Յովսէփ Փարաւոնին երազը կը մեկնէ

1Ու եղաւ որ լման երկու տարիէ ետքը, Փարաւոն երազին մէջ տեսաւ որ գետին եզերքը կայներ էր: 2Եւ ահա գետնէն գեղեցիկ տեսքով ու պարարտ մարմնով եօթը երինջներ ելան, ու մարգագետնին վրայ* կ՚արածուէին: 3Եւ ահա անոնց ետեւէն՝ գետէն ուրիշ եօթը երինջներ ելան զազիր տեսքով ու նիհար մարմնով, ու միւս երինջներուն քով գետին եզերքը կայնեցան. 4Եւ զազիր տեսքով ու նիհար մարմնով երինջները կերան եօթը գեղեցիկ տեսքով ու պարարտ երինջները: Ետքը Փարաւոն արթնցաւ: 5Եւ քնացաւ, ու երկրորդ անգամ երազին մէջ տեսաւ որ մէկ ծղօտի վրայ եօթը պարարտ ու աղէկ հասկեր կ՚ելլէին: 6Եւ ահա անոնց ետեւէն եօթը նիհար ու խորշակահար հասկեր կը բուսնէին. 7Եւ այն նիհար հասկերը կլլեցին եօթը պարարտ ու լեցուն հասկերը: Եւ Փարաւոն արթնցաւ, և ահա երազ էր: 8Ու եղաւ որ առտուանց անոր հոգին նեղացաւ, ու կանչել տուաւ Եգիպտոսի բոլոր մոգերը և այն տեղի բոլոր իմաստունները. ու Փարաւոն պատմեց անոնց իր երազները, բայց մէ՛կը չկար որ զանոնք Փարաւոնի մեկնէ: 9Այն ատեն մատռուակապետը զրուցեց Փարաւոնի՝ ըսելով, Այսօր ես իմ յանցանքներս կը յիշեմ: 10Փարաւոն բարկացաւ իր ծառաներուն, ու զիս դահճապետին տունը բանտը դրաւ, զիս ու հացագործապետը. 11Եւ ես ու անիկա մէկ գիշեր երազ տեսանք. Ամէն մէկս իր երազին նշանակութեանը պէս երազ տեսանք: 12Եւ հոն մեզի հետ դահճապետին ծառան, Եբրայեցի պատանի մը, կար, ու անոր պատմեցինք, և անիկա մեկնեց մեզի մեր երազները. ամէն մէկուս՝ իր երազին պէս մեկնեց: 13Ու ինչպէս անիկա մեզի մեկնեց, այնպէս եղաւ. զիս իմ պաշտօնիս դարձուց, ու զանիկա կախեց: 14Այն ատեն Փարաւոն մարդ ղրկեց ու կանչեց Յովսէփը, և շուտով բանտէն հանեցին զանիկա. և ածիլուեցաւ ու իր հանդերձները փոխեց ու Փարաւոնի եկաւ: 15Եւ Փարաւոն ըսաւ Յովսէփի, երազ տեսայ, ու զանիկա մեկնող մը չկայ. և քեզի համար լսեցի որ կ՚ըսեն, թէ լսած երազդ կը մեկնես: 16Եւ Յովսէփ պատասխան տուաւ Փարաւոնի ու ըսաւ, Ոչ թէ ես, Աստուած պիտի տայ խաղաղութեան պատասխան Փարաւոնի: 17Եւ Փարաւոն ըսաւ Յովսէփի, Երազիս մէջ տեսայ որ գետին եզերքը կայներ էի. 18Եւ ահա գետէն եօթը երինջներ ելան պարարտ մարմնով ու գեղեցիկ տեսքով, և մարգագետնին վրայ կ՚արածուէին: 19Եւ ահա անոնց ետեւէն ուրիշ եօթը երինջներ ելան՝ նիհար ու խիստ զազիր տեսքով և վտիտ մարմնով, որ անոնց պէս զազիր բնաւ չտեսայ Եգիպտոսի բոլոր երկրին մէջ: 20Եւ նիհար ու զազիր երինջները կերան այն առաջուան եօթը պարարտ երինջները. 21Ու անոնց փորը մտնելէն ետքը՝ չէր գիտցուեր թէ անոնք անոնց փորը մտան. հապա անոնց տեսքը առաջուանին պէս զազիր էր: Ետքը արթնցայ: 22Եւ դարձեալ երազիս մէջ տեսայ՝ որ ահա մէկ ծղօտի վրայ եօթը լեցուն ու աղէկ հասկեր կ՚ելլէին. 23Եւ ահա անոնց ետեւէն եօթը չոր, նիհար ու խորշակահար հասկեր կը բուսնէին. 24Եւ նիհար հասկերը կլլեցին այն եօթը աղէկ հասկերը: Ու պատմեցի մոգերուն, բայց մէկը չկայ որ ինծի մեկնէ: 25Եւ Յովսէփ ըսաւ Փարաւոնի, Մէկ է Փարաւոնի երազը. Աստուած իր ընելիքը յայտնեց Փարաւոնի: 26Եօթը աղէկ երինջները եօթը տարի են, և եօթը աղէկ հասկերը եօթը տարի են. երազը մէկ է: 27Եւ անոնց ետեւէն ելած եօթը նիհար ու զազիր երինջները եօթը տարի են, և եօթը պարապ ու խորշակահար հասկերը եօթը տարուան սով է: 28Փարաւոնի զրուցած խօսքս այս է. Աստուած իր ընելիքը Փարաւոնի ցուցուցեր է: 29Ահա բոլոր Եգիպտոսի երկրին մէջ եօթը տարի մեծ առատութիւն պիտի գայ. 30Եւ անոնց ետեւէն եօթը տարի սով պիտի գայ, ու Եգիպտոսի երկրին մէջ բոլոր առատութիւնը պիտի մոռցուի. և սովը պիտի սպառէ երկիրը. 31Ու երկրին մէջ առատութիւնը պիտի չգիտցուի՝ անկէ ետքը գալու սովին պատճառաւ. վասն զի խիստ սաստիկ պիտի ըլլայ: 32Եւ երազը երկու անգամ Փարաւոնի կրկնուելուն պատճառը այս է որ այս բանը Աստուծմէ հաստատուեցաւ, և Աստուած շուտով պիտի ընէ զայն: 33Ուստի հիմա թող Փարաւոն հանճարեղ ու իմաստուն մարդ մը գտնէ, ու զանիկա Եգիպտոսի երկրին վրայ կեցնէ: 34Թող Փարաւոն այսպէս ընէ, ու երկրի վրայ գործակալներ դնէ, ու Եգիպտոսի երկրին արմտիքներէն առատութեան եօթը տարիներուն մէջ հինգէն մէկը առնէ: 35Եւ այն գալու աղէկ տարիներուն բոլոր պաշարը ժողվեն, ու Փարաւոնի ձեռքին տակ ցորեն դիզեն, և քաղաքներուն մէջ պաշար պահեն: 36Ու Եգիպտոսի երկրին մէջ ըլլալու եօթը տարուան սովին դէմ այս պաշարը երկրին համար պահուի, որպէս զի երկիրը սովէն չկորսուի:

Յովսէփ Եգիպտոսի կառավարիչը կ’ըլլայ

37Եւ այս բանը Փարաւոնի աչքին ու անոր բոլոր ծառաներուն աչքին աղէկ երեւցաւ: 38Եւ Փարաւոն ըսաւ իր ծառաներուն, Կրնա՞նք գտնել ասոր պէս մէկը, որ իր ներսիդին Աստուծոյ Հոգին ունի: 39Եւ Փարաւոն ըսաւ Յովսէփի, Որովհետև Աստուած այս ամէնը քեզի գիտցուց, քեզի պէս հանճարեղ ու իմաստուն չկայ: 40Դուն իմ տանս վրայ կեցիր, և իմ բոլոր ժողովուրդս քու բերանդ նային. ես միայն աթոռով քեզմէ մեծ ըլլամ: 41Եւ Փարաւոն ըսաւ Յովսէփի, Ահա քեզ Եգիպտոսի բոլոր երկիրը վրայ կեցուցի: 42Եւ Փարաւոն իր ձեռքէն մատանին հանեց, ու Յովսէփի ձեռքը դրաւ, և անոր բեհեզէ հանդերձներ հագցուց, ու անոր պարանոցը ոսկի մանեակ անցուց: 43Եւ զանիկա իր երկրորդ կառքը հեծցուց, ու կը պօռային անոր առջեւէն, Ծնրադրութիւն ըրէք. և Եգիպտոսի բոլոր երկրին վրայ կեցուց զանիկա: 44Եւ Փարաւոն ըսաւ Յովսէփի, Ես Փարաւոն եմ, և առանց քեզի բնաւ մէկը իր ձեռքը կամ իր ոտքը չվերցնէ Եգիպտոսի բոլոր երկրին մէջ: 45Ու Փարաւոն Յովսէփի անունը Փսոմփթոմփանէ դրաւ, և Արեգ քաղաքին* Պետափրա քուրմին աղջիկը Ասանէթը անոր կին ըլլալու տուաւ. ու Յովսէփ Եգիպտոսի երկիրը պտըտելու ելաւ: 46Եւ Յովսէփ Եգիպտոսի Փարաւոն թագաւորին առջև ելած ատեն երեսուն տարեկան էր: Եւ Յովսէփ Փարաւոնի առջեւէն ելաւ, ու Եգիպտոսի բոլոր երկիրը պտըտեցաւ: 47Եւ առատութեան եօթը տարիներուն մէջ երկիրը խիստ շատ արդիւնք տուաւ: 48Ու Եգիպտոսի երկրին մէջ եղած եօթը տարիներուն բոլոր պաշարը ժողվեց, ու քաղաքներու մէջ դրաւ պաշարը. ամէն քաղաքին բոլորտիքը եղած արտերուն պաշարը նոյն քաղաքին մէջ դրաւ: 49Եւ Յովսէփ ծովու աւազին չափ խիստ շատ ցորեն դիզեց. այնպէս որ հաշիւի չգալուն համար չափելը ձգեց: 50Եւ սովին տարիներուն գալէն առաջ՝ Յովսէփի երկու որդի ծնան, որ Արեգ քաղաքին Պետափրա քուրմին աղջիկը Ասանէթ ծնաւ անոր: 51Եւ Յովսէփ առջինեկին անունը Մանասէ դրաւ. քանզի ըսաւ, Աստուած ինծի մոռցուց իմ բոլոր վիշտերս ու իմ հօրս բոլոր տունը: 52Եւ երկրորդին անունը Եփրեմ դրաւ. քանզի ըսաւ , Աստուած իմ տառապանքիս երկրին մէջ աճեցուց զիս: 53Ու Եգիպտոսի երկրին մէջ եղած առատութեան եօթը տարին անցաւ: 54Եւ Յովսէփի ըսածին պէս, սովին եօթը տարին գալ սկսեց. և բոլոր երկիրներուն մէջ սով եղաւ, բայց Եգիպտոսի բոլոր երկրին մէջ հաց կար: 55Ու երբ Եգիպտոսի բոլոր երկիրը անօթեցաւ, ժողովուրդը հացի համար Փարաւոնի աղաղակեց. և Փարաւոն ըսաւ բոլոր Եգիպտացիներուն, Յովսէփի գացէք. Ինչ որ ձեզի ըսէ, զայն ըրէք: 56Ու երկրի բոլոր երեսին վրայ սով եղաւ. և Յովսէփ բացաւ բոլոր շտեմարանները, ու Եգիպտացիներուն պաշար ծախեց. և սովը սաստկացաւ Եգիպտոսի երկրին մէջ: 57Ու բոլոր աշխարհ Եգիպտոս կուգային՝ Յովսէփէ պաշար ծախու առնելու. վասն զի ամէն երկրի մէջ սովը սաստկացաւ: