Աստուծոյ երկրորդ տեսիլքը Եզեկիէլին (8:1-10:22)

Կռապաշտութիւն Երուսաղէմի մէջ

1Ու եղաւ որ վեցերորդ տարին, վեցերորդ ամսուն հինգերորդ օրը, ես իմ տանս մէջ կը նստէի, և Յուդայի ծերերը իմ առջևս կը նստէին, ու հոն Տէր Եհովայի ձեռքը իմ վրաս ինկաւ. 2Եւ նայեցայ, ու ահա մարդու կերպարանք մը կար կրակի երևութով. անոր երիկամունքներուն երևութէն վար կրակ էր, ու անոր երիկամունքներէն վեր ոսկեպղինձի նման փայլուն երեւոյթ մը կար: 3Եւ անիկա ձեռքի նմանութիւն մը երկնցուց, ու իմ գլխուս վարսքէն բռնեց. ու Հոգին զիս երկրի ու երկինքի մէջտեղ վերցուց, և զիս Աստուծոյ տեսիլքով Երուսաղէմ, դէպ ի հիւսիս նայող ներքին դրանը մուտքը, բերաւ, ուր նախանձ գրգռող Նախանձու կուռքը կը կենար: 4Եւ ահա հոն, դաշտի մէջ տեսած տեսիլքիս պէս Իսրայէլի Աստուծոյն փառքը կար: 5Ու ինծի ըսաւ, Որդի մարդոյ, հիմա քու աչքերդ դէպ ի հիւսիս վերցուր. ու երբ աչքերս դէպ ի հիւսիս վերցուցի, ահա սեղանին դրանը մուտքին հիւսիսային կողմը այս Նախանձու կուռքը կար: 6Այն ատեն ինծի ըսաւ, Որդի մարդոյ, կը տեսնե՞ս ասոնց ըրածը, այն մեծ պղծութիւնները զորոնք Իսրայէլի տունը հոս կընէ, որպէս զի ես իմ սրբարանէս հեռանամ. բայց նորէն դարձիր, ու աւելի մեծ պղծութիւններ պիտի տեսնես: 7Եւ զիս գաւիթին դուռը տարաւ. ու տեսայ, և ահա պատին վրայ ծակ մը կար: 8Ու ինծի ըսաւ, Որդի մարդոյ, հիմա այս պատը փորէ. ու երբ պատը փորեցի, ահա դուռ մը կար: 9Եւ ինծի ըսաւ, Մտիր ու տես այն չար պղծութիւնները զորոնք անոնք հոս կ’ընեն: 10Ու ես մտայ ու տեսայ, և ահա ամէն տեսակ սողուններու ու գարշելի անասուններու պատկերներ, և Իսրայէլի տանը բոլոր կուռքերը պատին վրայ շուրջանակի փորուած էին: 11Ու անոնց առջև կայնած էին Իսրայէլի տանը ծերերէն եօթանասուն մարդ, և Սափանի որդին Յեզոնիա ալ անոնց մէջ կայնած էր. ամէն մէկը ձեռքը բուրվառ ունէր, ու խունկին ծուխը ամպի պէս վեր կ’ելլէր: 12Եւ Տէրը ինծի ըսաւ, Որդի մարդոյ, կը տեսնե՞ս թէ ինչե՛ր կ’ընեն Իսրայէլի տանը ծերերը մութ տեղը, ամէն մարդ իր ծածուկ պատկերատանը մէջ. վասն զի անոնք կ’ըսեն թէ Տէրը մեզ չտեսներ, Տէրը երկիրը թողուց: 13Ու ինծի ըսաւ, Նորէն դարձիր, և անոնց ըրած աւելի մեծ պղծութիւնները պիտի տեսնես: 14Ու զիս Տէրոջը տանը դէպ ի հիւսիս եղող դրանը մուտքը բերաւ. և ահա հոն Թամուզի համար լացող կիները կը նստէին: 15Ու ինծի ըսաւ, Որդի մարդոյ, կը տեսնե՞ս. նորէն դարձիր, ու ասոնցմէ աւելի մեծ պղծութիւններ պիտի տեսնես: 16Եւ զիս Տէրոջը տանը ներքին գաւիթը բերաւ. և ահա Տէրոջը տաճարին դուռը, սրահին ու սեղանին մէջտեղ, քսանըհինգ մարդու չափ կային. անոնք կռնակնին Տէրոջը տաճարին դարձուցեր էին, ու երեսնին արեւելքին, ու դէպ ի արևելք արևուն երկրպագութիւն կ’ընէին: 17Եւ ինծի ըսաւ, Որդի մարդոյ, տեսա՞ր. միթէ Յուդայի տանը պզտի՞կ բան կ’երևնայ իրենց հոս ըրած պղծութիւնները ընելը, որ երկիրն ալ բռնութիւնով լեցուցին, ու զիս բարկացնելու դարձան. և ահա ճիւղը իրենց քիթին կ’երկնցնեն: 18Ու ես ալ սրտմտութեամբ պիտի վարուիմ անոնց հետ. աչքս պիտի չխնայէ, ու պիտի չողորմիմ. և անոնք իմ ականջներուս մեծ ձայնով պիտի կանչեն, սակայն անոնց մտիկ պիտի չընեմ: