Եզեկիէլ Երուսաղէմի պաշարումը կը ներկայացնէ

1Եւ դուն, որդի մարդոյ, քեզի աղիւս մը առ ու զանիկա առջևդ դիր, և անոր վրայ քաղաք մը, այսինքն Երուսաղէմը, գծագրէ: 2Եւ անոր բոլորտիքը պաշարում դիր, և անոր դէմ մարտկոց շինէ, ու անոր դէմ պատնէշ կանգնէ, և անոր դէմ բանակ կազմէ, ու անոր բոլորտիքը պատերազմական մեքենաներ* դիր: 3Եւ դուն քեզի երկաթէ տապակ մը առ, ու զանիկա քուկին ու քաղաքին մէջտեղ երկաթէ պարիսպի պէս դիր, ու քու երեսդ անոր դէմ շիտկէ որ անիկա պաշարուի, ու զանիկա պաշարէ. ասիկա Իսրայէլի տանը նշան ըլլայ: 4Եւ դուն քու ձախ կողմիդ վրայ պառկէ, ու անոր վրայ դիր Իսրայէլի տանը անօրէնութիւնը. անոր վրայ պառկած օրերուդ թիւովը անոնց անօրէնութիւնը կրես: 5Քանզի ես անոնց անօրէնութեանը տարիները օրերու թիւով քու վրադ դրի, երեք հարիւր իննսուն օր, որպէս զի Իսրայէլի տանը անօրէնութիւնը կրես: 6Ու երբ այն օրերը լմնցնես, նորէն պառկիս քու աջ կողմիդ վրայ, ու քառասուն օր Յուդայի տանը անօրէնութիւնը կրես. քեզի ամէն մէկ տարիին տեղ մէյմէկ օր տուի: 7Եւ քու երեսդ դէպ ի Երուսաղէմի պաշարումը շիտկես, ու քու բազուկդ մերկացնես, ու անոր վրայ մարգարէութիւն ընես: 8Եւ ես ահա քու վրադ կապանքներ պիտի դնեմ, որպէս զի մէկ կողմէդ միւս կողմդ չդառնաս, մինչև քու պաշարման օրերդ լմնցնես: 9Ու դուն քեզի ցորեն, գարի, բակլայ, ոսպ, կորեակ ու հաճար առ, և զանոնք ամանի մը մէջ դիր, ու անոնցմէ քեզի հաց շինէ. զանիկա, քու ձախ կողմիդ վրայ պառկած օրերուդ համրանքովը, երեք հարիւր իննսուն օր ուտես: 10Եւ ուտելու կերակուրդ կշիռքով ըլլայ, օրը քսան սիկղ. զանիկա ժամանակէ ժամանակ ուտես: 11Եւ ջուրը չափով, հիմենի մը վեցերորդ մասը, խմես. զանիկա ժամանակէ ժամանակ խմես: 12Եւ այն քու կերակուրդ գարեղէն շօթերու պէս շինելով ուտես. ու զանիկա անոնց աչքին առջև մարդու աղբի վրայ եփես: 13Եւ Տէրը ըսաւ, Իսրայէլի որդիները այսպէս պղծութեամբ պիտի ուտեն իրենց հացը այն ազգերուն մէջ, ուր զանոնք պիտի քշեմ: 14Ու ես ըսի, Ոհ, Տէր Եհովա, ահա իմ անձս չպղծուեցաւ, և իմ տղայութենէս մինչև հիմա մեռելոտի կամ գազանաբեկ չկերայ, ու իմ բերանս պիղծ միս չմտաւ: 15Եւ ինծի ըսաւ, Նայէ, քեզի մարդու աղբին տեղ կովի քակոր տուի, ու քու հացդ անոր վրայ եփես: 16Նաև ինծի ըսաւ, Որդի մարդոյ, ահա ես Երուսաղէմի մէջ հացին ցուպը պիտի կոտրեմ, ու հացը կշիռքով և անձկութեամբ պիտի ուտեն, ու ջուրը չափով և ապշութեամբ պիտի խմեն: 17Վասն զի հացի ու ջուրի կարօտութիւն պիտի քաշեն, ու իրարու նայելով պիտի ապշին, և իրենց անօրէնութիւնովը պիտի հալին: