, Եղիազարը ու Իթամարը: 24Եւ Կորխի որդիները՝ Ասիր, Եղկանա, և Արիասափ. ասոնք են Կորխեցւոց տոհմերը: 25Եւ Ահարոնի որդին Եղիազար Փուտիէլի աղջիկներէն իրեն կին առաւ. և ծնաւ իրեն Փենէհէսը. ասոնք են Ղեւտացւոց հայրերուն գլուխները իրենց տոհմերուն համեմատ: 26Ասոնք են այն Ահարոնը ու Մովսէսը՝ որոնց ըսաւ Տէրը, Իսրայէլի որդիները իրենց զօրքերովը Եգիպտոսի երկրէն հանեցէք: 27Իսրայէլի որդիները Եգիպտոսէ հանելու համար Եգիպտոսի Փարաւոն թագաւորին խօսողները ասոնք են. այս Մովսէսը ու Ահարոնը:

Աստուծոյ հրամանը Մովսէսին և Ահարոնին

28Եւ այն օրը Տէրը խօսեցաւ Մովսէսի՝ Եգիպտոսի երկրին մէջ, 29Այն ատեն Տէրը Մովսէսի զրուցեց՝ ըսելով, Ես եմ Եհովա. ամէն ինչ որ քեզի կ’ըսեմ, Եգիպտոսի Փարաւոն թագաւորին խօսէ: 30Եւ Մովսէս Տէրոջը առջև ըսաւ, Ահա ես ծանրալեզու եմ, ու Փարաւոն ի՞նչպէս մտիկ պիտի ընէ ինծի: