Աբրահամին միւս սերունդը

1Եւ Աբրահամ նորէն կին մը առաւ, ու անոր անունը Քետուրա էր: 2Եւ անիկա Զեմրանը ու Յեկսանը և Մադանը ու Մադիանը և Յեսբոկը ու Սովէն ծնաւ անոր: 3Եւ Յեկսան ծնաւ Սաբան ու Դեդանը. և Դեդանի որդիները Ասուրիմ ու Լատուսիմ և Լովովմիմ էին: 4Եւ Մադիանի որդիները Գեփա ու Ափէր և Ենովք ու Աբիդա և Ելդագա էին. ասոնք ամէնը Քետուրայի որդիներն էին: 5Եւ Աբրահամ իր բոլոր ունեցածը Իսահակի տուաւ. 6Բայց Աբրահամի հարճերուն որդիներուն Աբրահամ պարգեւներ տուաւ, և իր կենդանութեան ատենը զանոնք իր որդւոյն Իսահակի քովէն դէպ ի արեւելք՝ արեւելեան երկիրը ղրկեց:

Աբրահամին մահն ու թաղումը

7Եւ Աբրահամի կեանքին տարիներուն օրերը զոր ինք ապրեցաւ, հարիւր եօթանասունըհինգ տարի էին: 8Եւ Աբրահամ աղէկ ծերութեամբ ծերացած ու իր օրերը լեցուած՝ աւանդեց իր հոգին ու մեռաւ, և իր ժողովուրդին խառնուեցաւ: 9Եւ իր որդիները, Իսահակ ու Իսմայէլ, թաղեցին զանիկա Մաքփելայի այրին մէջ, որ Քետացի Սահառի որդւոյն Եփրոնի արտին մէջ Մամբրէի դիմաց է. 10Այն արտը զոր Աբրահամ Քետի որդիներէն ծախու առած էր. հոն թաղուեցաւ Աբրահամ և իր կինը Սառա: 11Ու եղաւ որ Աբրահամի մեռնելէն ետքը Աստուած օրհնեց անոր որդին Իսահակը. և Իսահակ Լահայրոյի ջրհորին քով բնակեցաւ:

Իսմայէլին սերունդը

12Եւ ասոնք են Աբրահամի որդւոյն Իսմայէլի ծնունդները, զոր Սառայի Եգիպտացի աղախինը Հագար ծնաւ Աբրահամի: 13Եւ Իսմայէլի որդւոց անունները ասոնք են իրենց անուններովը ու իրենց ծնունդներովը. Իսմայէլի անդրանիկը Նաբէօթ, ետքը Կեդար, Ադբեէլ, Մաբսամ, 14Մասմա, Դումա, Մասսէ, Քոդադ, 15Թեմա, Յետուր, Նափէս ու Կեդմա: 16Ասոնք են Իսմայէլի որդիները. և իրենց վրաններովը ու իրենց գեղերովը իրենց անունները ասոնք են. իրենց ազգերուն համեմատ տասուերկու իշխաններ էին: 17Եւ Իսմայէլի կեանքին օրերը հարիւր երեսունըեօթը տարի եղան. և իր հոգին աւանդելով մեռաւ, ու իր ժողովուրդին խառնուեցաւ: 18Եւ Իսմայելացիք բնակեցան Եւիլայէ մինչև Սուր, որ Եգիպտոսի դիմաց Ասորեստան երթալու ճամբուն վրայ է. բոլոր իր եղբայրներուն առջև բնակեցաւ:

Եսաւին ու Յակոբին ծնունդը

19Եւ Աբրահամի որդւոյն Իսահակի ծնունդները ասոնք են. Աբրահամ ծնաւ Իսահակը: 20Եւ Իսահակ քառասուն տարեկան էր, երբ Միջագետէ Ասորի Բաթուէլի աղջիկը, Ասորի Լաբանի քոյրը Ռեբեկան, իրեն կին առաւ: 21Եւ Իսահակ աղաչեց Տէրոջը իր կնոջ համար՝ ամուլ ըլլալուն պատճառաւ. և Տէրը անոր աղաչանքը ընդունեց. ու անոր կինը Ռեբեկա յղացաւ: 22Եւ տղաքները անոր արգանդին մէջ կը կռուէին. ու ըսաւ, Եթէ այսպէս է, ինչո՞ւ եղաւ ինծի ասիկա. և Տէրոջը հարցնելու գնաց: 23Ու Տէրը ըսաւ անոր, Երկու ազգ կան արգանդիդ մէջ, և քու որովայնէդ երկու ժողովուրդ պիտի զատուի. ու ժողովուրդին մէկը միւսէն զօրաւոր պիտի ըլլայ, և մեծը պիտի ծառայէ պզտիկին: 24Ու երբ անոր ծնանելու օրերը լեցուեցան, ահա երկուորեակ էին անոր արգանդին մէջ: 25Եւ առաջինը ելաւ կարմրագոյն, բոլոր մարմինը մազոտ վերարկուի պէս էր. ու անոր անունը Եսաւ դրին: 26Եւ անկէ ետքը անոր եղբայրը ելաւ, ու անոր ձեռքը Եսաւի գարշապարէն բռներ էր, և անոր անունը Յակոբ դրին. ու անոնց ծնած ատենը Իսահակ վաթսուն տարեկան էր: 27Եւ մանուկները մեծցան. ու Եսաւ դաշտի մարդ, վարպետ որսորդ եղաւ. իսկ Յակոբ հանդարտ բարքով մարդ էր ու վրաններուն մէջ կը բնակէր: 28Եւ Իսահակ կը սիրեր Եսաւը, վասն զի անոր որսէն կ’ուտէր. բայց Ռեբեկա Յակոբը կը սիրէր:

Եսաւ կը ծախէ անդրանկութեան իրաւունքը

29Օր մը երբ Յակոբ ապուր կ’եփէր, Եսաւ դաշտէն եկաւ և անօթութենէ կը մարէր: 30Եւ Եսաւ Յակոբի ըսաւ, Շնորհք ըրէ, այդ շիկաթանէն տուր որ ուտեմ, քանզի կը մարիմ. անոր համար անոր անունը Եդովմ կոչուեցաւ: 31Եւ Յակոբ ըսաւ, Ծախէ ինծի այսօր քու անդրանկութեանդ իրաւունքը: 32Ու Եսաւ ըսաւ, Ահա մեռնելու կը մօտենամ, և անդրանկութենէն ինծի ի՞նչ օգուտ կայ: 33Եւ Յակոբ ըսաւ, Այսօր ինծի երդում ըրէ. և անիկա երդում ըրաւ անոր, ու իր անդրանկութեան իրաւունքը ծախեց Յակոբի: 34Այն ատեն Յակոբ հաց ու ոսպէ ապուր տուաւ Եսաւի. և անիկա կերաւ ու խմեց, ու ելաւ գնաց. այսպէս Եսաւ իր անդրանկութիւնը անարգեց: