Յովսէփ ինքզինք կը յայտնէ

1Եւ Յովսէփ չկրցաւ զսպել ինքզինք բոլոր իր քով կայնողներուն առջև, ու պոռաց, Քովէս դուրս հանեցէք բոլոր մարդիկը. և երբ Յովսէփ ինքզինք իր եղբայրներուն ճանչցուց, քովը մարդ մը չկեցաւ: 2Եւ ձայնը վերցնելով լացաւ. ու Եգիպտացիք լսեցին, ու Փարաւոնի տունն ալ լսեց: 3Եւ Յովսէփ ըսաւ իր եղբայրներուն, Ես Յովսէփն եմ. իմ հայրս տակաւին ո՞ղջ է. ու եղբայրները չէին կրնար պատասխան տալ անոր, վասն զի անոր առջև ապշած մնացին: 4Եւ Յովսէփ ըսաւ իր եղբայրներուն, Ինծի մօտ եկէք. անոնք ալ մօտ եկան. և ըսաւ, Ես ձեր եղբայրը Յովսէփն եմ, զոր Եգիպտոս տարուելու ծախեցիք: 5Ուստի հիմա զիս հոս ծախելնուդ համար մի վշտանաք, ու ձեզի ծանր չերեւնայ. վասն զի Աստուած ղրկեց զիս ձեր առջեւէն՝ կեանք պահելու համար: 6Քանզի երկրիս վրայ սովի երկրորդ տարին է այս. և տակաւին հինգ տարի կայ՝ որ ոչ վարուցան, ոչ ալ հունձք պիտի ըլլայ: 7Եւ Աստուած զիս ձեր առջեւէն զրկեց՝ որպէս զի երկրի վրայ ձեզի սերունդ պահէ, և մեծ ազատութիւնով ձեզ ապրեցնէ: 8Եւ հիմա զիս հոս ղրկողը դուք չէք, հապա Աստուած է. ու զիս Փարաւոնի հայր, և իր բոլոր տանը տէր, ու Եգիպտոսի բոլոր երկրին իշխան դրաւ: 9Շուտով իմ հօրս ելէք, ու ըսէք անոր, Այսպէս կ՚ըսէ քու Յովսէփ որդիդ, Աստուած բոլոր Եգիպտոսի տէր ըրաւ զիս. չուշանաս, ինծի իջնես. 10Եւ Գեսեմի երկրին մէջ պիտի բնակիս, որպէս զի ինծի մօտ ըլլաս, դուն ու քու որդիներդ, և քու որդիներուդ որդիները, և հօտերդ ու արջառներդ, և քու բոլոր ունեցածդ. 11Եւ հոն քեզ պիտի սնուցանեմ. վասն զի տակաւին հինգ տարի սով կայ. չըլլայ որ դուն ու քու տունդ և քու բոլոր ունեցածդ չքաւորութիւն քաշէք: 12Եւ ահա ձեր աչքերը ու իմ եղբօրս Բենիամինի աչքերը կը տեսնեն որ ձեզի խօսողը իմ բերանս է: 13Ու Եգիպտոսի մէջ իմ ունեցած բոլոր փառքս, ու ձեր բոլոր տեսածը պատմեցէք իմ հօրս. և շուտով իմ հայրս հոս իջեցուցէք: 14Եւ իր եղբօրը Բենիամինի պարանոցին վրայ ինկաւ ու լացաւ. Բենիամին ալ անոր պարանոցին վրայ լացաւ: 15Եւ իր բոլոր եղբայրները համբուրեց, ու անոնց վրայ լացաւ. և անկէ ետքը իր եղբայրները իրեն խօսեցան: 16Եւ այս լուրը Փարաւոնի տանը մէջ լսուեցաւ թէ Յովսէփի եղբայրները եկեր են. և Փարաւոնի ու անոր ծառաներուն հաճելի եղաւ: 17Եւ Փարաւոն ըսաւ Յովսէփի, Քու եղբայրներուդ ըսէ, Զայս ըրէք. ձեր անասունները բեռցուցէք, ու Քանանու երկիրը գացէք. 18Եւ ձեր հայրը ու ձեր ընտանիքները առէք, ու ինծի եկէք. և Եգիպտոսի երկրին աղէկ տեղը ձեզի տամ, ու երկրին պարարտութենէն ուտէք: 19Եւ քեզի հրաման եղաւ. զայս ըրէք. ձեր տղաքներուն համար ու ձեր կիներուն համար Եգիպտոսի երկրէն կառքեր առէք ձեզի, և ձեր հայրը բերէք ու եկէք: 20Եւ ձեր կարասիքին մի նայիք. վասն զի բոլոր Եգիպտոսի երկրին բարիքը ձերն է: 21Եւ Իսրայէլի որդիները այնպէս ըրին. և Յովսէփ անոնց կառքեր տուաւ Փարաւոնի խօսքին պէս, ու ճամբու համար պաշար տուաւ անոնց: 22Անոնց ամէն մէկուն զատ զատ փոխելու հանդերձներ տուաւ, բայց Բենիամինի երեք հարիւր կտոր արծաթ ու հինգ ձեռք փոխելու հանդերձ տուաւ: 23Եւ իր հօրը ասոր պէս բաներ ղրկեց. տասը էշ Եգիպտոսի բարիքներով բեռցած, և տասը էգ էշ ցորենով ու հացով և ուտելիքներով բեռցած, իր հօրը ճամբորդութեանը համար: 24Այսպէս իր եղբայները ղրկեց, ու գացին. և ըսաւ անոնց, Ճամբուն մէջ չխռովիք: 25Եւ անոնք Եգիպտոսէ ելան, ու դէպ ի Քանանու երկիրը իրենց հօրը Յակոբի գացին. 26Եւ անոր պատմեցին՝ ըսելով, Յովսէփ տակաւին ողջ է, ու Եգիպտոսի բոլոր երկրին իշխանը անիկա է: Եւ Յակոբի սիրտը մարեցաւ, քանզի անոնց չհաւատաց: 27Եւ անոր պատմեցին Յովսէփի բոլոր խօսքերը զորոնք իրենց ըսեր էր, ու երբ տեսաւ Յովսէփի ղրկած կառքերը զինք տանելու համար, անոնց հօրը Յակոբի հոգին ողջնցաւ: 28Եւ Իսրայէլ ըսաւ, Բաւական է. իմ որդիս Յովսէփ տակաւին ողջ է. երթամ ու մեռնելէս առաջ տեսնեմ զանիկա: