Աբրահամ և Աբիմելէք

1Եւ Աբրահամ անկէ դէպ ի հարաւային երկիրը չուեց, և Կադէսի ու Սուրի մէջտեղ բնակեցաւ, ու Գերարայի մէջ պանդուխտ եղաւ: 2Եւ Աբրահամ իր կնոջ Սառայի համար, Ասիկա իմ քոյրս է, ըսաւ. և Գերարայի թագաւորն Աբիմելէք մարդ ղրկեց, ու առաւ Սառան: 3Եւ Աստուած եկաւ Աբիմելէքի գիշերը երազի մէջ ու ըսաւ անոր, Ահա այդ կնոջ համար զոր դուն առիր, պիտի մեռնիս. քանզի անիկա այր ունի: 4Բայց Աբիմելէք անոր մօտեցած չէր, և ըսաւ, Ով Տէր, արդար ազգ ալ պիտի մեռցնե՞ս: 5Ինք ինծի, Անիկա իմ քոյրս է, չըսա՞ւ. և աս ալ, Անիկա իմ եղբայրս է, ըսաւ. ես այս բանը ուղիղ սրտով ու մաքուր ձեռքերով ըրի: 6Եւ Աստուած անոր ըսաւ երազի մէջ, Ես ալ գիտցայ որ այս բանը ուղիղ սրտով ըրիր, նաև քեզ ինծի դէմ մեղք գործելէ ետ պահեցի. անոր համար քեզ չթողուցի որ անոր մօտենաս: 7Բայց հիմա կինը իր էրկանը դարձուր. քանզի անիկա մարգարէ է, և քեզի համար աղօթք թող ընէ որ ապրիս. և եթէ դուն զանիկա ետ չտաս, գիտցիր որ անշուշտ պիտի մեռնիս դուն և ամէն քուկիններդ: 8Ուստի առտուանց կանուխ ելաւ Աբիմելէք, ու կանչեց իր բոլոր ծառաները, և բոլոր այս բաները անոնց պատմեց. ու մարդիկը շատ վախցան: 9Եւ Աբիմելէք կանչեց Աբրահամը ու ըսաւ անոր, Մեզի ի՞նչ ըրիր. ու ես քեզի ի՞նչ յանցանք ըրի, որ իմ վրաս ու թագաւորութեանս վրայ մեծ մեղք մը բերիր. չգործուելու գործեր գործեցիր ինծի: 10Եւ Աբիմելէք ըսաւ Աբրահամի, Ի՞նչ տեսար որ այս բանը ըրիր: 11Եւ Աբրահամ ըսաւ, Ես կարծեցի որ իրաւցընէ այս տեղ Աստուծոյ վախը չկայ, ու կնոջս համար զիս կը մեռցնեն: 12Եւ տակաւին իրաւցընէ իմ քոյրս է. հօրս աղջիկն է, բայց մօրս աղջիկը չըլլալովը՝ իմ կինս եղաւ: 13Եւ երբ Աստուած զիս իմ հօրս տունէն օտարութեան հանեց, ըսի ատոր, Ինծի ընելու շնորհքդ այս ըլլայ. ուր որ երթալու ըլլանք, հոն ինծի համար ըսես թէ Իմ եղբայրս է: 14Եւ Աբիմելէք ոչխարներ ու արջառներ ու ծառաներ ու աղախիններ առաւ, և Աբրահամի տուաւ. անոր կինը Սառան ալ անոր ետ տուաւ: 15Եւ Աբիմելէք ըսաւ, Ահա իմ երկիրս քու առջեւդ է. ուր որ կ’ուզես, բնակէ: 16Եւ Սառայի ըսաւ, Ահա եղբօրդ հազար կտոր արծաթ տուի. ահա այն քեզի աչքերու ծածկոց ըլլայ բոլոր քեզի հետ եղողներուն առջև և ամէնուն: Այսպէս անիկա յանդիմանուեցաւ: 17Եւ Աբրահամ ա-ղօթք ըրաւ Աստուծոյ. և Աստուած բժշկեց Աբիմելէքը ու անոր կինը և անոր աղախինները, ու կը ծնանէին. 18Քանզի Տէրը Աբրահամի կնոջ Սառայի համար՝ Աբիմելէքի ընտանիքին բոլոր արգանդները գլխովին գոցեր էր: