Պօղոս և միւս առաքեալները

1Ետքը տասնըչորս տարիէն ետև նորէն Երուսաղէմ ելայ Բառնաբասի հետ՝ Տիտոսն ալ մէկտեղ առնելով։ 2Ու ելայ յայտնութիւնով, և անոնց իմացուցի այն աւետարանը՝ զոր հեթանոսներուն մէջ կը քարոզեմ, բայց առանձին անոնց՝ որոնք երևելիներ էին, որ չըլլայ թէ պարապ տեղ վազեմ կամ վազած ըլլամ։ 3Բայց ոչ թէ ինծի հետ եղող Տիտոսն ալ, որ Յոյն էր, պարտաւորեցաւ թլփատուիլ․ 4Մանաւանդ ներս սպրդող սուտ եղբայրներուն համար՝ որոնք սահելով ներս մտան Քրիստոս Յիսուսով մեր ունեցած ազատութիւնը լրտեսելու համար, որպէս զի մեզ ծառայեցնեն․ 5Որոնց քիչ մը ատեն անգամ մտիկ չըրինք հնազանդելու, որպէս զի աւետարանին ճշմարտութիւնը հաստատուն մնայ ձեր մէջ։ 6Բայց անոնք որ կը կարծուէին բան մը ըլլալ, ինչ որ էին՝ այն իմ հոգս չէ. Աստուած մարդոց աչառութիւն չըներ. վասն զի այնպէս կարծուածները բան մը չիմացուցին ինծի։ 7Հապա անոր հակառակը՝ երբ տեսան որ անթլփատներուն աւետարանը ինծի յանձնուած է, ինչպէս Պետրոսի ալ՝ թլփատուածներունը, 8(Վասն զի ան որ Պետրոսի յաջողեց թլփատուածներուն առաքելութիւն ընել, ինծի ալ յաջողեց հեթանոսներունը,) 9Ու երբ ինծի տրուած շնորհքը գիտցան Յակոբոս ու Կեփաս և Յովհաննէս, որոնք սիւներ սեպուած էին, աջ ձեռքերնին տուին ինծի ու Բառնաբասի ի նշան հաղորդակցութեան, որպէս զի մենք հեթանոսներուն մէջ երթանք, ու անոնք՝ թլփատուածներուն։ 10Միայն թէ կը կամէին որ աղքատները յիշենք. զոր ես ալ փոյթ ունեցայ այն բանը ընելու։

Պօղոս Պետրոսը կը սաստէ

11Բայց երբ Պետրոս Անտիոք եկաւ, ես անոր դէմ կեցայ, որովհետև ինք մեղադրուելու էր։ 12Վասն զի դեռ Յակոբոսի քովէն մէկ քանի հոգի չեկած, ինք հեթանոսներուն հետ անխտրաբար կուտէր․ բայց երբ եկան՝ մէկդի կը քաշուէր, և ինքզինք կը զատէր, վախնալով անոնցմէ՝ որոնք թլփատուածերէն էին։ 13Եւ անոր հետ կեղծաւորեցան միւս Հրեաներն ալ, այնպէս որ Բառնաբաս ալ անոնց կեղծա-ւորութեանը ծռեցաւ։ 14Բայց ես երբ տեսայ որ աւետարանին ճշմարտութեանը մէջ շիտակ չեն քալեր, ամէնուն առջև Պետրոսի զրուցեցի, Եթէ դուն, որ հրեայ ես, հեթանոսի պէս ու ոչ թէ Հրեայի պէս կ’ապրիս, ի՞նչպէս հեթանոսները կը ստիպես Հրեայի պէս վարուելու։

Հրեաներն ու հեթանոսները հաւատքով փրկուած են

15Մենք որ բուն Հրեայ ենք, և ոչ թէ հեթանոսներէն մեղաւորներ, 16Զայս գիտնալով՝ որ մարդ օրէնքին գործերէն չկրնար արդարանալ, հապա Յիսուս Քրիստոսի հաւատքէն, մենք ալ Քրիստոս Յիսուսի հաւատացինք՝ որպէս զի արդարանանք Քրիստոսի հաւատքէն, և ոչ թէ օրէնքին գործերէն, որովհետև օրէնքին գործերէն մարմին մը պիտի չարդարանայ։ 17Իսկ եթէ մենք, որ կ’ուզենք Քրիսոտսով արդարանալ, մեղաւոր գտնուինք, ուրեմն Քրիստոս մեղքի պաշտօնեա՞յ եղաւ. քա՛ւ լիցի։ 18Քանզի եթէ իմ քակած բաներս նորէն կը շինեմ, իմ անձս յանցաւոր կը ցուցնեմ։ 19Վասն զի ես օրէնքով մեռայ օրէնքին, որպէս զի Աստուծոյ կենդանի ըլլամ։ 20Քրիստոսի հետ խաչը ելայ, և ալ կենդանի եմ ոչ թէ ես, հապա Քրիստոս կենդանի է իմ մէջս, բայց ես որ հիմա մարմինովս կ’ապրիմ՝ Աստուծոյ Որդւոյն հաւատքովը կ’ապրիմ, որ զիս սիրեց ու իր անձը ինծի համար մատնեց։ 21Ես Աստուծոյ շնորհքը չեմ խափաներ, վասն զի եթէ արդարութիւնը օրէնքէն էր, ուրեմն Քրիստոս պարապ տեղ մեռաւ։