Յովսէփ բանտարկեալներուն երազները կը մեկնէ

1Ու եղաւ որ այս բաներէն ետքը՝ Եգիպտոսի թագաւորին մատռուակը ու հացագործը իրենց տէրոջը, Եգիպտոսի թագաւորին, դէմ յանցանք գործեցին: 2Եւ Փարաւոն բարկացաւ իր երկու ներքինիներուն, այսինքն մատռուակապետին ու հացագործապետին. 3Եւ զանոնք դահճապետին տանը բանտին մէջ բանտարկեց՝ ուր Յովսէփ բանտարկուած էր: 4Եւ դահճապետը Յովսէփի ապսպրեց անոնց համար, ու անիկա կը ծառայէր անոնց. և անոնք ատեն մը բանտը մնացին: 5Եւ Եգիպտոսի թագաւորին մատռուակը ու հացագործը, որոնք բանտին մէջ կապուած էին, երկուքն ալ մէկ գիշեր մէյմէկ երազ տեսան, ամէն մէկուն երազին նշանակութեանը պէս: 6Եւ Յովսէփ առտուանց անոնց եկաւ, ու տեսաւ զանոնք որ խռովեր էին: 7Ու իր տէրոջը տունը իրեն հետ բանտարկուած Փարաւոնի ներքինիներուն հարցուց՝ ըսելով, Ինչո՞ւ համար ձեր երեսները տրտում են այսօր: 8Եւ անոնք ըսին անոր, Երազ տեսանք, ու զանիկա մեկնող չկայ. և Յովսէփ ըսաւ անոնց, Չէ՞ որ Աստուծոյ կը վերաբերին մեկնութիւնները. աղէ, պատմեցէք ինծի: 9Եւ մատռուակապետը իր երազը պատմեց Յովսէփի, ու ըսաւ անոր, Երազիս մէջ տեսայ որ* առջևս որթ մը կար. 10Եւ որթին վրայ երեք ուռ կային, և այն բողբոջելուն պէս ծաղիկ բացաւ, ու անոր ողկոյզները խաղող հասցուցին. 11Եւ Փարաւոնի գաւաթը ձեռքս էր. ու խաղողները առի և Փարաւոնի գաւաթին մէջ ճմլեցի, ու գաւաթը Փարաւոնի ձեռքը տուի: 12Եւ Յովսէփ անոր ըսաւ, Ատոր մեկնութիւնը այս է. երեք ուռը երեք օր է. 13Երեք օրէն ետքը Փարաւոն գլուխդ պիտի վերցնէ, ու քեզ նորէն քու պաշտօնիդ պիտի դարձնէ. և Փարաւոնի գաւաթը անոր ձեռքը պիտի տաս՝ անոր մատռուակը եղածիդ առաջուան սովորութեանը պէս: 14Բայց քեզի բարիք եղած ատեն զիս միտքդ բեր, և կ՚աղաչեմ քեզ, ինծի բարերարութիւն ըրէ, և զիս Փարաւոնի առջև յիշելով՝ զիս այս տունէն դուրս հանէ. 15Քանզի իրաւցընէ գողցուեցայ Եբրայացւոց երկրէն. և հոս ալ բան մը չըրի որ զիս այս գուբը նետեն: 16Երբ հացագործապետը տեսաւ որ աղէկ մեկնութիւն տուաւ, ըսաւ Յովսէփի, Ես ալ երազիս մէջ տեսայ որ գլխուս վրայ երեք ճերմակ սակառ ունէի. 17Եւ ամէնուն վրայի սակառին մէջ հացագործի շինած Փարաւոնի ամէն կերակուրներէն կար. ու թռչունները կ’ուտէին զանոնք գլխուս վրայի սակառէն: 18Եւ Յովսէփ պատասխան տուաւ ու ըսաւ, Ատոր մեկնութիւնը այս է. 19Երեք սակառը երեք օր է. Երեք օրէն ետքը Փարաւոն վրայէդ պիտի վերցնէ քու գլուխդ, ու քեզ ծառէ մը պիտի կախէ. և թռչունները վրայէդ քու մարմինդ պիտի ուտեն: 20Ու եղաւ որ երրորդ օրը Փարաւոնի ծննդեան օրն էր, և իր բոլոր ծառաներուն խնճոյք ըրաւ. և իր ծառաներուն մէջ մատռուակապետին ու հացագործապետին գլուխները վերցուց: 21Ու դարձուց մատռուակապետը իր պաշտօնին, և անիկա գաւաթը Փարաւոնի ձեռքը տուաւ. 22Բայց հացագործապետը կախել տուաւ, ինչպէս Յովսէփ մեկներ էր անոնց: 23Եւ մատռուակապետը միտքը չբերաւ Յովսեփը, հապա մոռցաւ զանիկա: