Թլփատութիւնը ուխտին նշան

1Եւ երբ Աբրամ իննսունըինը տարեկան էր, Տէրը Աբրամի երևցաւ, ու ըսաւ անոր, Ես եմ Ամենակարող Աստուածը. իմ առջևս քալէ, ու կատարեալ եղիր: 2Եւ իմ ու քու մէջտեղ իմ ուխտս պիտի դնեմ, ու խիստ պիտի շատցնեմ քեզ: 3Եւ Աբրամ իր երեսին վրայ ինկաւ, ու Աստուած անոր հետ խօսեցաւ՝ ըսելով, 4Ահա իմ ուխտս քեզի հետ է, և ազգերու բազմութեան հայր պիտի ըլլաս. 5Ու այսուհետև քու անունդ Աբրամ չըսուի, հապա քու անունդ Աբրահամ ըլլայ. վասն զի քեզ ազգերու բազմութեան հայր ըրի: 6Եւ քեզ խիստ պիտի աճեցնեմ, ու քեզ ազգեր պիտի ընեմ. ու քեզմէ թագաւորներ պիտի ելլեն: 7Եւ իմ ու քու մէջտեղ, ու քեզմէ ետքը քու սերունդիդ մէջտեղ իրենց ազգերուն մէջ իմ ուխտս պիտի հաստատեմ, յաւիտենական ուխտ մը, որ քեզի ու քեզմէ ետքը քու սերունդիդ Աստուած ըլլամ: 8Եւ պիտի տամ քեզի ու քեզմէ ետքը քու սերունդիդ յաւիտենական ժառանգութեան համար այն երկիրը ուր պանդուխտ եղար, բոլոր Քանանու երկիրը. ու անոնց Աստուած պիտի ըլլամ: 9Եւ Աստուած ըսաւ Աբրահամի, Ուստի դուն ու քեզմէ ետքը քու սերունդդ իրենց ազգերուն մէջ՝ պահէք իմ ուխտս: 10Այս է իմ ու ձեր մէջտեղ, և քեզմէ ետքը քու սերունդիդ մէջտեղ եղած իմ ուխտս՝ զոր պիտի պահէք. Ձեզմէ ամէն արուն թլփատուի. 11Ձեր անթլփատութեան մարմինը թլփատէք, ու ասիկա իմ ու ձեր մէջտեղ եղած ուխտին նշանը ըլլայ: 12Եւ ձեր ազգերուն մէջ ամէն ութ օրուան արու զաւակնիդ, կամ տունը ծնածը, կամ քու սերունդէդ չեղող բոլոր օտարականներէն ստակով ծախու առնուածը թլփատուի: 13Քու տունդ ծնածը և ստակովդ ծախու առնուածը անշուշտ պիտի թլփատուի. և իմ ուխտս ձեր մարմինին մէջ յաւիտենական ուխտ մը ըլլայ: 14Եւ անթլփատ արուն՝ որուն անթլփատութեան մարմինը թլփատուած չէ, այն անձը իր ժողովուրդէն պիտի կորսուի. անիկա իմ ուխտս անարգած է: 15Եւ Աստուած ըսաւ Աբրահամի, Քու կնոջդ Սարայի անունը Սարա մի կանչեր, հապա անոր անունը Սառա ըլլայ: 16Ու զանիկա պիտի օրհնեմ, նաև անկէ որդի մը պիտի տամ քեզի. ու պիտի օրհնեմ զանիկա, ու ազգերու մայր պիտի ըլլայ. ժողովուրդներու թագաւորներ պիտի ելլեն անկէ: 17Եւ Աբրահամ երեսի վրայ ինկաւ ու խնդաց, և իր սրտին մէջ ըսաւ, Հարիւր տարեկան մարդուն զաւակ պիտի ըլլա՞յ արդեօք. և Սառա, որ իննսուն տարեկան է, պիտի ծնանի՞: 18Եւ Աբրահամ ըսաւ Աստուծոյ, Թող Իսմայէլ ապրի քու առջևդ. 19Եւ Աստուած ըսաւ, Այո, քու կինդ Սառա որդի պիտի ծնանի քեզի, ու անոր անունը Իսահակ պիտի դնես. և անոր հետ ու անկէ ետքը անոր սերունդին հետ իմ ուխտս պիտի հաստատեմ, յաւիտենական ուխտ մը: 20Եւ Իսմայէլի համար ալ լսեցի քեզի. ահա օրհնեցի զանիկա, ու պիտի աճեցնեմ զանիկա ու խիստ պիտի շատցնեմ. անիկա տասուերկու իշխան պիտի ծնանի, և մեծ ազգ մը պիտի ընեմ զանիկա: 21Բայց գալ տարի այս ատեն Սառայի քեզի ծնանելու Իսահակին հետ իմ ուխտս պիտի հաստատեմ: 22Եւ անոր հետ խօսիլը լմնցուց, ու Աստուած Աբրահամի քովէն վեր ելաւ: 23Եւ առաւ Աբրահամ իր որդին Իսմայէլը, ու բոլոր իր տունը ծնածները, և բոլոր ստակով ծախու առնուածները, Աբրահամի ընտանիքին մէջ գտնուած ամէն արուն. ու նոյն օրը անոնց անթլփատութեան մարմինը թլփատեց, ինչպէս Աստուած անոր ըսեր էր: 24Եւ Աբրահամ իննսունըինը տարեկան էր երբ իր անթլփատութեան մարմինը թլփատուեցաւ: 25Եւ իր որդին Իսմայէլ տասուիրեք տարեկան էր երբ իր անթլփատութեան մարմինը թլփատուեցաւ: 26Նոյն օրը թլփատուեցաւ Աբրահամ ու իր որդին Իսմայէլ: 27Եւ իր տանը բոլոր մարդիկը, թէ՛ իր տունը ծնած և թէ՛ օտարականներէն ստակով ծախու առնուած, իրեն հետ թլփատուեցան: