Տէրը տաճար կը վերադառնայ

1Եւ զիս դուռը, դէպ ի արևելք նայող դուռը, տարաւ: 2Եւ ահա արևելեան ճամբայէն Իսրայէլի Աստուծոյն փառքը կու գար. ու անոր ձայնը շատ ջուրերու ձայնին պէս էր, ու երկիր անոր փառքէն լուսավորուեցաւ: 3Եւ տեսած տեսիլքս նման էր այն տեսիլքին զոր տեսայ երբ քաղաքը աւրելու եկայ. ու տեսիլքները Քոբար գետին քով տեսած տեսիլքիս պէս էին, ու երեսիս վրայ ինկայ. 4Եւ Տէրոջը փառքը դէպ ի արևելք նայող դրանը ճամբայէն տունը մտաւ: 5Ու Հոգին զիս վերցուց և զիս ներքին գաւիթը տարաւ, և ահա Տէրոջը փառքը տունը լեցուցեր էր: 6Եւ ձայն մը լսեցի որ տաճարէն ինծի կը խօսէր (ու իմ քովս մարդ մը կայներ էր.) 7Ու ինծի ըսաւ, Որդի մարդոյ, Իսրայէլի որդիներուն մէջ յաւիտեան բնակելու աթոռիս տեղը, և իմ ոտքերուս գարշապարներուն տեղը ասիկա է, ու Իսրայէլի տունը, իրենք ու իրենց թագաւորները, իրենց պոռնկութիւններովը ու իրենց թագաւորներուն դիերովը իրենց բարձր տեղերուն մէջ ա՛լ իմ սուրբ անունս պիտի չպղծեն: 8Վասն զի իրենց սեմերը իմ սեմերուս՝ ու իրենց դրանդիքը իմ դրանդիքներուս մօտ դրին, այնպէս որ իմ ու անոնց մէջտեղ միայն պատ մը կար, և իրենց ըրած գարշութիւններովը իմ սուրբ անունս պղծեցին. ես ալ իմ բարկութիւնովս սպառեցի զանոնք: 9Հիմա թող իրենց պոռնկութիւնը ու իրենց թագաւորներուն դիերը ինծմէ հեռացնեն, ու յաւիտեան անոնց մէջ պիտի բնակիմ: 10Դուն, որդի մարդոյ, Իսրայէլի տանը այս տունը գիտցուր, որպէս զի իրենց անօրէնութիւններէն ամչնան, ու թող անոր գաղափարը չափեն: 11Եւ եթէ իրենց բոլոր ըրածներէն ամչնան, տանը ձևը ու կարգաւորութիւնը, և անոր ելքը ու մուտքը, ու բոլոր ձևերը և բոլոր կանոնները, [ու բոլոր ձևերը] և բոլոր օրէնքները անոնց գիտցուր. ու անոնց աչքերուն առջև գրէ, և անոր բոլոր ձևերը ու բոլոր կա-նոնները պահեն ու զանոնք կատարեն: 12Այս է տաճարին օրէնքը, Անոր բոլոր սահմանը շուրջանակի լեռանը գլխուն վրայ ամենասուրբ պիտի ըլլայ. ահա տաճարին օրէնքը ասիկա է:

Սեղանը

13Եւ ասոնք են սեղանին չափերը կանգունով. (կանգունը մէկ կանգուն ու չորս մատնաչափ է.) ու խոր տեղը մէկ կանգուն, ու անոր լայնութիւնը մէկ կանգուն, և անոր սահմանը անոր եզերքին վրայ շուրջանակի մէկ թիզ պիտի ըլլայ. ու այս պիտի ըլլայ սեղանին հիմը: 14Ու գետնին խոր տեղէն մինչև վարի շրջանակը երկու կանգուն, և անոր լայնութիւնը մէկ կանգուն պիտի ըլլայ. ու պզտիկ շրջանակէն մինչև մեծ շրջանակը չորս կանգուն, ու լայնութիւնը մէկ կանգուն պիտի ըլլայ: 15Եւ կրակարանը չորս կանգուն բարձր պիտի ըլլայ, ու կրակարանէն վեր չորս եղջիւր պիտի ըլլայ: 16Եւ կրակարանը տասուերկու կանգուն երկայն ու տասուերկու կանգուն լայն, չորս կողմն ալ հաւասար ըլլալով՝ քառակուսի պիտի ըլլայ: 17Եւ անոր բոլորտիքը եղող շրջանակը տասնըչորս կանգուն երկայն ու տասնըչորս կանգուն լայն պիտի ըլլայ, և բոլորտիքը եղող սահմանը կէս կագուն, ու խոր տեղը շուրջանակի մէկ կանգուն պիտի ըլլայ, ու անոր աստիճանները դէպ ի արևելք պիտի ըլլան:

Սեղանին օծումը

18Եւ ինծի ըսաւ, Որդի մարդոյ, Տէր Եհովա այսպէս կ’ըսէ. Ասոնք պիտի ըլլան սեղանին կանոնները՝ այն օրը որ զանիկա շինեն, անոր վրայ ողջակէզներ մատուցանելու՝ ու անոր վրայ արիւն սրսկելու համար: 19Սադովկի սերունդէն եղող Ղեւտացի քահանաներուն, (որոնք ինծի ծառայութիւն ընելու համար ինծի պիտի մօտենան, կ’ըսէ Տէր Եհովա,) մեղքի պատարագի համար արջառներէն զուարակ մը պիտի տաս. 20Եւ անոր արիւնէն պիտի առնես, ու սեղանին չորս եղջիւրներուն վրայ, ու շուրջանակին չորս անկիւններուն վրայ, և շուրջանակի անոր սահմանին վրայ դնես, ու զանիկա պիտի սրբես և անոր համար քաւութիւն ընես: 21Ու մեղքի պատարագին զուարակը պիտի առնես, և սրբարանէն դուրս՝ տաճարին որոշուած տեղը պիտի այրուի: 22Ու երկրորդ օրը մեղքի պատարագի համար այծերէն անարատ նոխազ մը մատուցանես, ու սեղանը պիտի սրբեն՝ ինչպէս զուարակով սրբեցին: 23Երբ սրբելը լմնցնես, արջառներէն անարատ զուարակ մը, ու ոչխարներէն անարատ խոյ մը պիտի մատուցանես. 24Եւ զանոնք Տէրոջը առջև պիտի մօտեցնես, ու քահանաները անոնց վրայ աղ պիտի ցանեն, ու զանոնք Տէրոջը ողջակէզ պիտի մատուցանեն: 25Եօթը օր մեղքի պատարագի համար՝ օրը մէյմէկ նոխազ պիտի մատուցանես. նաև արջառներէն զուարակ մը, ու ոչխարներէն խոյ մը պիտի մատուցանեն, որոնք անարատ պիտի ըլլան: 26Եօթը օր սեղանին քաւութիւն պիտի ընեն և զանիկա պիտի սրբեն ու զանիկա նուիրեն: 27Ու երբ այն օրերը լմննան, ութերորդ օրը ու անկէ ետքը քահանաները սեղանին վրայ ձեր ողջակէզները ու ձեր խաղաղութեան զոհերը պիտի մատուցանեն, և ես ձեզ պիտի ընդունիմ, կ’ըսէ Տէր Եհովա: