Աբրամ Ղովտը կը փրկէ

1Ու եղաւ որ Սենաարի Ամարփաղ թագաւորին, Ելլասարի Արիովք թագաւորին, Եղամի Քոդողագոմոր թագաւորին և Գոյիմի Թադգաղ թագաւորին ժամանակները, 2Ասոնք Սոդոմի Բարա թագաւորին հետ և Գոմորի Բարսա թագաւորին հետ, Ադմայի Սենաբ թագաւորին հետ և Սեբոյիմի Սիմոբոր թագաւորին հետ ու Բաղայի (այսինքն Սեգովրի) թագաւորին հետ պատերազմեցան: 3Ասոնց ամէնը ժողվուեցան Սիդդիմ ձորին մէջ, որ է Աղի ծովը: 4Տասուերկու տարի Քոդողագոմորի ծառայութիւն ըրին, ու երեքտասաներորդ տարին ապստամբ եղան: 5Եւ չորեքտասաներորդ տարին Քոդողագոմոր ու իրեն հետ եղող թագաւորները եկան, ու Աստարովթ-կառնայիմի մէջ եղող Ռափայինները, ու Համի մէջ Զուզեցիները, և Շաւէ Կարիաթեմի մէջ Էմիմները, 6Եւ Քոռեցիները իրենց Սէիր լեռանը վրայ՝ մինչև անապատին քով եղող Էլփառանը զարկին, 7Եւ դարձան ու եկան Ենմասեփաթ, այսինքն Կադէս. և Ամաղեկացւոց բոլոր նահանգը, ու Ասասանթամարի մէջ բնակող Ամօրհացիներն ալ զարկին: 8Եւ Սոդոմի թագաւորը, ու Գոմորի թագաւորը, և Ադմայի թագաւորը, ու Սեբոյիմի թագաւորը, և Բաղայի (այսինքն Սեգովրի) թագաւորը ելլելով, Սիդդիմ ձորին մէջ անոնց հետ պատերազմելու շարուեցան, 9Այսինքն Եղամի Քոդողագոմոր թագաւորին հետ, և Գոյիմի Թադգաղ թագաւորին հետ, ու Սենաարի Ամարփաղ թագաւորին հետ, և Ելլասարի Արիովք թագաւորին հետ, այս չորս թագաւորը այն հինգին հետ: 10Եւ Սիդդիմ ձորը նաւթի հորերով լեցուն էր. և Սոդոմի ու Գոմորի թագաւորները փախան, և հոն ինկան. ու մնացածները լեռը փախան: 11Եւ անոնք Սոդոմի ու Գոմորի ամէն բարիքը, ու անոնց բոլոր պաշարները առին ու գացին: 12Եւ Սոդոմի մէջ բնակող Աբրամի եղբօրորդին Ղովտը ու անոր բոլոր բարիքը առին ու գացին: 13Եւ փախստական մը եկաւ, ու այս բաները Եբրայեցի Աբրամի պատմեց. և անիկա Եսքողի ու Աների եղբօրը Ամօրհացի Մամբրէի կաղնիներուն մէջ կը բնակէր. վասն զի անոնք Աբրամի հետ դաշնակից էին: 14Եւ Աբրամ երբ իր եղբօրը գերի առնուիլը լսեց, իր տանը մեջ՝ ծնած երեք հարիւր տասնըութ կրթուած ծառաները հանեց, ու անոնց ետևէն ինկաւ մինչև Դան: 15Եւ ինքն ու իր ծառաները գիշերով գունդ գունդ անոնց վրայ յարձակեցան, ու զարկին զանոնք, և քշեցին զանոնք մինչև Քոբա, որ Դամասկոսի հիւսիսային կողմն է: 16Եւ բոլոր բարիքը ետ բերաւ. և իր եղբայրը Ղովտն ալ ու անոր բարիքը և կիները ու ժողովուրդն ալ ետ բերաւ:

Մելքիսեդեկ կ’օրհնէ Աբրամը

17Եւ ինք՝ Քոդողագոմորը ու անոր հետ եղող թագաւորները զարնելէն ու դառնալէն ետքը, Սոդոմի թագաւորը զանիկա դիմաւորելու ելաւ դէպ ի Շաւէ ձորը (այսինքն Թագաւորի ձորը): 18Եւ Սաղէմի թագաւորը Մելքիսեդեկ հաց ու գինի հանեց. ու անիկա Բարձրեալ Աստուծոյ քահանան էր: 19Եւ օրհնեց զանիկա. ու ըսաւ, Օրհնեալ ըլլայ Աբրամ, երկինքի ու երկրի տէրը եղող Բարձրեալ Աստուծմէն: 20Եւ օրհնեալ ըլլայ Բարձրեալ Աստուածը, որ քու թշնամիներդ քու ձեռքդ մատնեց: Եւ անիկա ամէնէն տասանորդ տուաւ անոր: 21Եւ Սոդոմի թագաւորը ըսաւ Աբրամի, Մարդիկը ինծի տուր, ու բարիքը դուն քեզի առ: 22Եւ Աբրամ ըսաւ Սոդոմի թագաւորին, Երկինքի ու երկրի տէրը եղող Բարձրեալ Տէր Աստուծոյ վերցուցի իմ ձեռքս, 23Որ դերձանէ մինչև կօշիկի կապ բան մը չառնեմ ինչ որ քուկդ է, որ չըլլայ թէ Աբրամը ես հարստացուցի ըսես, 24Բաց ի տղաքներուն կերածէն, ու ինծի հետ եկող մարդոցը, այսինքն Աների ու Եսքողի ու Մամբրէի բաժիններէն. թող անոնք իրենց բաժինը առնեն: