Ինչպէ՞ս յաճեցնել զԱստուած

1Եղբայրսիրութիւնը ձեր մէջ հաստատ մնայ: 2Հիւրասիրութիւնը մի մոռնաք, վասն զի անով ոմանք հրեշտակներ ընդունեցին չգիտնալով: 3Միտքերնիդ ըլլան կապուածները, որպէս թէ անոնց հետ դուք ալ կապուած էք. և չարչարուածները` որպէս թէ դուք ալ մարմին ունեցող էք: 4Ամուսնութիւնը բոլորովին պատուական է, ու անկողինը անարատ է. բայց պոռնիկները ու շնացողները Աստուած պիտի դատէ: 5Բարքերնիդ արծաթասէր չըլլայ, բաւական սեպեցէք որչափ բան որ ձեռքերնիդ կայ. վասն զի ինք զրուցեց թէ Բնաւ քեզ պիտի չթողում, ու բնաւ քեզ երեսէ պիտի չձգեմ. 6Այնպէս որ համարձակ ըլլանք ըսելու, Տէրը իմ օգնականս է, ու ես պիտի չվախնամ. մարդը ինծի ի՞նչ պիտի ընէ: 7Յիշեցէք ձեր առաջնորդները որոնք Աստուծոյ խօսքը ձեզի խօսեցան, և անոնց վարմունքին վախճանին նայելով` իրենց հաւատքին նմանող եղէք: 8Յիսուս Քրիստոս նոյն է երէկ ու այսօր և յաւիտեանս: 9Կերպ կերպ և օտարաձայն ուսմունքներով մի տարուբերիք, քանզի աղէկ է որ սիրտը շնորհքով հաստատուի ու ոչ թէ կերակուրներով. որոնցմով օգուտ մը չունեցան անոնք որ այնպէս գացին: 10Սեղան մը ունինք մենք, ուրկէ իշխանութիւն չունին ուտելու անոնք որ խորանին ծառայութիւն կ’ընեն: 11Քանզի ո°ր անասուններուն արիւնը որ սուրբ տեղը կը տարուի մեղքի համար քահանայապետին ձեռքով, անոնց մարմինները բանակէն դուրս կ’այրուին: 12Ուստի Յիսուս ալ, իր արիւնովը ժողովուրդը սրբելու համար, դռնէն դուրս չարչարուեցաւ: 13Ուրեմն եկէք իրեն ելլենք բանակէն դուրս, մեր վրայ առնելով անոր նախատինքը: 14Վասն զի մենք հոս մնայուն քաղաք չունինք, հապա հանդերձեալը կը փնտռենք: 15Ուստի անոր ձեռքով ամէն ատէն Աստուծոյ օրհնութեան պատարագ մատուցանենք, այսինքն մեր շրթունքներուն պտուղը, որոնք իր անունը կը դաւանին: 16Իսկ բարերարութիւնը ու կարօտեալներուն հաղորդակցութիւնը մի մոռնաք, վասն զի Աստուած այնպիսի պատարագներու կը հաւնի: 17Ձեր առաջնորդներուն մտիկ ըրէք ու անոնց հնազանդ կեցէք, վասն զի անոնք ձեր հոգիներուն համար կը հսկեն, որպէս թէ հաշիւ պիտի տան. որպէս զի խնդութիւնով ընեն այն գործը, և ոչ թէ հառաչելով, վասն զի այն ձեզի օգտակար չէ: 18Մեզի համար աղօթք ըրէք, վասն զի մենք համոզուած ենք թէ աղէկ խղճմտանք ունինք, և ամէն բանի մէջ կ’ուզենք աղէկ վարմունք ունենալ: 19Եւ մանաւանդ կ’աղաչեմ որ զայս ընէք, որպէս զի աւելի շուտով ձեզի դառնամ:

Փակման աղօթք

20Եւ խաղաղութեան Աստուածը, որ մեռելներէն յարուց մեր Տէր Յիսուսը, որ յաւիտենական ուխտին արիւնովը ոչխարներուն մեծ Հովիւն է, 21Ձեզ ամէն բարի գործի մէջ հաստատէ իր կամքը ընելու, և ձեր մէջ իր առջև հաճոյ եղածը ընէ Յիսուս Քրիստոսի ձեռքով, որու փառք յաւիտեանս յաւիտենից: Ամէն:

Վերջին խօսք

22Կ’աղաչեմ ձեզի, եղբայրներ, այս յորդորական խօսքիս համբերել, վասն զի համառօտաբար գրեցի ձեզի: 23Գիտցէք որ մեր եղբայրը Տիմոթէոս արձակուած է, որու հետ, եթէ շուտով գայ, պիտի տեսնեմ ձեզ: 24Բարև ըրէք ձեր բոլոր առաջնորդներուն ու բոլոր սուրբերուն. ձեզի բարև կ’ընեն անոնք որ Իտալիայէ են: Շնորհքը ձեր ամէնուն հետ ըլլայ: Ամէն: