Աստուծոյ ուխտը Աբրամին հետ

1Այս բաներէն ետքը տեսիլքի մէջ Տէրոջը խօսքը Աբրամի եղաւ՝ ըսելով, Մի վախնար, ով Աբրամ, ես քեզի վահան եմ, ու քու վարձքդ խիստ շատ պիտի ըլլայ: 2Եւ Աբրամ ըսաւ, Ով Տէր Եհովա, ինծի ի՞նչ պիտի տաս, քանի որ առանց զաւկի կը մնամ, և իմ տանս տիրողը այս Դամասկացի Եղիազարն է: 3Նաև ըսաւ Աբրամ, Որովհետև ինծի սերունդ չտուիր, ահա իմ տանս ծառան ինծի ժառանգ կ՚ըլլայ: 4Եւ ահա Տէրոջը խօսքը անոր եղաւ՝ ըսելով, Անիկա քեզի ժառանգ պիտի չըլլայ. բայց ան պիտի ըլլայ քու ժառանգդ՝ որ քու մէջքէդ պիտի ելլէ: 5Եւ դուրս հանեց զանիկա, ու ըսաւ, Հիմա դէպ ի երկինք նայէ, ու աստղերը համրէ, եթէ զանոնք համրելու կարող ես. և ըսաւ անոր, Քու սերունդդ այսպէս պիտի ըլլայ: 6Եւ անիկա հաւատաց Տէրոջը, որ անոր արդարութիւն ըլլալ սեպեց: 7Եւ ըսաւ անոր, Ես եմ Տէրը որ քեզ Քաղդէացւոց Ուր քաղաքէն հանեցի՝ այս երկիրը քեզի ժառանգութիւն տալու համար: 8Եւ անիկա ըսաւ, Ով Տէր Եհովա, ի՞նչպէս գիտնամ թէ ես զանիկա պիտի ժառանգեմ: 9Եւ ըսաւ անոր, Ինծի երեք տարեկան երինջ մը, ու երեք տարեկան այծ մը, և երեք տարեկան խոյ մը, ու տատրակ մը, և աղաւնիի ձագ մը առ: 10Եւ անիկա բոլոր ասոնք առաւ անոր, ու ասոնց մէջտեղէն կտրեց, և ամէն մէկ կտորը իր մասին հետ դիմացէ դիմաց դրաւ. բայց թռչունները չկտրեց: 11Եւ երբ դիերուն վրայ գիշատիչ թռչուններն իջան, Աբրամ վռնտեց զանոնք: 12Ու երբ արևը մարը կը մտնէր, Աբրամի վրայ խորունկ քուն մը իջաւ, և ահա անոր վրայ մեծ մթութեան սոսկում մը ինկաւ: 13Եւ Տէրը ըսաւ Աբրամի, Ստոյգ գիտցիր որ քու սերունդդ իրենցը չեղած երկրի մէջ պանդուխտ պիտի ըլլան, և ծառայութիւն պիտի ընեն. ու հոն չորս հարիւր տարի պիտի չարչարեն զանոնք: 14Բայց այն ազգը որու պիտի ծառայեն, ես պիտի դատեմ. և անկէ ետքը շատ ստացուածքով պիտի ելլեն: 15Եւ դուն խաղաղութեամբ քու հայրերուդ պիտի երթաս. աղէկ մը ծերացած պիտի թաղուիս: 16Եւ անոնք չորրորդ դարուն մէջ հոս պիտի դառնան. վասն զի Ամօրհացւոց անօրէնութիւնը դեռ լեցուած չէ: 17Եւ եղաւ որ երբ արևը մարը մտաւ ու խաւար եղաւ, ահա մխած հնոց մը ու վառած ջահ մը այն կտորներուն մէջտեղէն անցաւ: 18Այն նոյն օրը Տէրը Աբրամի հետ ուխտ մը ըրաւ՝ ըսելով, Քու սերունդիդ տուի այս երկիրը Եգիպտոսի գետէն մինչև մեծ գետը, այսինքն Եփրատ գետը. 19Կենեցիները, և Կենեզացիները, ու Կեդմոնացիները, 20Եւ Քետացիները, ու Փերեզացիները, 21Եւ Ռափայինները, և Ամօրհացիները, ու Քանանացիները, և Գերգեսացիները ու Յեբուսացիները: