Ստեղծագործութեան պատմութիւնը

1Սկիզբէն Աստուած երկինքն ու երկիրը ստեղծեց: 2Ու երկիր անձև ու պարապ էր. և անդունդին վրայ խաւար կար. և Աստուծոյ Հոգին ջուրերուն վրայ կը շարժէր: 3Եւ Աստուած ըսաւ, Լոյս ըլլայ. ու լոյս եղաւ: 4Եւ Աստուած տեսաւ լոյսը որ բարի է. ու Աստուած լոյսը խաւարէն զատեց: 5Եւ Աստուած լոյսին անունը Ցորեկ, և խաւարին անունը Գիշեր դրաւ. և իրիկուն ու առտու ըլլալով՝ առաջին օրը եղաւ: 6Եւ Աստուած ըսաւ, Ջուրերուն մէջտեղը հաստատութիւն ըլլայ, և ջուրերը ջուրերէն զատէ: 7Եւ Աստուած հաստատութիւնը ըրաւ, ու հաստատութեանը տակ եղած ջուրերը հաստատութեանը վրայ եղած ջուրերէն զատեց. ու այնպէս եղաւ: 8Եւ Աստուած հաստատութիւնը Երկինք կոչեց. և իրիկուն ու առտու ըլլալով՝ երկրորդ օրը եղաւ: 9Եւ Աստուած ըսաւ, Երկինքի տակ եղած ջուրերը մէկտեղ ժողվուին, ու ցամաքը երևնայ. և այնպէս եղաւ: 10Եւ Աստուած ցամաքին անունը Երկիր դրաւ, ու ջուրերուն ժողովքը Ծովեր կոչեց. և Աստուած տեսաւ որ բարի են: 11Ու ըսաւ Աստուած, Երկիր կանանչ խոտ բուսցնէ, սերմ տուող խոտ, և իր տեսակին պէս պտուղ տուող պտղաբեր ծառ, որ իր մէջ իր սերմը ունենայ երկրի վրայ. ու այնպէս եղաւ: 12Ու երկիր կանանչ խոտ, իր տեսակին պէս սերմ տուող խոտ, և իր տեսակին պէս սերմ ունեցող պտղաբեր ծառ հանեց. ու Աստուած տեսաւ որ բարի են: 13Եւ իրիկուն ու առտու ըլլալով՝ երրորդ օրը եղաւ: 14Եւ ըսաւ Աստուած, Երկինքի հաստատութեանը մէջ լուսաւորներ ըլլան, որպէս զի ցորեկը գիշերէն զատեն. և նշաններու ու ատեններու և օրերու ու տարիներու համար ըլլան. 15Ու երկինքի հաստատութեանը մէջ լուսաւորներու համար ըլլան, որպէս զի երկրի վրայ լոյս տան. ու այնպէս եղաւ: 16Եւ Աստուած երկու մեծ լուսաւորներն ըրաւ. մեծ լուսաւորը ցորեկուան իշխելու համար, ու պզտիկ լուսաւորը գիշերուան իշխելու համար. աստղերն ալ ըրաւ: 17Եւ Աստուած երկինքի հաստատութեանը մէջ դրաւ զանոնք, որպէս զի երկրի վրայ լոյս տան, 18Եւ ցորեկուան ու գիշերուան իշխեն, և լոյսը խաւարէն զատեն. ու Աստուած տեսաւ որ բարի են: 19Եւ իրիկուն ու առտու ըլլալով՝ չորրորդ օրը եղաւ: 20Եւ ըսաւ Աստուած, Ջուրերը կենդանութեան շունչ ունեցող շատ սողուններ հանեն. և թռչունները երկրի վրայ, երկինքի հաստատութեանը երեսը, թռչին: 21Եւ Աստուած ստեղծեց մեծամեծ կէտերը, և ամէն սողացող շնչաւոր կենդանին, զորոնք ջուրերը առատ հանեցին անոնց տեսակին պէս, ու ամէն թևաւոր թռչունը իր տեսակին պէս. և Աստուած տեսաւ որ բարի են: 22Ու Աստուած օրհնեց զանոնք՝ ըսելով, Աճեցէք ու շատցէք, և ծովերուն մէջ եղած ջուրերը լեցուցէք. թռչուններն ալ երկրի վրայ շատնան: 23Եւ իրիկուն ու առտու ըլլալով՝ հինգերորդ օրը եղավ: 24Եւ ըսավ Աստուած, Երկիր թող հանէ շնչաւոր կենդանի՝ իր տեսակին պէս, անասուններ, սողուններ ու երկրի գազաններ՝ իրենց տեսակին պէս. և այնպէս եղաւ: 25Ու Աստուած երկրի գազանները իրենց տեսակին պէս, և ընտանի անասունները իրենց տեսակին պէս, ու գետնի ամէն սողունները իրենց տեսակին պէս ըրաւ. և Աստուած տեսաւ որ բարի են: 26Եւ ըսաւ Աստուած, Մեր պատկերին ու մեր նմանութեանը պէս մարդ ընենք, և ծովու ձուկերուն ու երկինքի թռչուններուն և անասուններուն ու բոլոր երկրի ու երկրի վրայ սողացող բոլոր սողուններուն թող իշխէ: 27Եւ Աստուած իր պատկերովը ստեղծեց մարդը. Աստուծոյ պատկերովը ստեղծեց զանիկա, արու և էգ ստեղծեց զանոնք: 28Ու Աստուած օրհնեց զանոնք, և Աստուած անոնց ըսաւ, Աճեցէք ու շատցէք ու երկիրը լեցուցէք, և անոր տիրեցէք. ու ծովու ձուկերուն ու երկինքի թռչուններուն և երկրի վրայ սողացող ամէն կենդանիներուն իշխեցէք: 29Եւ ըսաւ Աստուած, Ահա ձեզի տուի բոլոր երկրի վրայ եղած ամէն սերմ ունեցող խոտը, ու ամէն ծառը՝ որուն մէջ սերմ տուող ծառի պտուղ կայ, ձեզի կերակուր պիտի ըլլայ. 30Ու երկրի բոլոր գազաններուն ու երկինքի բոլոր թռչուններուն և երկրի վրայ կենդանութեան շունչ ունեցող բոլոր սողուններուն՝ ամէն կանանչ խոտը կերակուրի համար տուի . ու այնպէս եղաւ: 31Եւ Աստուած իր ամէն ըրածը տեսաւ, և ահա շատ բարի էր: Եւ իրիկուն ու առտու ըլլալով՝ վեցերորդ օրը եղաւ: