Աբրամ և Ղովտ կը բաժնուին

1Եւ Աբրամ իր կնոջմով ու իր բոլոր ունեցածներով Եգիպտոսէ դէպ ի Քանանու հարաւակողմը ելաւ, ու Ղովտ ալ իրեն հետ: 2Եւ Աբրամ շատ հարուստ էր անասուններով, արծաթով ու ոսկիով: 3Եւ իր առաջին իջևաններով գնաց հարաւային կողմէն մինչև Բեթէլ, այն տեղը ուր էր առաջ իր վրանը, Բեթէլի ու Գայիի մէջտեղ, 4Այն սեղանին տեղը զոր հոն առաջ շիներ էր. և Աբրամ հոն Տէրոջը անունը կանչեց: 5Եւ Աբրամի հետ գացող Ղովտն ալ ոչխարներ ու արջառներ ու վրաններ ունէր: 6Եւ այն երկիրը բաւական չէր անոնց որ մէկտեղ բնակին. քանզի անոնց ստացուածքը շատ ըլլալով՝ չէին կրնար մէկտեղ բնակիլ: 7Եւ Աբրամի անասուններուն հովիւներուն ու Ղովտի անասուններուն հովիւներուն մէջտեղ վէճ կար. և այն ատեն Քանանացիները ու Փերեզացիները կը բնակէին այն երկրին մէջ: 8Եւ Աբրամ ըսաւ Ղովտի, Կ’աղաչեմ քեզի, իմ ու քու մէջտեղ, և իմ հովիւներուս ու քու հովիւներուդ մէջտեղ վէճ չըլլայ, վասն զի մենք եղբայր ենք: 9Բոլոր երկիրը քու առջևդ չէ՞. կ’աղաչեմ, զատուէ ինծմէ. եթէ դուն ձախ կողմը երթաս , ես աջ կողմը կ’երթամ, և եթէ աջ կողմը երթաս , ես ձախ կողմը կ’երթամ: 10Եւ Ղովտ իր աչքերը վեր վերցուց, ու Յորդանանու ամէն կողմը նայեցաւ՝ որ ամէն տեղ ջրուած էր, Տէրը Սոդոմը ու Գոմորը կորսնցնելէն առաջ մինչև Սեգովր Տէրոջը դրախտին պէս, Եգիպտոսի երկրին պէս էր: 11Եւ Ղովտ Յորդանանու բոլոր կողմը ընտրեց իրեն, ու Ղովտ դէպ ի արևելք չուեց. և իրարմէ զատուեցան: 12Աբրամ Քանանու երկրին մէջ բնակեցաւ. Ղովտ ալ դաշտի քաղաքներուն մէջ բնակեցաւ, ու իր վրանը Սոդոմի քով բացաւ: 13Եւ Սոդոմի մարդիկը խիստ չար ու մեղաւոր էին Տէրոջը առջև:

Աբրամ դէպ ի Քեբրոն կը չուէ

14Եւ Տէրը Աբրամի ըսաւ, Ղովտի անկէ զատուելէն ետքը, Հիմա աչքերդ վեր վերցուր, ու քու եղած տեղէդ դէպ ի հիւսիս ու հարաւ և դէպ ի արևելք ու արևմուտք նայէ. 15Վասն զի այդ բոլոր երկիրը զոր կը տեսնես, քեզի ու քու սերունդիդ պիտի տամ յաւիտեան: 16Եւ քու սերունդդ երկրի փոշիին պէս անթիւ պիտի ընեմ. այնպէս որ եթէ մէկը երկրի փոշին կրնայ համրել, քու սերունդդ ալ համրուի: 17Ելիր, այդ երկիրը պտըտէ անոր երկայնութեանը ու լայնութեանը համեմատ. քանզի զանիկա քեզի պիտի տամ: 18Եւ Աբրամ վերցուց իր վրանը, ու եկաւ և բնակեցաւ Մամբրէի կաղնիներուն մէջ, որ Քեբրոնի մէջ է, և հոն սեղան շինեց Տէրոջը: