Եզեկիէլ իր մազերը կը կտրէ

1Եւ դուն, որդի մարդոյ, քեզի սուր դանակ մը առ, քեզի սափրիչի ածելի մը առ, և զանիկա գլխուդ վրայէն ու մօրուքիդ վրայէն անցուր. և քեզի կշիռք մը առ, ու մազերը բաժին բաժին ըրէ: 2Երրորդ մասը քաղաքին մէջ կրակով այրես, երբ պաշարման օրերը լմննան. ու երրորդ մասը առնես և դանակով զարնես անոր բոլորտիքը. ու երրորդ մասը հովին ցրուես, ու ես անոնց ետևէն սուր պիտի քաշեմ: 3Եւ անոնցմէ քիչ թիւով առնես, ու զանոնք քղանցքներուդ մէջ ծրարես: 4Եւ դարձեալ անոնցմէ առնես ու զանոնք կրակը նետես և զանոնք կրակով այրես. անկէ բոլոր Իսրայէլի տան կրակ պիտի ելլէ: 5Տէր Եհովա այսպէս կ’ըսէ. Ասիկա Երուսաղէմն է. զանիկա ազգերուն մէջ ու իր բոլորտիքը եղող երկիրներուն մէջ դրի: 6Եւ անիկա իմ դատաստաններս՝ ազգերէն, ու իմ կանոններս՝ իր բոլորտիքը եղող երկիրներէն աւելի ամբարշտութեան փոխեց*. վասն զի իմ դատաստաններս մերժեցին և իմ կանոններովս չքալեցին: 7Անոր համար Տէր Եհովա այսպէս կ’ըսէ. Որովհետև ձեր բոլորտիքը եղող ազգերէն աւելի ապստամբ եղաք, իմ կանոններովս չքալեցիք և իմ դատաստաններս ի գործ չդրիք. ոչ ալ ձեր բոլորտիքը եղող հեթանոսներուն սովորութիւններուն համեմատ ըրիք. 8Անոր համար Տէր Եհովա այսպէս կ’ըսէ. Ահա ես քեզի դէմ եմ, ու ազգաց աչքերուն առջև քու մէջդ դատաստաններ ի գործ պիտի դնեմ: 9Եւ քու բոլոր պղծութիւններուդ համար այնպիսի բան մը պիտի ընեմ քու մէջդ, որուն նմանը ոչ ըրած եմ՝ ոչ ալ պիտի ընեմ: 10Անոր համար քու մէջդ հայրերը իրենց տղաքը պիտի ուտեն, ու տղաքը իրենց հայրերը պիտի ուտեն. և քու մէջդ դատաստաններ ի գործ պիտի դնեմ, ու քու բոլոր մնացորդդ ամէն հովի պիտի ցրուեմ: 11Ասոր համար ես կենդանի եմ, կ’ըսէ Տէր Եհովա, որովհետև դուն քու բոլոր գարշութիւններովդ ու բոլոր պղծութիւններովդ իմ սրբարանս պղծեցիր, ես ալ անշուշտ քեզ պիտի կոտրեմ, և իմ աչքս պիտի չխնայէ ու պիտի չողորմիմ: 12Քու երրորդ մասդ ժանտախտով պիտի մեռնին, և քու մէջդ սովով պիտի սպառին. և քու երրորդ մասդ չորս կողմդ սրով պիտի իյնան. ու երրորդ մասդ ամէն հովի պիտի ցրուեմ, ու անոնց ետևէն սուր պիտի քաշեմ: 13Այսպէս իմ բարկութիւնս պիտի կատարուի, և իմ սրտմտութիւնս անոնց վրայ պիտի իջեցնեմ ու վրէժ պիտի առնեմ. ու երբ իմ սրտմտութիւնս անոնց վրայ կատարեմ, պիտի գիտնան թէ ես Տէրս իմ նախանձովս խօսեցայ: 14Եւ ամէն անցնողին աչքերուն առջև, քու բոլորտիքդ եղող ազգերուն մէջ աւերման ու անարգութեան պիտի մատնեմ քեզ: 15Ու երբ բարկութեամբ և սրտմտութեամբ ու սրտմտութեան պատիժներով քու վրադ դատաստաններ ի գործ դնեմ, այս բանը քու բոլորտիքդ եղող ազգերուն մէջ անարգանք, նախատինք, առակ ու զարմացում պիտի ըլլայ. ես Տէրս խօսեցայ: 16Երբ անոնց վրայ սովուն չար ու ապականիչ նետերը ղրկեմ, որոնք ձեզ ապականելու համար պիտի ղրկեմ, սովը ձեր վրայ պիտի աւելցնեմ, ու ձեզի համար հացին ցուպը պիտի կոտրեմ: 17Այսպէս ձեր վրայ սով ու չար գազաններ պիտի ղրկեմ, ու քեզ անզաւակ պիտի թողուն. և քու մէջէ ժանտախտ ու արիւն պիտի անցնի, ու քու վրադ սուր պիտի բերեմ. ես Տէրս խօսեցայ: