1Քանզի օրէնքը գալու բարիքներուն շուքը, ու ոչ թէ այն բաներուն բուն կերպարանքը ունենալով, միշտ ամէն տարի մատուցուած նոյն զոհերով երբէք չկրնար կատարեալ ընել զանոնք որ կը մօտենան: 2Ապա թէ ոչ` պիտի չդադարէի՞ն մատուցուելէն, պաշտօն մատուցանողներուն մէկ անգամ մաքրուելէն ետև ա°լ մեղքի վրայով խղճմտանքի յանդիմանութիւն մը չունենալնուն համար: 3Բայց անոնցմով ամէն տարի մեղքերու յիշատակութիւն կ’ըլլայ 4Վասն զի նոխազներուն ու ցուլերուն արիւնը չկրնար մեղքերը վերցնել: 5Անոր համար իր աշխարհ մտնելու ատենը կ’ըսէ, Զոհ ու ընծայ չուզեցիր դուն, հապա ինծի մարմին մը պատրաստեցիր. 6Ողջակէզներու ու մեղքի պատարագներու չհաւնեցար: 7Այն ատեն ըսի, Ահա կու գամ ես, (գիրքի տոմսի մէջ ինծի համար գրուած է,) քու կամքդ ընելու, ով Աստուած: 8Վերը ըսելով թէ Զոհ ու ընծայ և ողջակէզներ ու մեղքի պատարագներ չուզեցիր` ու անոնց չհաւնեցար, (որոնք օրէնքին համեմատ կը մատուցուին,) 9Ետքը կ’ըսէ, Ահա կու գամ ես քու կամքդ ընելու, ով Աստուած. առաջինը կը հերքէ որպէս զի երկրորդը հաստատէ. 10Որ կամքով մենք ալ սրբուեցանք` Յիսուս Քրիստոսի մարմինին մէկ անգամ պատարագուելովը: 11Եւ ամէն քահանայ օր ըստ օրէ իր պաշտօնին մէջ կը կենայ, և նոյն զոհերը շատ անգամ կը մատուցանէ, որոնք երբէք չեն կրնար մեղքերը վերցնել. 12Բայց ասիկա մէկ զոհ մատուցանելով մեղքերու համար, մշտնջենաւորապէս Աստուծոյ աջ կողմը նստաւ. 13Եւ ասկէ ետև կը սպասէ, մինչև իր թշնամիները իր ոտքերուն պատուանդան դրուին: 14Վասն զի մէկ պատարագով մշտնջենաւորապէս կատարեց սրբուածները: 15Բայց Հոգին Սուրբ ալ մեզի վկայութիւն կու տայ, քանզի առաջուընէ ըսելէն ետև 16Թէ Այս է այն ուխտը` զոր ես անոնց հետ պիտի ընեմ այն օրերէն ետքը, (կ’ըսէ Տէրը,) իմ օրէնքներս անոնց սրտին մէջ պիտի դնեմ, ու անոնց միտքին մէջ պիտի գրեմ զանոնք. 17Ետքը կ’ըսէ թէ Անոնց մեղքերը և անոնց անօրէնութիւնները ա°լ պիտի չյիշեմ: 18Իսկ ուր ասոնց թողութիւն կայ, ա°լ մեղքի համար պատարագ պէտք չէ:

Աստուծոյ մօտենանք

19Ուրեմն, եղբայրներ, համարձակութիւն ունենալով սուրբ տեղը մտնելու Յիսուսի արիւնովը, 20Այն նոր ու կենդանի ճամբովը` զոր բացաւ մեզի վարագուրին մէջէն, որ է իր մարմինը, 21Եւ մեծ քահանայ մը ունէնալով Աստուծոյ տանը վրայ, 22Մօտենանք ճշմարիտ սրտով, լեցուն հաւատքով, սիրտերնիս չար խիղճէն մաքրուած, ու մարմիննիս մաքուր ջրով լուացուած. 23Անխախտ պահենք յոյսին դաւանութիւնը, վասն զի հաւատարիմ է անիկա որ խոստացաւ: 24Եւ իրարու հոգ տանինք` սիրոյ և բարեգործութեան գրգռելով. 25Եւ մէկտեղ ժողվուիլը չթողունք, ինչպէս ոմանք սովորութիւն ունին. հապա մէկզմէկ յորդորենք, ու այնչափ աւելի` որչափ այն օրուան մօտենալը կը տէսնէք: 26Վասն զի եթէ ճշմարտութեան գիտութիւնը ընդունելէ ետև կամաւ մեղք գործելու ըլլանք, ալ անկէ ետև մեղքերու համար ուրիշ զոհ մը չմնար 27Հապա զարհուրելի սպասել մը դատաստանին, ու կրակի բարկութիւն մը կը մնայ, որ պիտի լափէ հակառակորդները: 28Մէկը եթէ Մովսէսի օրէնքը անարգէր, առանց ողորմութեան երկու կամ երեք վկաներով կը մեռնէր. 29Ալ ո՜րչափ սաստիկ պատժի արժանի պիտի սեպուի կը կարծէք անիկա, որ Աստուծոյ Որդին ոտքի տակ առաւ, և ուխտին արիւնը անմաքուր սեպեց, որով ինք սրբուեցաւ, և շնորհաց Հոգին նախատեց: 30Քանզի գիտենք զանիկա որ ըսաւ, Իմս է վրէժխնդրութիւնը, ես պիտի հատուցանեմ, կ’ըսէ Տէրը. և դարձեալ` Տէրը պիտի դատէ իր ժողովուրդը: 31Սարսափելի բան է կենդանի Աստուծոյ ձեռքը իյնալը: 32Արդ միտքերնիդ բերէք այն առաջին օրերը, որոնց մէջ լուսաւորուելէ ետև շատ սաստիկ չարչարանքներ կրեցիք. 33Երբեմն նախատինքներով ու վիշտերով խայտառակուած, երբեմն ալ այսպիսի վիճակի մէջ եղողներուն կցորդ ըլլալով: 34Վասն զի իմ կապերուս մէջ ինծի* չարչարակից եղաք, ու ձեր ստացուածքին կողոպտուիլը ուրախութեամբ ընդունեցիք, գիտնալով որ լաւագոյն և մնայուն ստացուածքներ ունիք ձեզի երկինքը: 35Ուստի ձեզմէ մի ձգէք ձեր վստահութիւնը, որ մեծ վարձքի հատուցում ունի: 36Վասն զի պէտք է ձեզի համբերութիւն, որպէս զի Աստուծոյ կամքը ընելով` խոստմունքը վայելէք. 37Քանզի ալ ասկէ քիչ մը ատենէն ան որ գալու է` պիտի գայ ու պիտի չուշանայ: 38Եւ Արդարը հաւատքէն պիտի ապրի. ու եթէ մէկը ետ քաշուի, իմ հոգիս անոր չհաճիր: 39Բայց մենք ետ չենք քաշուիր որ կորսուինք, հապա կը հաւատանք որ մեր հոգին փրկուի: